هژماره‌كا زۆرا كه‌ڤالێن من بۆ دیزاینكرنا به‌رگێن پرتووكێن ئه‌ده‌بی و هونه‌ری ل سه‌رانسه‌ری جیهانێ هاتینه هه‌لبژارتن
خانما شێوه‌كار، شرین باران، ل باژێرێ قامیشلۆ ل رۆژئاڤایێ كوردستانێ ژ دایكبوویه، ل قوتابخانێن وی باژێری خواندنا سه‌ره‌تایی و ناڤنجی خواندیه، د دیداره‌كێ دا بۆ رۆژناما ئه‌ڤرۆ دیاركر: من كه‌ڤالێ خوە یێ ئێكێ ژ زه‌یتێ، د ژیێ دووازده سالیێ دا چێكریه، پاشی ئه‌ز ل گه‌ل خێزانا خوە چوویمه دیمه‌شقێ و من خواندنا خوە ل ئاماده‌یێن دیمه‌شقێ ته‌مامكریه، من باوه‌رناما بازرگانی ل په‌یمانگه‌ها بازرگانی بده‌ستڤه ئینایه، پاشی من خواندنا خوە یا هونه‌ری ل په‌یمانگه‌ها هۆنه‌رین جوان ل ئه‌دهه‌م ئیسماعیلی ل دیمه‌شقێ ته‌مامكریه، هه‌روه‌سا من پشكداری د چه‌ندین پیشانگه‌هێن شێوه‌كاری یێن گشتی و تاكه‌كه‌سی دا كرییه، دیسان ل فرۆشگه‌ها خۆ ل باژێرێ كه‌ڤن یێ دیمه‌شقێ من چه‌ندین كه‌ڤالێن خوە فرۆتینه.
ناڤهاتیێ گۆت ژی: من كارێ چێكرنا وێنه و كه‌ڤالان ل سه‌ر دیوارێن ئاڤاهیان ل ده‌ڤه‌رێن دیماس ل گوندێن دیمه‌شقا پایته‌ختێ سوریێ كرییه، د وۆركشۆپه‌كێ دا بۆ دروستكرنا پێكهاتێن په‌یكه‌رسازیێ ل پاركه‌كێ ل گوندێن دیمه‌شقێ من كار كریه، ل گه‌ل هندێ ژی من كارێ په‌یكه‌رسازیێ ل چه‌ندین جهێن سوریێ و جیهانی ئه‌نجامداینه، دیسان ل ناڤا كۆمپانیه‌كا تایبه‌ت بۆ به‌رهه‌مئینانا فلمێن كارتۆنی (ئه‌نیمه‌یشن) ژی من پشكداریكریه.
شرینێ ئه‌و ژی دیار كر: ئه‌ز بوویمه رێڤه‌به‌را پشكا دیزاینێ ل كارگه‌هه‌كا دروستكرنا سیرامیك فاینس، هه‌ر ژ قووناغا وێنه‌كێشانێ هه‌تا قووناغا حه‌لاندنێ و شیوه‌دانانێ د فرنێدا، ل سالا 2010 ێ، ئه‌ز چوویمه وه‌لاتێ ئه‌مریكا و من گه‌له‌رییا خۆ یا تایبه‌ت ل وێرێ ڤه‌كریه، ل سالا 2012 ێ، ل ئه‌لمانیا خۆجه بوویمه، ل سالا 2013 ێ، ڤه‌گه‌ریایمه فره‌نسا، ل سێ رێكخراوان من كار كریه بۆ پشته‌ڤانیا هونه‌رێ جوان و مۆزیكێ، هه‌روه‌سا من كۆمپانیه‌كا تایبه‌ت ڤه‌كریه بۆ نووژه‌نكرنا كه‌ڤالێن نێڤده‌وله‌تی و سه‌خبێركرنا كه‌لوپه‌لێن كه‌ڤن یێن فره‌نسی، وه‌كو مامۆستا د بیاڤێ وینه‌كێشانێ دناڤا رێكخراوێن مرۆڤی، ل قوتابخانێن فره‌نسی من كار كریه، ل گه‌ل هندێ من پشكداری كریه ل پێشانگه‌ه و مۆزه‌خانین ئیتالیا و به‌رازیل و ئه‌لمانیا و لۆكسمبۆرگ و ئه‌مریكا و هندستانێ.
هێشتا دبێژیت: من باوه‌رنامێن رێزلینانێ ل چه‌ندین سازی و رێكخراوان ل سه‌رانسه‌ری جیهانێ وه‌رگرتینه، د چێكرنا كه‌ڤالان ل سه‌ر بابه‌تێن كوردی ناسناڤێ «كچا رۆژێ» وه‌رگرتیه، هه‌روه‌سا ل چه‌ندین وه‌لات و وه‌زاره‌ت و بالیۆزخانان كه‌ڤالێن من هاتینه دانان، ل گه‌ل هندێ ده‌زگه‌هێن راگه‌هاندنێ یێن كوردی، ژ وان ژی رادیۆ، ته‌له‌ڤزیۆن و رۆژنامه‌یان، چه‌ندین دیدار ل گه‌ل من ئه‌نجامداینه، دیسان رۆژنامه و گۆڤارێن نێڤده‌وله‌تی ژی چه‌ندین چاڤپێكه‌ڤتن و بابه‌ت ده‌رباره‌یی ئه‌زموونا من یا هونه‌ری به‌لاڤكرینه، هه‌روه‌سا ئه‌ز وه‌كو بالیۆزا فه‌خری یا ره‌وشه‌نبیری و هونه‌ری دناڤبه‌را فره‌نسا و ئه‌رجه‌نتینێ دا هاتیمه ده‌ستنیشانكرن، ل سه‌ر كاندیدكرنا من ل رێكخراوا ئاشتیخوازێن نێڤده‌وله‌تی ریال ئیزار لاباز، ل سالا 2022 ێ.
ل دووماهییێ گۆت ژی: هژماره‌كا زۆرا كه‌ڤالێن من بۆ دیزاینكرنا به‌رگێن پرتووكێن ئه‌ده‌بی و هونه‌ری ل سه‌رانسه‌ری جیهانێ دا هاتینه هه‌لبژارتن، دیسان من ده‌نگه‌كێ خۆش هه‌یه، پێشتر من ستران ب چه‌ندین زمانان گۆتینه، من شاره‌زایی د ژه‌نینا ئامیرێ سازێ دا هه‌یه، ل گه‌ل هندێ من شاره‌زایی د زمانێن عه‌ره‌بی و فره‌نسی و ئینگلیزی دا هه‌یه و ب وان زمانان ژی د ئاخڤم.
