هه‌یامه‌كه.. خه‌ونان دبینم
عارف حیتۆ
سیبه‌را په‌نجێن پلنگی
ئه‌و به‌ته‌نا ل به‌رانبه‌ری بیستانێ مه
پاوان كر بوو
هه‌ر چ كووڤی و ئاسك هه‌نه، د به‌رزه‌نه
هه‌ر چ گیایێ كه‌سك هه‌بوو
ب ره‌هێن داران تالان كر بوو
ئوو سه‌یێ مه- ئه‌وێ د گه‌ل چنیا راهاتی و
بێهنا گوشتی دایه ب ژیان
ژ برسا مر بوو!
من خه‌ونه‌كا خوه یا دوجان
ب پڕ زانی، كره تیرا به‌ر كڤانی
من حه‌زه‌كا خوه یا بێجان
د ده‌ستێ خوه‌یێ راستێ پێچا و
دانا به‌ر پێ ڤی زه‌مانی
وه‌ك نێچیرڤانه‌كێ چه‌له‌نگ
ژ بویسه‌یه‌كێ بۆ ئێكا دی هه‌تا دره‌نگ
دا چیرۆكێن عفریته‌كێ ل به‌ر سیبه‌رێ
بۆ زارۆكێن نفشێ رۆژێ ڤه‌گێرم و ده‌ره‌هی كه‌م
ئوو.. شه‌ڤ ب سه‌ردا هات
تاری زولماتا نووبوویی،
هه‌ناسا برسی نه‌نڤاند
ترسه‌كا به‌د.. خوه د چاڤێ من دا كه‌ناند
ئوو ل سحارێ..
هه‌كو مه‌ستی ژ قافێ سه‌رێ من ڤه‌ره‌ڤی
وه‌سا ده‌ركه‌ت
ئه‌ڤ وه‌غه‌ره هه‌لوه‌سه‌یه‌كا بێ بن بوو
ئه‌و پلنگێ په‌نجێن وی د سینگێ ئاخێ ڕا
ئه‌و سیبه‌را نه‌لڤ د چاڤێن رۆژێ ڕا
خه‌ونا من بوو!
هه‌یامه‌كه نه‌گه‌له‌ك دوور
ئه‌ز یێ فێری خه‌ونان بوویم و
هه‌رده‌م خه‌ون.. كه‌دا من بوو!
*
عه‌جه‌لێ خوه ب كراسێ په‌ریه‌كا خن پێچا و
هاته د خه‌ونا من یا مۆردا
من وه هه‌ستكر ئه‌ڤه ئاڤا حه‌یاتێیه و
ژ بانێن بلند رژیای ژۆردا
ژ نشكه‌كێڤه.. هه‌می شه‌مالك ڤه‌مریان و
ئه‌ناهیتا ل سه‌ر بورجه‌كێ ژ ته‌رزێ چیا
ئاوڕه‌كا مشت گله‌یی یان خه‌ریبی
ل جانێ مشتی غروور دا
خه‌مان خوه د چاڤان وه‌ركر و
ژ خه‌مان خه‌م بوون..
خه‌مێن خه‌مر و
خه‌مێن په‌نگیایی د دلێ كووردا
من بڕیاردا بزڤرمه‌ڤه به‌ر په‌زێ خوه
ڤان چیرۆكێن هێژ نه‌گۆتی و نه‌حه‌باندی
بڤه‌گێرم بۆ په‌زێ خوه
هوون نزانن چه‌ند یا خۆشه
تو خه‌ونه‌ك بی- خه‌ونه‌ك سه‌رخۆش..!
ل به‌ر په‌زی بی و په‌ز یێ دلخۆش..!
*
