هونەرمەند د خەمسارن بەرانبەر ناسنامەیا نەتەوەیی
زنار تۆڤی:
مۆزیكژەن (كاروان محەمەد تەیفور) د دیدارەكێ دا بۆ رۆژنامەیا ئەڤرۆ گۆت: من پەیمانگەها هونەرێن جوان، پشكا مۆزیكێ ل هەولێرێ تەمام كریە، خەلكێ باژێرێ كەركووكێ مە و نوكە ل هەولێرێ دژیم، دەستپێكا كارێ من یێ هونەری ڤەدگەریتە ڤە بۆ سالا2007 ێ، ل سالا2008 ێ، من پشكداری د فەستیڤالا مۆزیكێ یا نێڤدەولەتی ل وەلاتێ نەمسا ل باژێرێ ڤییەنادا كرییە، د وێ فەستیڤالێ دا من پلا دویێ ب دەسڤە ئینا، كو ئەم ب ناڤێ هەرێما كوردستانێ د پشكداربووین و ناڤێ گرۆپێ مە سترینگ ئۆركێسترایا كوردستانێ بوو.
هەروەسا گۆت: ئەز دناڤ بنەمالەكا ئاینی دا پەروەدە بوویمە، باپیرێ من شەهید مەلا تەیفور مەلایەكێ ئاینی یێ ناڤدارێ كوردستانێ بوو، هەروەسا گەلەك هونەرمەند و دەنگخۆش دناڤ بنەمالا مەدا هەنە، هەر د زارۆكینی دا روحا من تیكەلی دونیایا مۆزیكێ بوویە و مۆزیك خوارنەكا روحیە بۆ من، ئەو ئامیرێ سەرەكی یێ ئەز دژەنم كەمانە، ئەز ئامیرێن عود و پیانۆیێ ژی دژەنم، هەروەسا د سەردەمێ من دا باشترین ئامیرە كەمان بوو، لەوما من ئەو ئامیرە هەلبژارت و ب دیتنا من ب گشتی د هەموو بیاڤان دا، موزیك بەرەف پێشڤەچوویە، بەلێ هونەرمەند د خەمسارن بەرامبەر ناسنامەیا نەتەوەیی، ئەو شیانێن مە هەین، مە نە خستینە خزمەتا فەرهەنگ و كلتۆرێ كوردی، هەروەسا دابرینەكا زۆر دناڤ پارچێن كوردستانێ دا، ئەڤە پشكەكا خەمساریا مەیە و پشكەك ژی بۆ حكومەتێ یە، چونكی چ پلان بۆ فەرهەنگ و هونەری نینن، ئەڤە سێ سالن من ستۆدیۆیەك ب ناڤێ كاروان مۆزیك ڤەكریە و هەتا نوكە من سێ كلیپە مۆزیك هەنە، نوكە مژوولی تۆماركرنا هژمارەكا ستراناینە بۆ هەر چار پارچێن كوردستانێ، ب دیالیكتێن، كرمانجی و زازاكی و هەورامی، ئەڤە دێ بیتە كارەكێ دیرۆكی یێ مەزن دناڤا سترانێن كوردی دا، موزیكژەنێن هەر چار پارچەێن كوردستانێ تێدا پشكدارن، كو گەشتەكە د ناڤا ئاوازێن رەسەن یێن كوردستانێ و دێ نێزیكی 15 خۆلەكان بیت.
