هۆكارێن تاونێن وهك یا كوشتنا مالباتهكێ ب تهمامی ل ههولێرێ چ نه؟
ئدریس هسۆ
ڕۆژا ۰۳.۱۰.۲۰۱۹ خهلكێن سهرانسهری كوردستانێ چاڤێن خوه ل سهر بیهیستنا تاوانهك هۆڤانه ڤهكرن، مالباتهك ب تهڤاهی ئهندامێن خوه ل سهر دهستێ تاوانبارهكی ب شێوهیهكی هۆڤانه هاتن كوشتن.
ئێڤارا ۰۲.۱۰.۲۰۱۹ ل گوندێ بیر ڕهش سهر ب ههولێرێ ڤه تاوانبار فهریدۆن كهریم ڕهمهزان، ئهندامێ مالباتهكێ ب تهمامی كو ژ دێ، باڤ و سێ زارۆكان پێكدهات ب دلهكی سار كوشتن و تهرمێن وان هاڤتیه دهڤهرهك نێزیك ژ گوند و ڕهڤیا.
خوهشبهختانه كو د دهمهك زوو دا تاوانبار ژ ئالیێن هێزێن ئاسایش ڤه هات گرتن و دهزگههێن پۆلس و پارێزگارێ ههولێرێ تهكهز كرن كو، تاوانبار دێ ڕهوانهیی دادگههێ وهره كرن و دێ جهزایا خوه یا قانوونی گونجاو ببه.
ههروسا تهكهز كرن كو ئهڤ تاوان ل دژی مه ههمیان هاتیه ئهنجامدان و ڕاگههاندن كو ئهم دێ ههموو دهستهلاتا خوه بكاربینن ژ بۆ ئالیكاریا خوهدانێن ڤێ مالباتێ و پاراستنا ههموو پهنابهرێن كو ل ههرێما كوردستانێ دژین.
ههتا ڤر مرۆڤ دكاره ڤێ تاوانێ ب بوویهرهك نۆرمال ل قهلهم بده، لێ دهما مرۆڤ ل تاوانێن ب ڤی ڕهنگی كو ل ههرێما كوردستانێ دبن، دڤێ ل كوورایا ڕفتارێن وسا بكۆله و ئێدی سهدهمێن تاوانێن ب ڤی ڕهنگی بده ناسین و هۆكارێن وان ئێن جڤاكی ژ هۆلێ ڕاكه.
بهری نها كوشتنا خۆرتهكی و ژنا وی د مالا وان ده، كوشتنا زارۆكهكی ل سلێمانیێ و كوشتنا كهچهكه نووهاتی ل سهر دهستێ ههژمارهك ژ تاوانباران پشتی كو دهستدرێژی لێ كربوون، و ب دههان تاوانێن ب ڤی شێوهیێ خراب، د بیرا خهلكێ ده نه، و ههستێ جڤاتێ ب گشتی دهرزاندنه.
نه تهنێ ل ههرێما كوردستانێ، ههروها بوویهر و تاوانێن كوشتنێ كو ل ژێر دهستهلداریا ڕێڤهبهریا خوهسر ژی كو داوی تاوان ل كۆبانێ هات ئهنجامدان و تێ ده مههمهد كهمال ب گولهیا فهرمانبهرهكی ـ ل گۆری هاتیه ڕاگهاندن ـ هاتیه كوشتن، وهك وێ گهلهك بوویهرێن دن ژی ههنه.
ب دههان تاوانێن كوشتنێ ل ڕۆژاڤا و باشوورێ كوردستانێ دبن، تا وێ ئاستێ كو مرۆڤ ژ خوه بپسره، چما؟ هۆكارێن ڤان بوویهر و تاوانان چ نه؟
سهدهمێن ڤێ یهكێ زۆرن، و چهندی گرنگه كو تاوانبار جهزایێ خوه یێن قانوونی ببن، لێ یا گرنگتر كو دهزگهه و سازیێن پهیوهندیدار ل هۆكار و سهدهمێن ڤێ یهكێ بگهرن و چارهسهر بكن و ڕێگریێ ل تاوانێن وهسا هۆڤانه د ناڤ جڤاتێ دا بكن.
ب كورتی و ل گۆری من، نهبوونا دادپهروهریا جڤاكی، پهیدابوونا گهندهلیێ، ههبوونا ههموو جۆره چهك ب شێوهیهكی ههرهمهكی و بێ سهروبهر د ناڤ دهستێن خهلكێ دا، ل پاشكهتنا سیستهمێن خواندنێ و ههبوونا ئاستهنگیان ل بهردهم چینێن ههژار دهربارێ خوهندن و سیستهمهك پهروهردهیی باش، سهردهستیا نرخێن حزبی و سیاسی ل دهوسا نرخێن كوردهواری و مرۆڤی د ناڤ جڤاتا كوردستانێ ده، بهلاڤبوونا هزرهكی ئۆلی تهنگ و توندرهو كو نكاره ڕهنگێن جودا د جڤاتێ ده قهبوول بكه، هۆكارن كو ڕێژهیا تاوانان بلند ببه، ههروسا هۆكارن كو، تاوانێن ب ڤی ڕهنگی وهرن دیتن.
لێڤهگهرهكه گشتی د ههموو ئاستان دا ل سهر برێڤهبرنا كوردان ژ وهلاتێ خوه ڕه پێویسته، لێڤهگهرهك كو چارهسهریا ههموو هۆكارێن ژێرین ببینه و پێشڤهچوون بهر ب جڤاتهك كو تێده نرێخن، پهروهرده، چاند، مووزیك و هونهر ب ههموو ڕهنگێن خوه، دادپهروهری و یهكترقهبوولكرن، فره ئۆلی نه تهنێ ب سلۆگان و دوورشمان تێ ده جیگر به، ب ڕاستهقینه ههر كهس وهره قهبوول كرن، كار ل سهر وێ ئێكێ وهره كرن كو دهرفهتێن كار كو ڕوومهتا مرۆڤ ژی بپارێزه، د بن سێوانا قانوونێن جیگر دا. دبه كو ببه پێنگاڤا ئێكهمین كو تاوانێن وهسا دلێش بهس وهرن دیتن، ئان ژی ههكه هاتن دیتن ب ڕێژهیهك ههری كێم.
تێبینی: مهبهستا من ژ ڤێ گۆتارێ ههرێمێن ڕۆژاڤا و باشوورێ كوردستانێ یه، تهڤی ههبوونا تاوانێن ب ڕهنگی ل ههرێمێن دن یێن كوردستانێ، لێ من خواست بهحسا وان ههرێمان بكم كو كێمزێده ژ بن دهستهلاتا دهولهتێن داگیركهر دهركهتنه، تهڤی ههبوونا هن جوداهیان د ئالیێن جودا یێن جڤات و دهستهلاتداریێ دا، لێ تاوانێن كوشتنێ یێن ب ڤی شێوهیی ل ههردو ههرێمان ب ڕێژهیهكه بلند تێن دیتن.
گهویلان.
