هژماره‌كا گه‌نجێن دهۆكێ خه‌لاتێ روانگه ب ده‌ستڤه‌ئینا
ئه‌ڤرۆ، ره‌مه‌زان زه‌كه‌ریا و دلڤین ره‌شید:
ئه‌ڤ ساله هژماره‌كا گه‌نجێن سنۆرێ پارێزگه‌ها دهۆكێ ل سه‌ر ئاستێ كوردستانێ و ئیراقێ د بۆارێن جودا دا شیان خه‌لاتێن ده‌زگه‌هێ روانگه بۆ سالا 2022 ب ده‌ستڤه‌بینن.
بلند مه‌هدی، بۆ رۆژناما ئه‌ڤرۆ گۆت: ئه‌ز شیام رێزا ئێكێ ل سه‌ر ئاستێ كوردستانێ و ئیراقێ دبۆارێ مۆزیكێ ب ده‌ستڤه‌بینم كو ژه‌نینا مۆزیكا تاك ژه‌نی بوو، ئه‌ز ئامێرێ قانونێ دژه‌نم، دو مامۆستایێن من پشته‌ڤانێن من بوونه هه‌تا گه‌هشتیمه ڤی ئاستی ئه‌و ژی (بێكه‌س نوری عه‌بدال و بێوار محه‌مه‌د) بوون.
رۆژ مسته‌فا، بۆ رۆژناما ئه‌ڤرۆ گۆت: من ب هه‌له‌سته‌كێ پشكداری كربوو، شیام رێزا دویێ ب ده‌ستڤه بینم، خێزانا من و مامۆستایێن من گه‌له‌ك پشته‌ڤانێن من بوون، ده‌مه‌كه هه‌لبه‌ستان دنڤیسم به‌لێ هه‌تا نوكه من چو پرتووك چاپ نه‌كرینه، چنكو نوكه قوتابی مه ل رێزا یازدێ و من دڤێت پشتی خواندنێ ب دووماهی دئینم پتر كاری ل سه‌ر هه‌لبه‌ستێ بكه‌م.
ره‌یان ره‌مزی، بۆ رۆژناما ئه‌ڤرۆ گۆت: ئه‌ز ب كورته چیرۆكه‌كێ پشكدار بووم و شیام ل سه‌ر ئاستێ كوردستانێ و ئیراقێ رێزا سێیێ ب ده‌ستڤه بینم، كه‌سێن پشته‌ڤانیا من كرین نڤیسه‌ر دیار ئه‌ره‌دنی و خێزانا من بوون، ب تایبه‌ت ژی دایك و خوشكا من.
سه‌رهات نه‌ریمان ژی بۆ رۆژنا ئه‌ڤرۆ گۆت: ئه‌ڤه سێ سالن ب كورته فلمان پشكداریێ دكه‌م، ل سالا بۆری من خه‌لاتێ سێیێ وه‌رگرت، ئه‌ڤ ساله ژی ب كورته فلمێ گه‌نجینه من خه‌لاتێ دویێ وه‌رگرت و دێ بزاڤێ كه‌م پتر كاركه‌م ژبۆ هندێ دا سالا بهێت خه‌لاتێ ئێكێ ب ده‌سڤه‌بینم.
