هه‌یفا جاف: هندی كوردستان تیڤی هه‌بیت دێ ل گه‌ل یا به‌رده‌وام بم
دهۆك، شاكر ئه‌تروشی:
خانما میدیاكار هه‌یفا سالح قادر، به‌رنیاس ب (هه‌یفا جاف) د دیداره‌كێ دا بۆ رۆژناما ئه‌ڤرۆ گۆت: ل سالا 1996 بۆ جارا ئێكێ من ده‌ست ب كارێ راگه‌هاندنێ كر، و وێستگه‌ها من یا ئێكێ ل كومه‌لا ره‌وشه‌نبیریا توركانان بوو من به‌رنامه‌ك هه‌بوو ب ناڤێ (ده‌نگێ ژنان) دووڤدا وه‌كو بێژه‌ر ب زمانێ توركی من ده‌نگوباس ل كه‌نالێ هه‌رێم دخواندن، هه‌تا ده‌ستپێكا سالا 2000 وه‌كو ئاماده‌كار و پێشكێشكار من به‌رنامه‌كێ توركمانی ب ناڤێ دونیا مز ل كه‌نالێ كوردستان تیڤی و بۆ ده‌مێ شه‌ش سالان من ئه‌و به‌رنامه پێشكێش دكر، ل 2006 ئه‌ز چوومه پشكا سیاسی و من به‌رنامه‌ك هه‌بوو رۆژانه سه‌ره‌دانا باژێرێ كه‌ركووك دكر و راپۆرت ل وێرێ ئاماده دكرن.
زێده‌تر گۆت: هه‌ر ل سالا 2006 من ده‌ست ب چێكرنا هنده‌ك راپۆرتێن دكیۆمه‌نتی كر، ژوانا به‌رنامێ چیرۆكێن زیندانێ و په‌روه‌رده ل رۆژانێن سه‌ختێن ئیلۆنێ، هه‌روه‌سا ئافره‌تێن پێشمه‌رگه كو هه‌تا نوكه یێ به‌رده‌وامه و چه‌ندین به‌رنامه ل دۆر داستانێن شۆڕه‌شا ئیلۆنێ چێكرینه، هه‌روه‌سا ل شه‌ڕێ داعش من كارێ په‌یامنێریێ ژی كریه، و ئه‌ڤه بیست و ئێك ساله ئه‌ز ل كه‌نالێ كوردستان تیڤی كاردكه‌م و هه‌تا نوكه یا به‌رده‌وامم، هه‌روه‌سا بۆ ده‌مه‌كی ئه‌ز ل گولان تیڤی ژی بووم، به‌لێ كارێ راگه‌هاندنێ وه‌كو پیشه من كار نه‌كریه، به‌لكو وه‌كو حه‌زه‌ك من كاركریه، بۆ زانین من حه‌ز ژ هه‌موو به‌رنامێن خوه كریه و نوكه ژی من به‌رنامه‌ك ب ناڤێ (مالی شه‌هیدان) هه‌یه، بۆ زانین د چه‌ند سالێن بۆری دا گه‌له‌ك كه‌نالان داخواز ژمن كرینه كو ل گه‌ل وان كاربكه‌م لێ ئه‌ز رازی نه‌بووم، چنكو ده‌مێ ئه‌ز هاتیمه كوردستان تیڤی من بڕیارا هندی ئه‌ڤ كه‌ناله هه‌بیت ئه‌ز ژی دێ ل گه‌ل یا به‌رده‌وام بم، و سوپاس بۆ خێزانا من كو هه‌رده‌م پشته‌ڤانێن من بووینه و هه‌كه ئه‌و نه‌بان ره‌نگه ئه‌ز ژی نه‌دشیام هه‌تا نوكه یا به‌رده‌وام بم.
