هونه‌رمه‌نده‌كێ كورد ل ئه‌لمانیا ب سترانه‌كا كۆمێدی ناڤداربوویه
هونه‌رمه‌ند مالك سامۆ، خه‌لكێ گه‌نده‌كێ بارزانه یێ سه‌ر ب باژێرێ حه‌سه‌كێڤه ل رۆژئاڤایێ كوردستانێ، ل سالا 2002 ێ، هاتیه وه‌لاتێ ئه‌لمانیا و نوكه ل وی وه‌لاتی دژیت، د دیداره‌كێ دا بۆ رۆژناما ئه‌ڤرۆ دیار كر: د ژییێ نه‌هـ سالیێ دا ئه‌ز هاتیمه وه‌لاتێ ئه‌لمانیا، پشتی چه‌ندین سالان من بۆ خوە ته‌مبۆره‌ك په‌یداكر و من ده‌ست ب كارێ هونه‌ری كر، مۆزیك د روحا من دابوو، من حه‌ز دكر، ئه‌ز خوە فێری ئامیرێ ته‌مبۆرێ بكه‌م و سترانان بێژم، ده‌مێ ئه‌م ل ئه‌لمانیا مه پاسپۆرت و ئیقامه نه‌بوون، ئه‌ڤێ چه‌ندێ ئاسته‌نگی بۆ مه چێكر، هه‌روه‌سا ب ستایلێ كوردی و ب زمانێ ئه‌لمانی من سترانه‌ك ل سه‌ر بێ ئیقامه‌یا خوە به‌لاڤكریه، من چیرۆكا خوە كره ستران، كو ئه‌ڤه چه‌ند ساله ئه‌ز چاڤه‌رێی هندێ مه و هێشتا من ئیقامه وه‌رنه‌گرتیه، ل وی ده‌می رۆژنامه و ته‌له‌ڤزیۆنێن ناڤدار یێن ئه‌لمانی دڤیان د دیدار و هه‌ڤپه‌یڤینان ل گه‌ل من بكه‌ن و من مێهڤان بكه‌نه چه‌ندین به‌رنامان، هونه‌رمه‌ندێن ئه‌لمانی ژی دڤیان هه‌ڤنیاسینێ ل گه‌ل من بكه‌ن و ڤێ سترانا من سه‌رنجا وان راكێشا و من ب ئاواز و ته‌مبۆرا كوردی په‌یڤێن ئه‌لمانی ستران گۆت و من ستایله‌كێ نوو ل ڤی وه‌لاتی چێكر و بوویه ترێند ل ئه‌لمانیا و وه‌لاتێن ئورۆپی ژی، ب رێیا وێ سترانێ خه‌لك من دنیاسن، هه‌روه‌سا ئه‌ز شیایمه هونه‌ر و كلتۆرێ كوردی بۆ خه‌لكێ جیهانی بده‌مه نیاسین، ب تایبه‌تی ژی بۆ جڤاكێ ئه‌لمانی، ده‌مێ ئه‌ز سترانان ب زمانێ ئه‌لمانی دبێژم، ب ره‌نگه‌كێ كۆمێدی دهێنه گۆهداریكرن، ئه‌ز دلێ گۆهدارێن خۆ خۆش دكه‌م.
