هژمارەكا كچ و ژنان ل بەر دەستێ من فێری چێكرنا خوارنان بووینە
سندس سالح سلێڤانەیی:
ساجیدا حسێن، خودانا لێنانگەها (دەیكا رۆشنایێ) كو نوكە پشكدارە د فەستیڤالا هاڤینی دا ل پاركا نەورۆز ل دهۆكێ، د دیدارەكێ دا بۆ رۆژنامەیا ئەڤرۆ گۆت: ژبەر حەزا من بۆ چێكرنا خوارنان، بەری سێ سالان ئەو هزر بۆ من چێبوو كو وەك (شیف) كاربكەم، لێ بەری سالەكێ دەلیڤە هات و من لێنگەهەك ب ناڤێ كچا خوە ڤەكر و نوكە هەموو ئەندامێن مالێ كاردكەن و ل دووف داخوازیان چەندین جۆرێن خوارن و شریناهیان ئامادە دكەم و ب رێكا ئۆنلاین دفرۆشین و سوپاس بۆ خودێ داهاتەك بۆ مە ژێ دهێت و ئەم دشیێن هەتا رادەیەكی پێدڤیێن مالێ پێ دابین بكەین.
هەروەسا گۆت: خەلكێ دهۆكێ پتر داخوازا (ئیپراخ و ترشك و كادا) ژمن دكەن و ل وەرزێ زڤستانێ ژی (كێپاری) ئانكو پاچە و بۆ بەرفرەهكرنا كارێ خوە من ل بەرە جهەكێ تایبەت ڤەكەم و خێزان هەموو ب تایبەت ژی هەڤژینێ من یێ هاریكارە و هەردەم پشتەڤانێ منە، بۆ زانین گەلەك كچ و ژن ل بەر دەستێ من فێر بووینە و نوكە ژی دو كچ وەك هاریكار ل گەل من كاردكەن.
