هونەرمەند عادل حاجی خزمەتەکا مەزن یا هونەری ل پشت خوە هێلایە
زاخۆ، دلۆڤان هالۆ:
حەسەن فەقە، مامێ هونەرمەند و مۆزیکژەنێ خودێ ژێ رازی یێ ئیدارا سەربخوە یا زاخۆ عادل حاجی د دیدارەکا هونەری دا بۆ رۆژناما ئەڤرۆ دیارکر کو هونەرمەندێ خودێ ژێ رازی عادل حاجی ل سالا ١٩٦٨ ژ دایك ببوو، ل ژیێ زاڕۆکینیێ حەز ژ هونەری و مۆزیکێ دکر و شارەزایەکا باش د نیگارکێشانێ ژی دا هەبوو، ماموستایێ وانا هونەری بوو و موزیکژەنەکێ گەلەك زیرەك بوو ب تایبەت ئامیرێ ئۆرگێ دژەنی، هەروەسا خۆدانێ ستودیوا هونەری یا تۆمارکرنا ستران بوو ل زاخۆ، ستران بۆ گەلەك هونەرمەندێن زاخۆ و ژ دەرڤەی زاخۆ تۆمارکرینە و ئامیرێ ئۆرگێ بۆ گەلەك هونەرمەندان ژەنییە، خزمەتەکا مەزن یا هونەری ل پشت خوە هێلا و ناڤێ خوە د دیرۆکا هونەرێ زاخۆ دا تۆمارکر.
ناڤهاتی ئاماژە ب وێ چەندێ ژی کر کو هونەرمەند عادل حاجی کەسەکێ گەلەك ئارام بوو و نێزیکی هەموو کەسان بوو، بەردەوام ستودیویا وی تژی بوو ژ مێهڤانان، چونکی مرۆڤ ژ دیوانا وی تێر نە دبوو.
سترانبێژێ گەنج ڕەیان زاخۆیی دەربارەی هونەرمەندێ خودێ ژێ ڕازی گۆت:»هونەرمەند عادل حاجی ئێك ژ هاریکار و پشتەڤانێ من یێ سەرەکی بوو، وی پالپشتیا من کر کو ئەز بهێمە دناڤ قادا هونەری و سترانێ دا، ل قوتابخانا پەرتوویێ هەکاری مامۆستایێ وانا مە یا هونەری بوو، پشتی من ل قوتابخانێ ستران گۆتین کەیفا وی گەلەك ب من هات و حەز ژ دەنگێ من کر، لەوما گۆتە من دڤێت دەنگێ تە نەمینیتە ڤەشارتی و بهێتە پێش، پشتی هینگێ من د لایڤەکێ وی دا ستران گۆت و خەلکێ گەلەك حەز ژێ کر و پشتی هینگێ من بەردەوام ل ستۆدیوا وی یا هونەری ستران دگۆتن و بۆ من چەندین ستران تۆمارکرن، و ئەز گەلەك ئینامە پێش، خزمەتا وی پێشکێشی من و هونەرمەندان کری چ جاران ناهێتە ژبیرکرن، و دێ هەر مینیتە د دلێ مە و هزرا مە دا.
سالم عەرەب هەڤالەکێ نێزیکی هونەرمەندێ خودێ ژێ رازی گۆت:» ل دەستپێکا سالێن هەشتیان من و هونەرمەند عادل حاجی ل تاخێ حسێنیکێ ل زاخۆ ئێكدوو نیاسی و بووینە هەڤالێن ئێك، مە گەلەك ڕۆژێن خوەش و نەخوەش پێکڤە بوراندینە و گەلەك بیرهاتنێن جوان لگەل ئێك هەنە، هەتا کو چوویە بەر دلۆڤانیا خودێ ژی ئەم ل گەل ئێك بوون، ل هەموو دەرکەفتن و گەشت و سەیرانان ئەم ل گەل ئێك بووین، عادل مرۆڤەکێ دل نازك و ب وەفا بوو، من چ جاران نەخوەشی ژێ نەدیتینە، هەموو سالۆخەتێن باش ل دەف هەبوون، چ جاران ژ کەسەکێ سل نەبوویە، چ جاران ئەز پێ نە حەسیامە کو دلێ ئێکێ هێلا بیت».
هونەرمەند عادل حاجی مۆزیکژەنەکێ ناڤدارێ ئیدارا سەربخوە یا زاخۆ بوو، خزمەتا مەزن و بەرچاڤ پێشکێشی هونەرمەندان کرییە، ب مخابنی ڤە ل سالا دەرباز بوویی ل ئێڤاریا ڕۆژا ئێکشەمبێ ل ڕێکەفتی 18/3/2024 ل ستۆدیوا خوە یا هونەری ژ ئەگەرێ جەلتا دلی گیانێ خوە ژ دەستدا و چوو بەر دلۆڤانیا خودێ.
