هه‌یڤا داهاتی دێ مادێن خوارنا هه‌یڤانه هێنه زێده‌كرن
قائید میرۆ:
بڕیاره هه‌یڤا داهاتی چه‌ند ماده‌یه‌كێن خوارنێ ژلایێ بازرگانیا عیراقێ ڤه بۆ وه‌لاتیان بهێنه زێده‌كرن و رێڤه‌به‌رێ گشتیێ بازرگانی ژی ل وه‌زاره‌تا بازرگانیا هه‌رێمێ ئاشكرا كر، ئاڤا باجانسۆركان و فاسۆلی و نیسك و نۆك دێ هێنه زێده‌كرن.
نه‌وزاد كامل، رێڤه‌به‌رێ گشتیێ بازرگانی بۆ رۆژناما ئه‌ڤرۆ دیار كر، ل گوره‌ی بڕیارا وه‌زاره‌تا بازرگانیا عیراقێ ئاهێن خوارنێ یێن هه‌یڤانه دێ هێنه زێده‌كرن و بڕیاره ئاڤا باجانسۆركان و نۆك و نیسك و فاسۆلی بهێنه زێده‌كرن و هه‌یڤانه ل سه‌ر وه‌لاتیان بهێنه به‌لاڤكرن و گۆت: “هه‌یڤا داهاتی پرۆسا زێده‌كرنا ئاهێن خوارنێ دێ كه‌ڤیته د بیاڤێ بجه ئینانێ دا، ئه‌ڤه ژی هاریكاریه‌كا باشه بۆ وه‌لاتیان، چونكو وه‌لاتیان ژ به‌ر بلندبوونا بهایێ بازاڕی پێدڤی ب زێده‌كرنا مادێن خوارنێ هه‌یه”.
نه‌وزاد كامل خویا ژی كر، ل گوره‌ی پلانا حوكمه‌تێ و بازرگانیا عیراقێ هه‌یڤانه هه‌ر وه‌لاتیه‌ك دێ 400 غرامێن ئاڤا باجانان و ئێك كیلۆیا نیسك و نۆك و فاسۆلیان وه‌رگریت و گۆت: “ئه‌م چاڤه‌ڕێ دكه‌ین هه‌یڤا داهاتی ئه‌و مادێن هاتینه زێده‌كرن بگه‌هنه عمبارێن هه‌رێما كوردستانێ و ل سه‌ر بریكارێن ئاهێن خوارنێ بهێنه به‌لاڤكرن، بێگومان به‌لاڤكرنا ئه‌ڤان مادان ژی دێ كاریگه‌ری ل سه‌ر بازاڕی هه‌بیت”.
