هه‌ڤژینی و جودابوون ل كوردستان د زێده‌بوونێ دایه
ئه‌ڤرۆ، نه‌وزاد هلۆری:
هه‌ر چه‌نده ل هه‌رێما كوردستانێ ب گشتی و پارێزگه‌ها دهۆكێ ماره‌برین دناڤبه‌را كچ و كورا د زێده‌بوونێ دایه، به‌لێ د هه‌مان ده‌م دا جودابوونا هه‌ڤژینان ژی د زێده‌بوونێ دایه، ماموستایه‌كێ ئایینی ژی دیار كر كو دڤێت پێداچون د سیسته‌مێ خێزانان دا بهێته كرن.
جیهاد زێباری ماموستایێ ئایینی ل شێلادزێ بۆ ئه‌ڤرۆ دیار كر كو پێكئینانا هه‌ڤژینیێ دناڤبه‌را كچ و كورا د ژیێ پێگه‌هشتنێ دا ئێك ژ بنه‌مایێن هه‌ره گرنگه د ئایینی دا بۆ درێژه‌دان ب شارستانیا مرۆڤایه‌تی و رێكخستنا خێزانێ و دووركه‌فتن ژ كارێن خراب، به‌لێ دڤێت ئه‌ڤ یه‌ك ژی ل سه‌ر بنه‌مایه‌كێ هه‌ره بهێز بهێته دانان و گۆت: (مخابن ل ڤان چه‌ند سالێن دووماهیێ ب تایبه‌تی پشتی كو ته‌كنولوژیایێ ده‌ست ب سه‌ر هه‌موو تشته‌كێ دا گرتی و داب و نه‌ریتێن گه‌لێ جیهانێ هاتینه دناڤ كوردان دا، خێزانا كوردی ژی به‌ر ب ئاقاره‌كێ نه‌دیاره و ده‌ستكرد و بێگانه دچیت و هێدی هێدی ژ داب و نه‌ریت و كه‌لتورێ كورده‌واریێ یێ جوان دوور دكه‌ڤن، له‌وا دێ بینین كو پشتی چه‌ند ساله‌كێن كێم یێن هه‌ڤژینیێ ڤه‌قه‌تیان دكه‌ڤیته دناڤبه‌را كچ و كورا و ل هه‌ڤدو جودا دبن).
(ل گوره‌ی ئامارێن جڤاتا دادوه‌ری یا هه‌رێما كوردستانێ سالا 2020ێ ل هه‌ر چار پارێزگه‌هێن هه‌رێما كوردستانێ هه‌شت هزار و 144 هه‌ڤژین ل هه‌ڤدو جودا بوینه ژ وانان سێ هزار و 261 ل سنورێ پارێزگه‌ها هه‌ولێرێ و سێ هزار و دو ژی ل سنورێ پارێزگه‌ها سلێمانیێ، دیسان هزار و 303 ل سنورێ پارێزگه‌ها دهۆكێ و 578 ژی ل سنورێ پارێزگه‌ها كه‌ركوكێ و ده‌ڤه‌را گه‌رمیان، د هه‌مبه‌ر دا 46 هزار و 969 ماره‌برین ل هه‌مان سال دناڤبه‌را كچ و كورا هاتینه تومار كرن، ژ وانان 16 هزار و 803 ل سنورێ پارێزگه‌ها هه‌ولێرێ و 15 هزار و 862 ل سنورێ پارێزگه‌ها سلێمانیێ و 11 هزار و 745 ل سنورێ پارێزگه‌ها دهۆكێ و دو هزار و 519 ژی ل سنورێ پارێزگه‌ها كه‌ركوكێ و ده‌ڤه‌را گه‌رمیان(.
