هۆكارێن دووركه‌فتنا خوه ئاشكراكرن
دهۆك، شاكر:
سترانبێژ (كوڤان ئامێدی) كو دووماهی كلیپا وی ل سالا 2014 به‌لاڤ ببوو، ئه‌و ژی سروده‌ك بۆ ناڤێ (سه‌ركه‌فتن) و پشتی وێ كلیپێ هه‌تا نوكه چو تشێ نوو نه‌بوویه و یێ بێ ده‌نگه، د دیداره‌كێ دا بۆ رۆژناما ئه‌ڤرۆ دیاركر كو وی حه‌فت سترانێن نوو هه‌نه، په‌یڤ و ئاواز دحازرن، لێ ژبه‌ر نه‌بوونا پشته‌ڤانیێ ئه‌و نه‌شێت تۆماربكه‌ت.
كوڤانی گۆت: سێ ستران ژوان ژ په‌یڤ و ئاوازێن عه‌گید عادل، سترانه‌ك ژ په‌یڤ و ئاوازێن منه، سێ سترانێن دی ژی ژ په‌یڤێن عه‌دنان حسێن ئامێدی نه، دو ژوان من ئاوازكرینه و ئاوازه‌ك ژی یا برایێ من شه‌وكه‌ت ئامێدی یه، بۆ تۆماركرن و كلیپكرنا وان گه‌له‌ك پاره پێ دڤێت و هه‌كه سپۆنسه‌ره‌ك هه‌بیت ئه‌ڤ شه‌ڤه ئه‌ز یێ حازرم ده‌ست پێبكه‌م.
كوڤان ئوسمان ره‌جه‌ب، به‌رنیاس ب كوڤان ئامێدی، ژدایكبوویێ سالا 1972 یه، ده‌ستپێكا وی بۆ سترانگۆتنێ بۆ سالا 1982 دزڤریت كو ئه‌و ژی ل گه‌ل تیپا زێره‌ڤان یا هونه‌ری بوو ل ئامێدیێ، هه‌تا نوكه چه‌ند ئه‌لبۆم و كلیپ هه‌نه، سێ كاستێن سترانێن ده‌واتان ژی ل گه‌ل سترانبێژ ئه‌یهان مزیری تۆماركرینه.
