هونه‌رمه‌ندێن ده‌ڤه‌رێ ل مۆزه‌خانا وی دگه‌هنه ئێك
بارزان، ره‌مه‌زان زه‌كه‌ریا:
گه‌نجه‌كی ل گۆندێ (كانی بۆت) ل ده‌ڤه‌را بارزان مۆزه‌خانه‌یه‌ك بۆ پاراستنا فولكلۆری و ئنتیكان ڤه‌كریی و ئه‌ڤ مۆزه‌خانه بوویه جهێ دیتن و كۆمبوونێن هونه‌رمه‌ند و مۆزیكژه‌ن و هونه‌ر دوستان ل وێ ده‌ڤه‌رێ.
رێبه‌ر سه‌عدوللا بارزانی، خودانێ وێ مۆزه‌خانێ بۆ رۆژناما ئه‌ڤرۆ گۆت: ئه‌ڤه پتری ساله‌كێ یه ب هه‌ڤكاری ل گه‌ل كۆمه‌كا چالاكڤانێن ده‌ڤه‌رێ مه ئه‌ڤ مۆزه‌خانه ڤه‌كریه و دو جۆرێن كه‌ره‌ستان تێدا هاتینه پاراستن، كو هنده‌ك ژوان دیرۆكا وان بۆ به‌ری پتر ژ سه‌د سالان ڤه‌دگه‌ریت و هنده‌ك ژی كێمترن و پشتی ڤه‌كرنا ڤێ مۆزه‌خانێ رۆژانه و ب به‌رده‌وامی هونه‌رمه‌ندێن ده‌ڤه‌رێ و هنده‌ك جاران ژ ده‌ڤه‌رێن دی ژی و یێن بیانی ژی وه‌ك مۆزیكژه‌ن و سترانبێژ و شێوه‌كار سه‌ره‌دانا مۆزه‌خانێ دكه‌ن و ب سترانێن كوردی شه‌ڤبێری و رۆژێن خوه ده‌رباز دكه‌ن و سه‌فه‌ت كانی بۆتی بلۆلێ دژه‌نیت.
