هژماره‌كا پرۆژێن گرنگێن خزمه‌تگۆزاری ل قه‌زا زاخۆ دهێنه ئه‌نجامدان
ئه‌ڤرۆ:
ب مه‌ره‌ما دووڤچوونا پرۆژێن خزمه‌تگۆزاری ئه‌وێن ل سنوورێ قه‌زا زاخۆ دهێنه ئه‌نجامدان، دوهی 12/4/2021 د. عه‌لی ته‌ته‌ر، پارێزگارێ دهۆكێ سه‌ره‌دانا وێ قه‌زایێ كر و ب به‌رهه‌ڤبوونا هژماره‌كا به‌رپرسێن حكومی و حزبی ل زاخۆ، سایدێ راستێ ژ رێكا نێڤده‌وله‌تی یا ئیبراهیم خه‌لیل بۆ زاخۆ هاته ڤه‌كرن، كو ل سه‌ر بودجا حكومه‌تا هه‌رێما كوردستانێ ب كۆژمێ هه‌شت ملیار دیناران هاتیه ئه‌نجامدان.
ل به‌راهیێ قایمقامێ قه‌زا زاخۆ ب وه‌كاله‌ت گرنگیا وان پرۆژان دیار كر یێن نوكه ل سنوورێ قه‌زایێ دهێنه ئه‌نجامدان و بناڤێ خه‌لكێ زاخۆ سوپاسیا سه‌رۆكێ حوكمه‌تا هه‌رێما كوردستانێ و پارێزگارێ دهۆكێ و هه‌موو لایه‌نان كر كو گرنگیێ دده‌نه ده‌ڤه‌را زاخۆ. ژ لایه‌كێ دیڤه ئه‌ندازیار ئاراس جه‌مال رۆهنكرن دانه سه‌ر پرۆژێ سایدێ راستێ ژ رێكا نێڤده‌وله‌تی یا ئیبراهیم خه‌لیل بۆ زاخۆ ب درێژاهیا (8,5)كم كو د ده‌مێ (60) رۆژان دا ژلایێ كۆمپانیا كاڤین گروپ هاتیه ئه‌نجامدان. د. عه‌لی ته‌ته‌ر، پارێزگارێ دهۆكێ د رێوره‌سمێن ڤه‌كرنا پرۆژه‌ی دا په‌یڤه‌ك پێشكێش كر و گۆت: “پشتی مسرور بارزانی، سه‌رۆكێ حكومه‌تا كوردستانێ سه‌ره‌دانا زاخۆ كری، بڕیار دابوو چه‌ندین پرۆژێن مه‌زن و خزمه‌تگۆزاری ل ده‌ڤه‌رێ بهێنه ئه‌نجامدان، پرۆژێ سایدێ راستێ ژ رێكا نێڤده‌وله‌تی یا ئیبراهیم خه‌لیل بۆ زاخۆ ئێكه ژ 12 پرۆژێن مه‌زن، نوكه ئه‌ڤ پرۆژه ب دووماهی هات و كه‌فته د خزمه‌تا خه‌لكێ زاخۆ و پارێزگه‌ها دهۆكێ و هه‌رێما كوردستانێ و عیراقێ دا”.
پارێزگه‌رێ دهۆكێ خویا ژی كر، ژبلی وان پرۆژێن مه‌زن 32 پرۆژێن دی یێن خزمه‌تگۆزاری ل سنوورێ قه‌زا زاخۆ هه‌بووینه، 28 ژ وان ب دووماهی هاتینه و كه‌فتینه د خزمه‌تا وه‌لاتیان دا و گۆت: “ئه‌م بناڤێ سه‌رۆكێ حكومه‌تا كوردستانێ و پارێزگه‌ها دهۆكێ پیرۆزباهیا خه‌لكێ زاخۆ و كوردستانێ و عیراقێ دكه‌ین بۆ ڤه‌كرنا ڤێ رێكا گرنگ، هه‌روه‌سا سوپاسیا فه‌رمانگه‌هێن میری و كۆمپانیا كاڤین گروپ دكه‌ین كو پرۆژه بله‌ز و ب كوالێتیه‌كا بلند بجه ئینایه.
دیسا ب هه‌لكه‌فتا هاتنا هه‌یڤا ره‌مه‌زانێ، پارێزگارێ دهۆكێ پیرۆزباهیا بسلمانێن هه‌رێمێ و عیراقێ و هه‌موو جیهانێ كر و خواست كو هه‌یڤا ره‌مه‌زانێ ببیته هه‌یڤا خێر و به‌ره‌كه‌ت و ئه‌رزانیێ و هاریكاریكرنا ته‌خا هه‌ژار و كێم ده‌رامه‌تان و ته‌كه‌زی ل سه‌ر بجهئینانا رێنمایێن خوه‌پارێزیێ ژ ڤایرۆسێ كۆرۆنایێ ژی كر.
