هۆزه‌ڤان زاهد: ئاكرێ ژ هه‌ر ده‌مه‌كێ دی نێزكتره بۆ پلا نایاب
ئه‌ڤرۆ،
د داخویانیه‌كێدا سه‌رپه‌رشتێ تیما ته‌پا پێی یا یانا ئاكرێ بۆ رۆژناما ئه‌ڤرۆ دیاركر گه‌شبینن ئه‌ڤ ساله تیما وان ده‌ربازبیته پلا نایابا كوردستانێ و ژ هه‌ر ده‌مه‌كی نێزكێ ڤێ هیڤیێ بووینه سه‌رباری ئاسته‌نگ و ئاریشێن كه‌فتینه د ڕێیا وان دا.
هۆزه‌ڤان زاهد ئه‌وێ هه‌مان ده‌مدا ئه‌ندامێ كارگێریا یانێ گوت: وه‌رزێ ئه‌ڤ ساله ئه‌م ب پلان و جوداهیه‌كا تایبه‌ت هاتینه د ناڤ خولێ دا و ده‌سته‌كا كارگێریێ هه‌موو لسه‌ر وێ یه‌كێ رژدن ب لدووڤ شیانێن خوه كاربكه‌ن پێخه‌مه‌ت سه‌رخستا تیما مه بۆ پلا نایاب سه‌رباری ئاسته‌نگا مه‌زن ئه‌وژی نه‌بوونا پشته‌ڤانیا دارایی ژ چو لایه‌نان بتنێ ئه‌و مینحه‌كا تایبه‌ت یا پارێزگارێ دهۆكێ بۆ هه‌موو یانێن پارێزگه‌هێ دهێت و ئه‌م نه‌چارین قه‌رزا ژی بۆ یانێ بكه‌ین كو هه‌تا نوكه گه‌هشتینه چل هزار دولاران ژبه‌ركو هه‌یڤانه مووچه‌یێ كادرێ راهێنانێ و یاریزانان نێزیكی 18 ملیۆن دینارن ژبلی مه‌زاختیێ بۆ دهێته دابینكرن، مه‌ره‌ما مه ژی هه‌ر ئه‌و بوویه كو ب هه‌موو لایه‌كی ڤه تیما مه بێ كێماتی بیت و ژلایێ ده‌رونی و مادی ڤه چو ئاریشه نه‌بن و باشترین به‌رهه‌ڤی بیت بۆ هه‌ر یاریه‌كێ.
ناڤهاتی ئه‌وچه‌نده ژی دیاركر كو پشتی بورینا 11 یاریان شیاینه سه‌رێ لیستا كۆما خوه یا پلا ئێك بهێن ب 24 خالان ژ حه‌فت سه‌ركه‌فتن و سێ وه‌كهه‌ڤی و ئێك خوساره‌تی و پێنگاڤه‌كا باش پاڤێژین بۆ پلێتا ده‌ربازبوونێ به‌ره ب پلا نایاب، بتنێ چار یاری ماینه بۆ ده‌ستڤه ئینانا ئارمانجا مه و یاریێن مایی ب هه‌موو شیانێن خوه ناهێلین ئێك خال ژ ده‌ست بده‌ین بتنێ ئه‌گه‌ر چو روودانێن نه چاڤه‌ڕێ كری بهێنه پێش ژوانا خوساره‌تیه‌كا ژ نشكه‌كێ ڤه یان خه‌له‌تیێن دادڤانا كو كارتیكرنا خوه ل سه‌ر ئانجامێن مه بكه‌ین و هێشا مه یێ د شه‌ڕی دا هه‌تا دووماهی چڕكه ژ خولێ و مه ده‌ربازبوون مسۆگه‌ر نه كریه لێ هیڤیێن مه گه‌شتر لێهاتینه.