ناڤهاتی گۆت ژی: سترانا ( كه‌یفا من تێ، سه‌برا من تێ) ب زمانێ كوردی من گۆتیه، ل سالا 2020 ێ،من به‌لاڤكریه، كو ئه‌و سترانه ژ په‌یڤ و ئاوازێن من بوون، هه‌روه‌سا ئه‌ز گرنگییێ ب موزیكێ و موزیكا فۆلكلۆریا كوردی دده‌م، ئه‌ز گه‌له‌ك تامێ ژ هونه‌ری وه‌ردرگرم، هه‌روه‌سا ئێك ژ به‌رهه‌مێن من یێن هه‌ره دیار، سترانه‌كا ب زمانێ ئه‌لمانییه، ده‌ه سالا ل ڤێرێ مه و ئیقامه نینه، من چیرۆكا خۆ ب ستران گۆتیه، داكو هه‌موو كه‌س ده‌رباره‌یی من بزانن، ئه‌ڤ سترانه وه‌كو پره‌كێیه بۆ په‌یوه‌ندیێ دناڤبه‌را كلتۆران دا، ئه‌ز چیرۆكا ژیان و ناسناما خۆ دگه‌هینمه خه‌لكی، ئه‌ز ب زمانێ ئه‌لمانی ژی سترانان دبێژم و ل سالا 2022 ێ، من ره‌گه‌زناما ئه‌لمانی وه‌رگرتیه.
ناڤهاتی ئه‌و ژی گۆت: ئارمانجا من یا سه‌ره‌كی ژ ڤی هونه‌ری ناساندنا كلتۆر و هونه‌رێ كوردییه بۆ گه‌لێ ئه‌لمانی، بۆ هندی ئه‌و ژی ببینن، هه‌روه‌سا ئه‌ڤ بزاڤه ب تنێ بۆ من نینه، به‌لكو بۆ نفشێ داهاتی ژی یه، من ئه‌ڤ چه‌نده بۆ رۆحا زارۆیێن خۆ دڤێت، ئه‌ز هیڤیدارم ب رێیا هونه‌رێ خۆ، زارۆیێن كورد ل ئه‌لمانیا په‌یوه‌ندی ب رهـ و ریشالین كلتۆری خۆڤه هه‌بن و فێری زمان و هونه‌رێ كوردی ببن، هه‌روه‌سا ل وی ده‌می ئه‌ز بێ ئیقامه، ژیانا من یا نه‌خۆش بوو و ئه‌ز یێ دووری كه‌سوكارێن خۆ بووم و من گه‌له‌ك زه‌حمه‌تی دیتینه، به‌لێ ئه‌ڤێ چه‌ندێ وه‌نه‌كر، كو ئه‌ز ده‌ستبه‌رداری هونه‌رێ خۆ ببم، ئه‌ز یێ به‌رده‌وامبووم ل سه‌ر هونه‌رێ خۆ، نوكه ئه‌ز یێ به‌رده‌وامم ل سه‌ر دروستكرنا كلیپان ب هه‌ردو زمانێن كوردی و ئه‌لمانی، ل گه‌ل هندێ ب ره‌نگه‌كێ به‌رده‌وام سترانان ب زمانێ ئه‌لمانی ژی دبێژم، ئه‌ز هیڤیدارم ب رێیا هونه‌رێ خۆ بشێم پره‌كا بهێز یا هونه‌ری دناڤبه‌را كلتۆرێ كوردی و ئه‌لمانی دا دروست بكه‌م.
ناڤهاتی گۆت ژی: من سترانا ( پرنسه‌سن) ب زمانێ ئه‌لمانی گۆتیه، په‌یڤێن وێ سترانێ یێن منن، هه‌روه‌سا هونه‌رمه‌ند شه‌ریف ئۆمه‌ری و هادی حه‌مود، هاریكاریا من كریه، ل گه‌ل هه‌لبه‌ستڤان نه‌ژده‌ت ده‌له‌ف، د كارێن من یێن هونه‌ری دا، دیسا ئه‌ز دێ سترانا خورفانی، كو سترانه‌كا فولكلۆره ئه‌ز دێ چێكه‌م و من لبه‌ره هنده‌ك سترانێن ئه‌لمانی ژی دروست بكه‌م و ئه‌ز دچمه ده‌وات و ئاهه‌نگێن كورد و ئه‌لمانیا و چه‌ندین نه‌ته‌وێن دیتر ل ئه‌لمانیا، دیسا داخوازیا من ئه‌وه، كو ئه‌ز ل هه‌رێما كوردستانێ بژیم و ئه‌م ژ مالباتا ده‌روێشێ عه‌بدینه.
