هونەرمەند نەشێن ژیانا خوە دابین بكەن
سولین سلێمان:
ئەكتەرێ كۆمێدی (ئەیام ئەكرەم) كو ب (شەمۆ) یێ بەرنیاسە، د دیدارەكێ دا بۆ رۆژنامەیا ئەڤرۆ دیاركر كو ل ئەو ل سالا 1964 ل خانەقا ل هەولێرێ ژدایكبوویە و هەتا نوكە ل وێرێ دژیت و حەزژێكرنا وی بۆ كارێ هونەری بۆ ژیەكێ بچووك دزڤڕیت.
شەمۆی، گۆت: ل سالێن هەشتێیان من دەست ب كارێ هونەری كریە و ل 1988 من پەیمانگەها هونەرێن جوان ل مووسل ب دووماهی ئینایە، هەتا نوكە وەك ئەكتەر من پشكداری د هژمارەكا زۆرا فلم و دراما و شانۆگەریان دا كریە، ژوانا شانۆگەریا (كەوەكانی قەرەچۆخ) ل سالا 1993 كو ئێك ژ كارێن من یێ سەركەفتی بوو، هەروەسا من پشكداری د چەند خەلەكەیێن بەرنامەیێ كۆمێدی (بەزمی بەزم) ژی دا كریە و ئەو كارە ژی بۆ من گەلەك دخۆش بوون، ئانكو دشێم بێژم من پشكداری د (30) شانۆگەری و (3) فلمێن سینەمایی و (10) درامایان دا كریە و هەموو بۆ من دخۆش بوون، چنكو هەر ئێكی بینەرێن خوە یێن تایبەت هەبوون، لێ مخابن هەتا نوكە هونەرمەند نەشێن ب كارێن هونەری ژیانا خوە دابین بكەن.
