هونەر بۆ من دەریایەكا زانستی و تێگەهشتنێ یە
دەمهات دێركی:
هونەرمەندێ كوردێ رۆژئاڤایێ كوردستانێ دلۆ دۆخان كو نوكە ل وەلاتێ ئەلمانیا دژیت د دیدارەكێ دا بۆ بەرپەرێ هونەری یێ رۆژناما ئەڤرۆ دیار كر كو وی ب فێربوونا ئامیرێ تەمبوورێ دەست ب كارێ سترانگۆتنێ كریە و هەتا نوكە چەندین ئەلبۆم بناڤێ رەبەنێ، دلدارو، هەستێن دووریێ هەنە كوو بەرهەمێ خوە یێ ئێكێ ل سالا 2004ێ بەلاڤكربوو و گۆت: “ئەز ئێك ژ وان كەسان بووم ل دەمەكێ زوو شیام ستایلەكێ جودا د ناڤ جیهانا مۆزیكێ دا ب ئافرینم، جوداهیا من دگەل گەلەك هونەرمەندان ئەوە كو من د بەرهەمێن خوە یێن دەستپێكێ دا ناڤەك بۆ خوە د ناڤ خەلكی دا چێكر”.
ناڤهاتی ئاماژە دا وێ چەندێ كو هونەر بۆ وی دەریایەكە ژ زانستی و تێگەهشتنێ و ژ وژدان و هەست و راستیا مرۆڤان و گۆت: “ئەو پەیڤ و ئاوازێن ئەز د سترانێن خوە دا بكاردئینم حەزدكەم كارتێكرنێ ل من و جڤاكی بكەن”.
ل دووماهیێ دلۆ دۆخانی خویا كر كو هەر هونەرمەندەكێ رامانا ناما هونەری ب دروستاهی بزانیت و ژ دابونەریتێن جڤاكێ خوە دوور نەكەڤیت دێ شێت ب شێوەیەكێ گەلەك باش ناما خوە گەهینیت و ل وی دەمی دێ گوهدار و حەزژێكەرێن خوە هەبن.
