هه‌یڤا بهێت رێنمایێن تاپۆكرنا خانیێن زێده‌گاڤی دێ هێنه ده‌ركرن
هه‌ولێر، قائید میرۆ:
بڕیاره هه‌یڤا بهێت رێنمایی بۆ تاپۆكرنا خانیێن زێده‌گاڤی بهێنه ده‌ركرن و بڕیارده‌رێ لژنا باژێڕڤانیان ژی ئاشكرا كر، نێزیكی 300 هزار كه‌س ژ قانوونا تاپۆكرنا خانیێن زێده‌گاڤی ل سه‌رانسه‌ری هه‌رێما كوردستانێ دێ مفادار بن.
نزار مه‌لا غه‌فار، بڕیارده‌رێ لژنا باژێڕڤانیان ل په‌رله‌مانێ كوردستانێ بۆ رۆژناما ئه‌ڤرۆ دیار كر، پشتی ژلایێ سه‌رۆكێ هه‌رێما كوردستانێ ڤه قانوونا تاپۆكرنا خانیێن زێده‌گاڤی هاتیه ئیمزاكرن و ل رۆژناما فه‌رمی هاتیه به‌لاڤكرن و گۆت: “بڕیاره د ده‌مێ 60 رۆژان دا رێنمایی بۆ تاپۆكرنا خانیێن زێده‌گاڤی بهێنه ده‌ركرن و بۆ ڤێ مه‌ره‌مێ ژی هه‌یڤا بهێت دێ وه‌زاره‌تا باژێڕڤانیان رێنمایێن چاوانیا تاپۆكرنا خانیێن زێده‌گاڤی به‌لاڤ كه‌ت”.
نزار مه‌لا غه‌فار گۆتژی: “قانوونا تاپۆكرنا خانیێن زێده‌گاڤی مفایه‌كێ زۆر بۆ وه‌لاتیێن هه‌ژار دێ هه‌بیت، ل سه‌رانسه‌ری هه‌رێما كوردستانێ 300 هزار كه‌س دێ ژێ مفادار بن، هه‌روه‌سا پشتی تاپۆكرنێ دووماهی ب دیارده‌یا خانیێن زێده‌گاڤی دێ هێت، چونكو ئه‌ڤه چه‌ندین ساله ئاریشا خانیێن زێده‌گاڤی ب هه‌لاویستی مایه و خه‌لكه‌كێ زۆر داخواز دكر بهێنه تاپۆكرن، داكو ئاریشه ب دووماهی بهێت”.
