هژمارەک ژ سەرکردێن ئاکپارتیێ ژ رێککەفتنا ل گەل مەهەپێ د رازی نینن
رۆژنامەیەکا تورکیا دیار دکەت، هژمارەک ژ سەرکردەیێن ئاکپارتیێ وەسا دبینن پارتا بزاڤا نەتەوەپەرست پێگەهێ خوە یێ جاران نەمایە و کاریگەریا خوە ل سەر پێگەهێ ئاکپارتیێ ژی کریە، ژ بەر هندێ ژی دڤێت پێداچوون د رێککەفتنا ل گەل پارتا بزاڤا نەتەوەپەرست دا بهێتە کرن.
نورای باباجان رۆژنامەڤانا رۆژناما پەنجەرە ل تورکیا د بابەتەکا خوە دا ل هەمان رۆژنامێ دیار کریە، نها بەرهەڤی بۆ هەلبژارتنێن باژێرڤانیان ل تورکیا دهێنە کرن، ئاکپارتی ژی ب هەموو رەنگەکێ خوە بەرهەڤ دکەت، چونکی ئاکپارتیێ دڤێت سەرکەفتنەکا مەزن تۆمار بکەت و پێگەهێ خوە بهێزتر بکەت، لێ نها د ناڤ سەرکردێن ئاکپارتیێ دا نەرازیبوونەکا توند ل دژی رێککەفتنا ل گەل پارتا بزاڤا نەتەوەپەرست دا یا هەی، چونکی ئەو سەرکردێن ئاکپارتیێ وەسا دبینن رێککەفتنا ل گەل مەهەپێ د رەوشا نها دا چو ئەنجامێن باش بۆ وان نینە و پارتا بزاڤا نەتەوەپەرست پێگەهێ خوە یێ جاران نەمایە، ژ بەر ڤێ یەکێ ژی گرنگە پێداچوون د رێککەفتنا ئاکپارتیێ دا ل گەل پارتا بزاڤا نەتەوەپەرست ئانکۆ مەهەپێ دا بهێتە کرن.
هەمان رۆژنامەڤانێ ئەو یەک ژی دیار کریە، ل گۆر باوەریا گەلەک ژ سەرکردێن ئاکپارتیێ ژ بەر رێککەفتنا ئاکپارتیێ یا ل گەل مەهەپێ د هەلبژارتنێن بۆری دا رێژەیا دەنگێن ئاکپارتیێ ل هندەک دەڤەران کێم بووینە، ل ئالیێ دی نێرینا توند یا مەهەپێ کاریگەریا خوە ل سەر سیاسەتا ئاکپارتیێ یا هەی، رێککەفتنا ئاکپارتیێ ل گەل مەهەپێ رێگرە ل هەمبەر چارەسەرکرنا ئاریشێن نها ل تورکیا، چونکی مەهەپێ سیاسەتەکا توند ل هەمبەر پرسا کوردی و پرسێن دی یێن تورکیا هەیە و ئەو یەک کاریگەریا خوە ل سەر هەلوەستێ ئاکپارتیێ ژی کریە، ژ بەر ڤێ یەکێ دەم یێ هاتی پێداچوونێ د رێککەفتنا وان ل گەل مەهەپێ دا بهێتە کرن.
ئەو یەک د دەمەکێ دایە کو بەری نها هژمارەک ژ چاڤدێرێن سیاسی ل تورکیا دیار کربوون، هەکە گوهۆڕین د سیستەمێ هەلبژارتنێن سەرۆک کۆماریا تورکیا دا بهێتە کرن وی دەمی پێدڤیا ئاکپارتیێ ب مەهەپێ نامینیت، چونکی رێککەفتنا ل گەل مەهەپێ زیانێن خوە یێن مەزن بۆ ئاکپارتیێ هەبووینە، لێ ئاکپارتی ژ بۆ پەرلەمانی و هەلبژارتنێن سەرۆک کۆماریێ پێدڤی ب دەنگدەرێن مەهەپێ بوو، ژ بەر ڤێ یەکێ ژی ئەردۆغان ژ نەچاریێ خوە نێزیکی مەهەپێ کریە و هەکە سیستەمێ هەلبژارتنان ل تورکیا بهێتە گوهۆڕین وی دەمی دبیت ئاکپارتی پێداچوونێ د رێککەفتنا خوە یا د گەل مەهەپێ دا بکەت، چونکی کەسێن نێزیکی ئەردۆغانی بەری نها هۆشداری داینە وی کو کاریگەریا نێرینا توند یا مەهەپێ ل سەر ئاکپارتیێ رێگرە ل هەمبەر پرۆژێن چارەسەریێ و ئەو یەک دێ کاریگەریەکا خوە یا خراب ل سەر جەماوەر و دەنگدەرێن ئاکپارتیێ ژی کەت.
