هوشه‌نگ نێروه‌ی: ژ ده‌رحه‌قێ سترانا فولكلۆری ده‌رناكه‌ڤم
ئه‌ڤرۆ، هه‌رهین محه‌مه‌د:
سترانبێژێ گه‌نجێ كوچكو دیوانا هوشه‌نگ نێروه‌ی دیداره‌كێ دا بۆ به‌رپه‌رێ هونه‌ری یێ رۆژناما ئه‌ڤرۆ گۆت: دبه‌رنامێ من دایه بۆ هه‌یڤا ره‌مه‌زانا پیرۆز به‌رنامه‌كێ فولكلۆری پێشكێشكه‌م كو هه‌موو واران و عه‌شیرێن پارێزگه‌ها دهۆكێ ب خوه ڤه دگریت، به‌لێ چێكرنا كلیپان هه‌تا نوكه چو ده‌ستێ من دانینه و نوكه ڤه‌كۆلینێ ل سه‌ر سترانێن شاهی و گوڤه‌ندان دكه‌م بۆ دیاركرنا مێژوویا وان و ل ده‌مێن بهێت دێ وان سترانان نوو كه‌م.
نێروه‌ی گۆت ژی: ژ ده‌رحه‌قێ سترانا فولكلۆری ده‌رناكه‌ڤم، چونكو ئه‌و ستران داستان و سه‌رهاتی بووینه و بووینه ستران و هاتینه تۆماركرن وه‌كو ماف نه ئه‌ز و نه هونه‌رمه‌ندێن ده‌ڤه‌را به‌هدینان مافێ سترانا فولكلۆری ناده‌ینێ و هندی سترانا كوچكۆ دیوانا یه سترانبێژ نابێژیت دیوان بخوه دبێژیت و هه‌كه دیوانا خوه‌ش بیت و كه‌سێن دانعه‌مر د روونشتی بن و كه‌سێن د فولكلۆری و سترانێ ب گه‌هن دروونشتی بن و هه‌ر پاژبه‌نده‌كا سترانبێژ بێژیت ته‌ویك بهێن بێ مرۆڤی ستران دێ هێته گۆتن ستران یا خوه‌شه دیسان ژی ده‌مێ ل سه‌رێ چیایێن كوردستانێ بتنێ بم ل دوی ده‌می ژی ستران بۆ من یا خوه‌شه.
هه‌روه‌سا گۆت: ئه‌و ناما من ڤیایی و خزمه‌تێ بۆ دكه‌م هێشتا نه‌گه‌هشتیه، چونكو مه‌ره‌ما من ئه‌وه سترانا كه‌ڤن به‌رزه‌بووی نوی كه‌مه‌ڤه و ئێكه‌م سترانبێژ بوویمه سترانێن ب زه‌حمه‌ت یێن وان سترانبێژێن وه‌غه‌ركرین وه‌كو سترانێن متی خانێ نێروه‌ی و محه‌مه‌د پیرۆ و ئیسڤێ عه‌بو خورتا و ئه‌ڤ سترانبێژه قوتابخانه بوون و گه‌نج نه‌شیان بێژن و ئێكه‌م گه‌نج بووم من شیا بێژم و خوه لێ بكه‌مه خودان و بێژم و دیسان ڤه‌كۆلینێن من دبه‌رده‌وامن ل سه‌ر سترنێن شاهی و گوڤه‌ندا و من د گه‌له‌ك به‌رنامان دا ستران نوو كرینه ڤه و شیاینه هه‌تا 200 سترانێن كه‌ڤن نوو بكه‌م و خه‌لك و مفای ژێ بینت و نوكه گه‌له‌ك سترانبێژ ل شاهی و گوڤه‌ندان دبێژن.
