هونەرمەند (بەیتۆجان)ی وەغەرا دووماهیێ كر
بەیتۆجان، هونەرمەندێ كورد و خودانێ سترانا (ئاگر كەتیە دلێ من) دوهی رۆژا سێشەمبی 12/9/2023 ل نەخۆشخانەكا سوێد ژ ئەگەرێ نەخۆشیا پەنجەشێرێ وەغەرا دووماهیێ كر.
بەیتوللا گونەری، یێ بەرنیاس ب بەیتوجان ل سالا 1955 ل قەزا فارقینێ یا سەر ب پارێزگەها ئامەدێ ڤە ل باكوورێ كوردستانێ ژدایكببوو، دەمێ ژیێ وی هەشت سال خێزانا وی چوبوونە باژێرێ ئامەدێ و ل وێرێ ئاكنجی ببوون، هەر وەكو رووداو بەلاڤكری هونەرمەندێ ناڤهاتی ب سترانا (ئاگر كەتیە دلێ من) و (دیاربەكر مالا من) ناڤداریەك پەیداكر، خودانێ چار ئەلبۆمێن سترانان بوو بناڤێن (یان مرن یان دیاربەكر، تە نادەن من، 21ی ئادارێ، ئەتونا دلێ من)، هەمان هونەرمەند ئەلبۆما خوە یا ئێكێ بناڤێ (یان مرن یان دیاربەكر) ل سالا 1990 بەلاڤكر و پشتی بورینا سالەكێ ژ بەلاڤكرنا ئەلبۆمێ بەر ب ئورۆپا كۆچكر و ل سوێد ئاكنجی بوو، پشتی بوورینا 23 سالان ل الا 2014 سەرەدانا ئامەدێ كر و كۆنسێرتەك ل سەر ئاخا خوە گێرا، پشتی بورینا چار سالان هەڤڕكی ل گەل نەخۆشیا پەنجەشێرێ كری، بەیتۆجان ل باژێرێ ستۆكهۆلم و دوور ژ ئاخا خوە وەغەرا دووماهیێ كر.
