هونەرێ شێوەکاری ل دەف من مەرەق و داهێنانە
دلۆڤان هالۆ:
هونه‌رمه‌ندێ شێوه‌كار یێ باژێڕێ زاخۆ كەلحی نعمەت سلێڤانەی د دیدارەکێ دا بۆ ڕۆژناما ئەڤرۆ دیار کر کو ل ده‌مێ ئه‌ز قوتابی ل پۆلا شەشێ سه‌ره‌تایی حه‌زا هونه‌رێ شێوەکاری ل ده‌ڤ من په‌یدا بوو، من ڕۆژانه کەڤال د نه‌خشاندن و ل سه‌ر دیوارێن ئاڤاهیێ مالێ ژی وێنه د کێشان و خوەشیه‌كا بێ سنوور من ژێ وه‌ردگرت، مالبات و ماموستایێن من ژی پشته‌ڤانیا من دكرن و ده‌ست خوەشی ل من د هاته كرن كو ئه‌ز به‌رده‌وام بم ل سه‌ر ڤێ بزاڤێ، ل دانێ ئێڤاریان ژی من سه‌ره‌دانا نڤیسینگه‌ها شێوه‌كارێ مه‌زن سەباح جزراوی دكر ل زاخۆ، من ژ نێزیك ڤە ته‌ماشه‌یی کەڤالێن وی دكرن و سەرنجا من ڕاکێشا و ڕاسته‌وخۆ كارتێكرن ل سه‌ر هزر و بیرێن من كرن، ژبەر هندێ من گه‌له‌ك حه‌ز ژ هونه‌رێ شێوه‌كاری كر، سەباح جزراوی پالپشتیا من دكر كو ئەز به‌رده‌وام کەڤالان دورست بکەم دا کو ب باشترین شێوە فێر ببم و ب ڤی جۆرە هونەری خزمه‌تا مللەتێ خوە بكەم.
شێوەکارێ ناڤهاتی، ئاماژە ب وێ چەندێ ژی کر کو هونه‌رێ شێوه‌كاری ل دەڤ من مه‌ره‌ق و داهێنانه، چونكی ب ڕێكا بكارئینانا ڕه‌نگ و فلچێن خوە كه‌ڤالێن ساده و سپی یێن سه‌ر كانفانسی و پارچه په‌ڕۆكی و ئێش و ژان و خوەشی و نه‌خوەشی و جوانیێن كوردستانێ پێ د نه‌خشینم، ئه‌ڤ جۆرە هونه‌رە یێ بوویه ئێك ژ ڕێكێن هزر و بیر و حه‌ز ژێكرن و دان و ستاندنا مرۆڤی د ژیانێ دا، بوویە په‌رتوكه‌كا سرۆشتی یا مه‌زن و هه‌ر كه‌سه‌ك ژ مه دشێت ب هه‌ست و وژدانا خوە بخوینیت، ل ده‌مێ مه‌ره‌قا مرۆڤی دگه‌هیتە گۆپیتكا خوەشیان داهێنان سه‌ر هەلددەت و كارێن جوان دهێنه دروست کرن.
کەلحی ئاشکرا ژی کر کو من پتری400 کەڤالێن ڕه‌نگێن زه‌یتی هه‌نه کو ده‌ربڕینێ ژ گەلەك بابەتان دکەن وەکو دیمه‌نێن سرۆشتێ كوردستانێ و كه‌توارێ ملله‌تێ مه و ئێش و ژان و خوەشی و نه‌خوەشی و تڕاژیدی و كاره‌سات و قاره‌مانیا پێشمه‌رگه‌یان و خوینا شه‌هیدان دکەن، من هیڤی و ئومێد ژ بۆ ژیانه‌كا سه‌رفەراز و ڕۆناهی دگه‌ل ڕه‌نگان تێكەل کرینه دا كو په‌یاما هونه‌ری تێدا دیار ببیت، من ب شێوه‌یه‌كێ ئاشۆپی د جیهانەکا بێ ده‌نگ دا خه‌ونێن خوە كرینه کەڤال.
گۆت ژی:»جڤاكێ مه ڕێزێ ل بزاڤێن هونه‌ری ناگرن و پشته‌ڤانیێ لێ ناكەن، چ بهایی نا دەنە کەڤالێن هونه‌رمه‌ندێن خوە و هاریكاریا وان ژی ناكەن كو ب شێوه‌یه‌كێ باش كارێ وان بهێتە به‌رچاڤ كرن، ئه‌ڤه دبیتە ئێك ژ ئاسته‌نگان كو شێوه‌كار خۆ دویری بزاڤا هونه‌ری بكەت چونكی دبینیت چ مفا تێدا نینه، كار ل ده‌ڤ وی ب زه‌حمه‌ت دكه‌ڤیت و نه‌شێت وه‌كو پێتڤی بزاڤا خوە یا هونەری خورت تر بكەت و خزمه‌تا خه‌لكێ خوە بكەت به‌لكو دێ بیتە ئه‌گه‌رێ دویركه‌ڤتنێ ژ هونه‌ری، شێوه‌كار ژی بۆ دەمێ چه‌ندین سالان نه‌شێت بزاڤان بکەت ژ بۆ دروست کرنا کەڤالان بۆ پێشانگه‌هه‌كا خوە یا تایبه‌ت یا کەسایەتی، ژ به‌ر نه‌بوونا هاریكاریێن مادی و مه‌عنه‌وی».
زێدەتر ژی گوت:»شێوه‌كارێ سه‌ركه‌ڤتی ئه‌وه یێ كو به‌رده‌وام بزاڤێن خوە بۆ خه‌لك و حه‌ز ژێكه‌رێن شێوه‌كاری به‌رچاڤ بكەت، یێ بەردەوام بیت ل سه‌ر دروست کرنا کەڤالان و هه‌ر خوە نێزیكی ڕه‌نگان بكەت، د جیهانا هونه‌ری دا بژیت و ب دلسۆزی خزمه‌تا هونه‌رێ وه‌لاتێ خوە بكەت، دڤێت كه‌سەکێ نۆرمال و جڤاكی بیت و دگه‌ل خێزان و هه‌ڤالێن خوە ژی بێهن فرەهـ بیت، له‌زێ د كارێن خوە دا نەكەت و ڕازی بیت ل سه‌ر ڕه‌خنا ئاڤاكه‌ر و خوە مه‌زن نەکەت، هه‌ر خوە ب هژمێریت خزمه‌تكارێ مللەت و وه‌لاتێ خوە، شانازیێ ب كار و کەڤالێن خوە بکەت، کەیف خوەش ببیت ب پشكداری كرنا شێوه‌كاران د پێشانگه‌هێن هه‌ڤپشك دا».
