هه‌ڤژینیا نهێنی د زێده‌بوونێ دایه
هه‌ولێر، قائید میرۆ
بابه‌تێ ئینانا هه‌ڤژینا دویێ ل هه‌رێما كوردستانێ پشتی راستڤه‌كرنا قانوونا بارێ باژێڕی و دانانا مه‌رجان گۆهۆڕین ب سه‌ردا هاتینه چالاكڤانه‌كا ژنان ژی ئاشكرا كر، نیڤا زه‌لامێن هه‌ڤژینا دویێ ئینای هه‌ڤژینێن وان عه‌ره‌بن ئه‌گه‌رێ ئینانا هه‌ڤژینێن عه‌ره‌ب ژی بۆ نه‌بوونا مه‌رجێن گران ڤه‌دگه‌ڕیت و گۆت: ئینانا ژنا دویێ ب نهێنی زۆر بوویه و ژن هه‌یه چه‌ندین ساله هه‌ڤژینێ وێ ژن بسه‌ر ئینایه و ئه‌و نزانیت.
به‌هره حه‌مه ره‌ش، چالاكڤانا ژنان بۆ ئه‌ڤرۆ دیار كر” ئه‌و ئامارێن لدۆر گرێبه‌ستێن هه‌ڤژینا دویێ ل هه‌رێما كوردستانێ دهێنه به‌لاڤكرن دروست نینن، چونكی رێژا ئینانا ژنا دویێ ژلایێ زه‌لامێن هه‌رێما كوردستانێ زۆر زێده‌تره ژ ئه‌ڤێ ئامارا ژلایێ وه‌زاره‌تا داد هاتیه به‌لاڤكرن و گۆت: (بۆ نموونه ل گوره‌ی ئامارێن جڤاتا دادوه‌ریێ سالا بۆری ل سه‌رانسه‌ری هه‌رێما كوردستانێ تنێ 102 حاله‌تێن گرێبه‌ستا ئینانا ژنا دویێ هاتینه تۆمار كرن، ئه‌ڤه ژلایه‌كی ڤه راسته، چونكی ئه‌و بتنێ ژمارا وان گرێبه‌ستایه یێن ل دادگه‌هان هاتینه تۆمار كرن، به‌لێ وه‌ك رێژه زۆر زێده‌تره و خه‌لك بۆ گرێبه‌ستێن هه‌ڤژینیێ زێده‌تر سه‌ره‌دانا دادگه‌هێن ده‌ڤه‌رێن ده‌رڤه‌ی سنورێ حوكمه‌تا هه‌رێما كوردستانێ دكه‌ن).
به‌هره‌یێ زێده‌تر گۆت: (بۆ نموونه ل دادگه‌هێن شێخان و مووسل و مه‌خموور و كه‌ركووكێ گرێبه‌ست بۆ هه‌ڤژینا دویێ یان زێده‌تر دهێته كرن، ژبه‌ركو ل گوره‌ی قانوونا بارێ باژێڕی یا عێراقێ ئه‌و مه‌رجێن ل دادگه‌هێن هه‌رێما كوردستانێ هه‌ین ل ئه‌ڤان دادگه‌هان نینن و ب شێوه‌یه‌كێ ساناهی زه‌لام دشێن ل ئه‌ڤان ده‌ڤه‌ران گرێبه‌ستا هه‌ڤژینه‌كێ زێده‌تر تۆمار بكه‌ن، له‌وڕا رێژا وان گرێبه‌ستێن بۆ ئینانا زێده‌تری هه‌ڤژینه‌كێ هاتینه تۆمار كرن زۆر زێده‌تره و ئه‌ز باوه‌رم زێده‌تری ئێك هزار گرێبه‌ستان هه‌نه نه‌ك 100 گرێبه‌ستان).
چالاكڤانا بیاڤێ ژنان ئاشكرا ژی كر، نوكه دیاردا ئینانا ژنا دویێ بشێوه‌یێ نه‌په‌نی و دزیڤه زۆر زێده بویه و خه‌لك هه‌ر ناچیته دادگه‌هێ بۆ گرێبه‌ستێن هه‌ڤژینیێ، ئانكو بێی ئه‌نجامدانا گرێبه‌ستا هه‌ڤژینیێ زه‌لام دبنه خودان هه‌ڤژین و هه‌ڤژینا ئێكێ زانیاری نینن لسه‌ر زه‌لامی خوه كا چه‌ند هه‌ڤژین ب نهێنی هه‌نه، ئه‌ڤێ چه‌ندێ ژی كارتێكرنێن خراپ لسه‌ر جڤاكی هه‌نه و سالێن داهاتی دێ هێشتا كارتێكرنێن مه‌زنترژی هه‌بن و گۆت: (چونكی ئه‌و زه‌لامێن هه‌ڤژین ب نهێنی ئینای تنێ ره‌نگه هنده‌ك هه‌ڤالێن وی بزانن، زه‌لام هه‌یه زارۆكێن هه‌ڤژینا دویێ مه‌زن بووینه هێشتا هه‌ڤژینا ئێكێ نزانیت كو هه‌وی هه‌یه و ژن ل سه‌ر ئینایه، كارتێكرنێن خراب یێن هه‌ڤژینیا ب نهێنی ئه‌ڤه‌نه زارۆك زۆر جاران ناهێنه تۆماركرن ل حوكمه‌تێ و ئه‌و زارۆكه دێ مه‌زن بیت و نزانیت وهنده‌ك خویشك و برایێن دیتر ژی هه‌نه و مام و خالێن خوه نانیاسیت).
سه‌باره‌ت نیڤا زه‌لامێن ل هه‌رێما كوردستانێ هه‌ڤژینا دویێ ئینای عه‌ره‌بن، ئینانا ژنێن عه‌ره‌ب بۆچی بوویه مۆدێل و زه‌لام دخوازن هه‌ر ژنێن ب ره‌گه‌ز عه‌ره‌ب بینن، به‌هره‌یێ دیار كر كو ئه‌ڤێ ژی حیكمه‌ته‌ك تێدا هه‌یه، ژنێن عه‌ره‌ب بۆ پرۆسا هه‌ڤژینیێ وه‌ك یێن هه‌رێما كوردستانێ مه‌رج نینن، هه‌روه‌سا ئه‌و ژنێن ژ ئه‌گه‌رێ ته‌لاقێ یان ب هه‌ر ئه‌گه‌ره‌كێ هه‌بیت هه‌ڤژینێن خوه ژ ده‌ست داین هه‌تا ته‌مه‌نێ وان یێ مه‌زن ژی بیت و زارۆكێن مه‌زن هه‌بن ئاسایه دوباره بچنه ناڤا پرۆسا هه‌ڤژینیێ و گۆت: (به‌رۆڤاژی ژبه‌ر كلتوورێ هه‌رێما كوردستانێ و بابه‌تێن عه‌شائیری ده‌مێ ژنه‌ك بێ هه‌ڤژین دمینیت زۆر ب زه‌حمه‌ت دوباره دچیته ناڤا پرۆسا هه‌ڤژینیێ، ئه‌گه‌رێن دیژی هه‌نه بۆ نموونه ئه‌ڤێ هه‌ڤژینا دویێ عه‌ره‌ب بینیت كه‌س و كارێن وان ئێكدو نانیاسن و بێسه‌ر ئێشتره بۆ زه‌لامی كو ژنه‌كا ناڤخۆ بینیت دوڤدا ئاشكرا ببیت).
