هونەرێ نوی نەوێنەکرنا ڕاستیێ یە، بەلکو دەربڕینا هەستێن مە یە بەرانبەر جیهانێ

هیڤی کەریم:

دانەر سەگڤان سەدیق، کورێ باژێڕێ دهۆکێ یە هەمی ژیانا خوە د ناڤ جیهانا ڕەنگ و فۆرمان دا دەرباز کریە، دبێژیت؛ هونەر ل دەف من نە بتنێ خولیایەک یان کارەکێ ڕۆژانەیە، بەلکو بەشەکێ بنەڕەتی یێ هەست و دەروونێ هەر مرۆڤەکی یە. پشتی کو من باوەرناما دبلۆمێ ل پەیمانگەها هونەرێن جوان ب دەست ڤە ئینای، من بڕیار دا کو پتر د ناڤ ڤێ دەریایێ دا بچمە خار، لەوما من ل کۆلیژا زانستێن مرۆڤایەتی پشکا هونەرێ شێوەکاری ب دەستڤەئینانا باوەرناما بەکالۆریۆس ب دوماهی ئینا. نوکە ژی وەک مامۆستایێ هونەرێ ل قوتابخانا «ئایندە ٢»، بزاڤێ دکەم ڤێ پەیام و فەلسەفەیێ بگەهینمە نەوەیێن پاشەڕۆژێ.
​دانەری زێدەتر بۆ رۆژناما ئەڤرو گۆت؛ هەکە ئەم بەحسێ فەلسەفەیا هونەرێ نوی بکەین، پرسیار ئەوە: ئەم ژ کیڤە هاتین و بەر ب کیڤە دچین؟ هونەرێ کلاسیک هەردەم هەول ددا جیهانێ وەک خۆ نیشان بدەت، وەک ئاوێنەیەکێ. بەلێ هونەرێ نوی ب دروستی دبێژیت: «گرنگ نینە من چ وێنە کریە، گرنگ ئەوە من چەوا هەست پێ کریە». ئەز د کارێن خوە دا کار ل سەر سێ ڕەهەندێن سەرەکی دکەم:
​١. شکاندنا ڕەهەندێ بینینێ:
ئەز وەک هونەرمەند، ئێدی کۆپیەکا ڕاستیێ پێشکێش ناکەم. وەک چەوا «سێزان» هەول ددا جیهانێ د ناڤ فۆرمێن ئەندازیاری دا ببینیت، ئەز ژی باوەر دکەم کو ڕاستی تشتەکێ جێگیر نینە، بەلکو هەر بینەرەک ب شێوازەکێ جودا دبینیت.
​٢. سەربەخۆیا ئامرازی:
پێشتر کەڤال تنێ وەک «پەنجەرەیەکێ» بوو بۆ دیتنا جیهانەکا دی، بەلێ فەلسەفەیا من ئەوە کو تابلو ب خۆ ڕووبەرەکێ تەختە کو ڕەنگ ل سەر دهێنە دانان. ل ڤێرێ تەکنیکا فرچەی و دەربڕینا ڕەنگی ب خۆ دبنە ئامانج، نە تنێ گێڕانا چیرۆکەکێ.
​٣. تاقیکرنا بەردەوام:
هونەرێ نوی ل سەر نویخوازیا بەردەوام ئاڤا بوویە. ئەز وەک شێوەکارەک، خۆ ب یاسایێن ئەکادیمی یێن کۆڤن گرێ نادەم. بۆ نموونە، دەما مرۆڤ تەماشەی زنجیرە تابلوێن «چیایێ سانت ڤیکتوار» یێن سێزانی دکەت، چیا وەک خۆ نابینیت، بەلکو کۆمەکا پەڵە ڕەنگان دەردکەڤن. ئەڤە ب دروستی فەلسەفەیا منە؛ من دڤێت پێکئینانا ناڤخۆیا سروشتی نیشان بدەم، نەکو تنێ ڕووکارێ دەرڤە. ئەز هەول ددەم «هەستا چیای» ب ڕێیا ڕەنگێن توند و فۆرمێن بهێز بگەهینمە بینەری.
​هونەر ل دەڤ من ژیانا هەست و نەستێن مرۆڤی یە کو ل سەر ڕووبەرێ تابلۆیێ دهێنە نه‌خشاندن.

کۆمێنتا تە