هونه‌رێ شێوه‌كاری و په‌یكه‌رسازی د ئاسته‌كێ باش دایه
دهۆك، زنار تۆڤی:
په‌یكه‌رساز و شێوه‌كار (به‌شیر ناسری) كو خه‌لكێ ده‌ڤه‌را هه‌ورامانه ل رۆژهه‌لاتێ كوردستانێ و ده‌رچوویێ پشكا شێوه‌كاری یه ل زانكۆیا ته‌هرانێ و ئه‌ڤه چه‌ند ساله د وارێ هونه‌ری دا كار دكه‌ت، د دیداره‌كێ دا بۆ رۆژناما ئه‌ڤرۆ دیاركر كو هونه‌رێ په‌یكارسازیێ د قوناغا گه‌شه‌كرنێ دایه ب تایبه‌تی ل باژێرێن سنه و مهاباد و كرمانشانان ل رۆژهه‌لاتێ كوردستانێ و دناڤ خه‌لكێ دا وه‌كو كلتۆره‌كێ لێ هاتیه، دیسان ده‌مێ مرۆڤ دچیته باژێرێ سنه، به‌ری هه‌موو تشتان دێ چاڤێن مرۆڤی ب په‌یكه‌ران كه‌ڤن، ل هه‌ر جهه‌كێ په‌یكه‌ره‌ك هاتییه دانان، ب ڤێ رێكێ ئه‌م شیاینه هونه‌رمه‌ند و كه‌ساتێن كورد ب رێیا هونه‌رێ په‌یكه‌رسازیێ بده‌ینه نیاسین.
ناڤهاتی گۆت: كۆرۆنایێ كاریگه‌ریه‌كا خراب كریه سه‌ر ره‌وشا هونه‌ری ل رۆژهه‌لاتێ كوردستانێ، لێ هه‌ر مه به‌رده‌وامی دایه هونه‌رێ خوه، دیسان د ڤی ده‌مێ بۆری دا من چه‌ندین وركشۆپێن هونه‌ری ل سنه و بۆكان و ل چه‌ندین جهێن دی ڤه‌كرینه، مه‌ره‌م ژ ڤی كاره ئه‌و بوویه، كو خه‌لك و هونه‌ر نێزیكی ئێك بن و دیسان تێكهه‌لی دناڤبه‌را هونه‌رمه‌ندان و خه‌لكی دا پتر هه‌بیت، نوكه ژی ئه‌ز مژوولی چێكرنا په‌یكه‌رێ قاله‌مه‌ره مه، كو ئه‌و هونه‌رمه‌نده‌كێ‌َ ناڤدار بوویه ل بۆكان و ل ڤان نێزیكان دێ په‌یكه‌رێ وی هێته دانان، هه‌روه‌سا ب دیتنا من نوكه هونه‌رێ شێوه‌كاری و په‌یكه‌رسازی د ئاسته‌كێ باش دایه ل رۆژهه‌لاتێ كوردستانێ، هه‌تا نوكه هژماره‌كا مه‌زن یا كه‌ڤالان ژی چێكرینه و ناڤه‌رۆكا كه‌ڤالێن وی ل سه‌ر نه‌خۆشی و ئێش و ئازارێن كوردان بووینه ل هه‌ر چار پارچێن كوردستانێ و د هه‌مان ده‌مدا به‌حسێ ده‌رده‌سه‌ریێن كۆلبه‌ران ژی دكه‌ت ل رۆژهه‌لاتێ كوردستانێ، هه‌تا نوكه چه‌ندین پێشانگه‌هێن شێوه‌كاری ل سه‌ر ئاستێ رۆژهه‌لاتێ كوردستانێ و ل ده‌رڤه‌یی وه‌لاتی ژی ڤه‌كرینه.
