هۆزانڤان و نڤیسەر و زمانزان (محه‌مه‌د تاهر گوههرزی)
سه‌لوا محه‌مه‌د نهێلی
محەمەد تاهر گوهەرزی ل 1 تیرمەها ساڵا 1938ێ ل گوندێ گوهەرزێ سەر ب دەڤەرا ئامێدیێ ڤه ژ دایك بوویە، كوڕێ حەجی حەسەن عەبدوللایه. دایكا وی خەمێ محەمەد بوو، خودانێ برایەكێ و چوار خویشكان بوو، مەزنێ خویشك و برایێن خۆ بوو. د ژییێ زارۆكینیێ دا، حەز و ڤیانا خواندنێ ل دەڤ پەیدا بوویە، گرنگی ددا كەسێن زانا و زانست خواز؛ لەورا هەردەم خۆ نێزیكێ وان كەسان دكر یێ كو زانین نیشا دابا، بۆ خواندنێ ل چەندین گوند و دەڤەران گەریایە. ل دەستپێكی ل گوندێ گوهەرزێ ل دەڤ مەلا ئەحمد گوهەرزی، پاشی بەرەڤ گوندێ خوركێ ل ناڤ مزویرییا و سپیندارا خەلفۆ ل به‌رێ گاره‌ی و باكرمان ل ناڤ زێباریان و دەرگەلا شێخان…، لێ پشتی كودەتایا 14 تەموزا 1958 ب سەركردایەتیا عه‌بدولكەریم قاسم، بڕیار هاتە دان هەر كەسەكێ بڤێت دشێت بچیتە خولەكا مامۆستایه‌تیێ ل باژێرێ مووسلێ، خودێ ژێ رازی وەك فەقییەكێ زیرەك ل گەل چەند كەسێن دی یێن دەڤەرا بادینان چوونه تاقیكرنێ و سەركەفتن ب دەست خۆڤە ئینا بوو، ل 19ی چریا دویێ ساڵا 1960ێ، وەك مامۆستایێ سەرەتایی ل گوندێ دێراگژنیكێ هاتە دامەزراندن.
پشتی ساڵا 1961ێ شۆڕەشا ئیلونێ دەستپێكری، رەحمەتی گوههرزی وەك پێشمەرگەیه‌ك قەستا ناڤ رێزێن شۆڕەشێ دكەت و بۆ دەمەكێ د ناڤ رێزێن پێشمه‌رگه‌ی دا وەك كادر دمینیت، پاشی جارەكادی دزڤڕیتەڤە بۆ سەر كارێ خۆ، لێ حكومەتا عیراقێ ل رۆژا 11ی چریا دویێ ساڵا 1961ێ ل باژێرێ ئامێدییێ دەستە سەركر، وەك زیندانیێ سیاسی، پاشی ڤەگوهاستە باژێرێ مووسلێ، ل 25ی چریا دویێ ساڵا 1962ێ، دهێتە ئازاد كرن.
ل ساڵا 1970ێ دا ل گەل شاندێ نڤیسه‌رێن كورد، پشكداری د كۆنگرەیێ بەغدا دا یێ ئیکەتیا نڤیسەرێن کورد دا كرییە. ل ساڵا 1971ێ بوویە ئەندام د لقێ ئێكەتیا نڤیسەرێن كورد دا ل دهۆكێ، هەروەسا وه‌كو رەوشەنبیرەك ل ساڵا 1978ێ پشكداری د كۆنفراسێ ئێکەتیا نڤیسه‌رێن كورد ل هەلێرێ كرییە، ل ساڵا 1980ێ ژ كارێ وی یێ مامۆستایه‌تیێ هاتە لادان و دویرئێخست بۆ باژێرێ تكریتی ژ ئەگەرێ بیروباوه‌رێن وی یێن سیاسی، دیسان د هەمان باژێر دا، وەك بەرپرسێ گشتی یێ تێبینییان ل پەروەردا گشتی كار كرییە تا ساڵا 1989ێ، خانەنشینییا خۆ پێشكێشێ حكومەتێ كرییە.
ل ساڵا 1991 زڤڕییە باژێرێ دهۆكێ. ل ساڵا 1992ێ وەك نڤیسەر د گۆڤارا (مەتین) دا كار كرییە تا ساڵا 2003ێ. هەر د هەمان ساڵ دا؛ ل رێكخراوا ئاوات كاركرییە تا دەستپێكا ساڵا 2004ێ، پاش د هەمان ساڵ دا دزڤریتەڤە ل سەركارێ خۆ یێ مامۆستایه‌تییێ.
مخابن د وان ساڵێن هاتییه نه‌فیكرن، نه‌شیایه به‌رده‌وامیێ بده‌ته كارێ خۆ یێ نڤیسینێ و به‌لاڤ بكه‌ت، له‌وا ئه‌و تشتێ وی دنڤیسی، ل ده‌ڤ خۆ هلگرت بوو، جهێ داخێ یه، گوههرزی یێ مامۆستا و نڤیسه‌ر، ل رۆژا 21 كانوونا دویێ ساڵا 2005ێ، وەغەرا دووماهیێ دكه‌ت.
بەرهەمێن وی یێن بەلاڤكری. پەرتووكەك نڤیسییە ب ناڤێ (رێزمانا كوردی) زارێ كرمانجی (Rezmana Kurdi Zare Kirmanci) ل ساڵا 1991ێ ل دهۆكێ ژ لایێ ده‌زگه‌ها سپیرێز یا چاپ و وه‌شانێ ڤه هاتیە چاپ كرن. هەروەسا ب نڤیسینا گۆتاران، پشكداری د (5) هەژمارێن گۆڤارا مەتین دا كرییە. هه‌روه‌سا دگۆڤارا (په‌یڤ) دا گۆتار به‌لاڤكرینه. زێده‌باری نڤیسینا كۆمه‌كا هۆزانان، كو نوكه ئه‌م چو ژێ نزانین.
ب رێیا رۆژنامه‌یا (ئه‌ڤرۆ)، هیڤییه ژ هه‌می نڤیسه‌ر و هه‌ڤدۆستێن ره‌حمه‌تی، هه‌ر كه‌سێ نڤیسینه‌ك، یان وێنه‌یه‌ك و بیرهاتنه‌ك د گه‌لد ا هه‌بیت، مه پێ زه‌نگین بكه‌ن، به‌لكو دپاشه‌رۆژێ دا، هه‌میان د په‌رتووكه‌كێ دا كۆم بكه‌ین.
سلاڤ ل گیانێ گوهه‌رزیێ نڤیسه‌ر، گوهه‌رزیێ سوحبه‌تخۆش و هه‌ڤالدۆست..