(دیسان سالا 2021ێ ل هه‌رچار پارێزگه‌هێن هه‌رێما كوردستانێ 11 هزار و 699 هه‌ڤژین ل هه‌ڤدو جودابوینه ژ وانان چار هزار و 43 ل سنورێ پارێزگه‌ها هه‌ولێرێ و چار هزار و 767 ژی ل سنورێ پارێزگه‌ها سلێمانیێ، دیسان هزار و 796 ل سنورێ پارێزگه‌ها دهۆكێ و هزار و 93 ژی ل سنورێ پارێزگه‌ها كه‌ركوكێ و ده‌ڤه‌را گه‌رمیان، د هه‌مبه‌ر دا 56 هزار و 837 ماره‌برین ل هه‌مان سال دناڤبه‌را كچ و كورا هاتینه تومار كرن، ژ وانان 18 هزار و 964 ل سنورێ پارێزگه‌ها هه‌ولێرێ و 20 هزار و 147 ل سنورێ پارێزگه‌ها سلێمانیێ و 13 هزار و 441 ل سنورێ پارێزگه‌ها دهۆكێ و دوو هزار و 285 ژی ل سنورێ پارێزگه‌ها كه‌ركوكێ و ده‌ڤه‌را گه‌رمیان، جوداهیا وان ل سالا 2021ێ دا سێ هزار و 555 جودابوون زێده بوینه، ب ره‌نگه‌كێ كو 782 ل سنورێ پارێزگه‌ها هه‌ولێرێ و هزار و 765 ل سنورێ پارێزگه‌ها سلێمانیێ، دیسان 493 ل سنورێ پارێزگه‌ها دهۆكێ و 515 ژی ل سنورێ پارێزگه‌ها كه‌ركوكێ و ده‌ڤه‌را گه‌رمیان، د هه‌مبه‌ر دا هه‌شت هزار و 649 ماره‌برین ل هه‌مان سال دناڤبه‌را كچ و كورا زێده‌بوینه، ب ره‌نگه‌كێ كو دو هزار و 161 ل سنورێ پارێزگه‌ها هه‌ولێرێ و چار هزار و 285 ل سنورێ پارێزگه‌ها سلێمانیێ و هزار و 696 ل سنورێ پارێزگه‌ها دهۆكێ و 234 ژی ل سنورێ پارێزگه‌ها كه‌ركوكێ و ده‌ڤه‌را گه‌رمیان).
هه‌ر د ئامارا وان دا هاتیه ژی: (ل سالا بوری ل دادگه‌هێن هه‌رێما كوردستانێ رێ ب 101 كه‌سان هاتیه دان كو هه‌ڤژینیا دویێ پێكبینن، ب ره‌نگه‌كێ 73 ل سنورێ پارێزگه‌ها هه‌ولێرێ و حه‌فت ل سنورێ پارێزگه‌ها سلێمانیێ و 21 ژی ل سنورێ پارێزگه‌ها دهوكێ، ل كه‌ركوك و گه‌رمیان رێ ب چ كه‌سان نه‌هاتیه دان بۆ ئینانا هه‌ڤژینا دویێ).
ماموستایێ ئایینی ئه‌و چه‌نده ژی دیار كر، دڤێت پێداچۆن د سیسته‌مێ خێزانا كوردی دا بهێته كرن ب تایبه‌تی نابیت د ژیێ بچوكدا هه‌ڤژینی بهێته پێكئینان، دیسان نابیت بارگرانی ل سه‌ر كچ و كورا بهێته دروست كرن، رێكخستن د ئینانا زارویان دا هه‌بیت ژبه‌ركو ژ رویێ دارایی ڤه كارتێكرنێ ل خێزانا كورد دكه‌ن و گۆت: (دیسان دڤێت هنده‌ك مه‌رج و رێنمایی د پرۆسا به‌ری پێكئینانا هه‌ڤژینیێ بهێنه زێده كرن بۆ نموونه پشكدار بوون د خولێن پێگه‌هاندنێ دا، به‌رۆڤاژی دێ جودابوون دناڤبه‌را هه‌ڤژینان د زێده‌بوونێ دا بیت).
