هۆلكا كوردایه، به‌ختێ هه‌وه‌مه چ پێهنا لێنه‌ده‌ن!
مه‌زن دبێژن: ئاسن ب ژه‌نگا خوه نه‌بیت، ناڕزیت. دبێژن ژی: ئاسنێ بێ ئه‌ساس نه دبیته چه‌كووچ نه‌ژی دبیته داس. پشتی ڤان قه‌ومینێن دووماهیێ ئه‌ڤێن ل ده‌ڤه‌را رۆژهه‌لاتا ناڤین چێبووین، ڤێجارێ به‌ختێ كوردان یێ باشبوو، چاڤێ مه لێبوو نه‌هلنگڤیت یان ژی وه‌كی چیلا زه‌ر لێنه‌هێین و ئه‌م بخوه پێهنه‌كێ لێبده‌ین، به‌لێ هه‌روه‌كی ئه‌و بێهنا ژێ دهێت و نه‌دووره ئه‌و ژه‌نگ بگه‌هیته له‌شێ ڤێ سه‌ربۆرێ و خۆدێ دزانیت دێ چ چێبیت!.
كوردێن عیراقێ سه‌رێ وه‌ریسی یێ گرتی، متا و به‌رڤه‌رێژێن سیاسی ل عیراقێ ب باشی یێن لێكوه‌رباداین و كرینه د خلمه‌تا خوه دا، سه‌ربۆره‌كا باش یا ل ژێریا كوردستانێ برێڤه‌بری، هه‌ر چه‌نده نه‌یا دلخازه، به‌لێ یا سه‌ركه‌تی بوو، بێهن و تامێن وێ سه‌ربۆرێ گه‌هشتبوو ئه‌ورۆپا و ئه‌مریكا له‌وا ب باشی مه‌دحێن ڤێ پارچا كوردستانێ دكه‌ن.
ئه‌ڤه چه‌ند رۆژه به‌حسێ شه‌ڕێ (كورد+كورد) دهێته كرن، هه‌روه‌كی دێ جاره‌كا دی (سه‌را چ نه) كورد لێككه‌ڤن، به‌لێ (بویك یا ل ده‌ڤ په‌ده‌كا ئیرانێ و زاڤا یێ ل ده‌ڤ په‌كه‌كێ و قه‌رقه‌شه ژی یا ل به‌ر ده‌رێ ژێریا كوردستانێ). كوردان گه‌له‌ك جاران شه‌ڕێ ناڤخوه یێ كری، به‌لێ ل دووماهیێ چ پێڤه نه‌هاتیه یان ژی ب تنێ پاشڤه‌مان و پێشه‌مانیه. به‌لێ وه‌كی دیار په‌كه‌كه یا ره‌نگه‌كێ سیاسه‌تێ دكه‌ت، كو ڤه‌ژه‌نا وێ ل سه‌ر كوردان ب ره‌نگه‌كێ ته‌ڤای و كریارا دیمۆكراسیێ ب ره‌نگه‌كێ نه‌مازه‌یی یا خرابه، ئه‌ڤه ژی شاشیه‌كا سیاسیه دهێته كرن، به‌ری ب هووری ئه‌م به‌حسێ قه‌ومینا شه‌ڕێ په‌كه‌كێ و په‌ده‌كا ئیرانێ بكه‌ین، دڤێت ئه‌م تێبگه‌هین كو په‌كه‌كێ د هه‌یامێن بۆری دا چه‌ند گاڤێن شاش هاڤێتینه كو ب چ ره‌نگا خلمه‌تا باده‌كا كوردی ناكه‌ن.
پشتی داعشێ له‌پێن خوه داناینه سه‌ر شنگالێ و چه‌ند ده‌ڤه‌رێن دی، چه‌ند سه‌رله‌شكه‌ر و سه‌ركێشێن په‌كه‌كێ بۆقه‌ك هه‌لگرت و تمتمكا سه‌ركێشیا كوردان ل ژێریا كوردستانێ ددا، ژ ڤێ ژی ڤه‌نه‌بوو، ده‌ست هاڤێتێ (كانتۆنا شنگالێ) ژی راگه‌هاند، كو نه ژ دوور نه ژ نێزیك چ گرێدان ب وانڤه نه‌بوو، مایێ خوه ب ره‌نگه‌كێ ئێكسه‌ر د ژێریا كوردستانێ كر. ب ڤێ چه‌ندێ ژی هه‌ر نه‌راوستان، چه‌ند گه‌ریلایه‌كێن خوه كێشانه سه‌ر توخیبان و ل هنده‌ك جهان بناڤ ژێریا كوردستانێڤه هاتن، هێجه‌تا وان ژی ئه‌و بوو دێ ئێزدیان پارێزن، نه‌خاسمه هنده‌ك گه‌ریلایێن خوه ل ده‌ڤه‌را شێخان و لالشێ به‌لاڤكرن، مه‌ره‌م ژی چ بوو! بۆچی ژ هه‌میان ژێریا كوردستانێ.
هه‌ر ئه‌ڤه ژی به‌س نه‌بوو، سه‌ركێشه‌كێ وان ب ناڤێ (كالكان) ده‌ڤێ خوه یێ شرین ڤه‌كر و هنده‌ك ئاخڤتن ل سه‌ر ژێریا كوردستانێ گۆتن، قه‌ت چێنه‌دبوو سه‌ركێشه‌كێ كوردان ڤان ره‌نگێ ئاخڤتنان ل به‌رامبه‌ری كورده‌كێ چ پارچێن دی بێژیت، وه‌ختێ گۆتی: نابیت هه‌ڤلێر ژێریا كوردستانێ برێڤه‌ببه‌ت.
نوكه ژی په‌كه‌كێ تڤه‌نگێن خوه داگرتن و تژی بارویت كرن و به‌رێ وێ دا (كوردان)، ژ ڤێرێ ژی به‌س نه‌بوو نوكه به‌رێ خوه دا كوردێن رۆژهه‌لاتی، سینگه‌ك ل (پارتیا دیمۆكراتا كوردستانا ئیرانێ) دا، بمخابنڤه دو شه‌هید ژێ دان. به‌لێ هه‌كه ئه‌م شرۆڤه‌كرنا به‌رئاقل بكه‌ین دێ دو دیمه‌نان بینین كو دیاره په‌كه‌كه یا ل سه‌ر شۆل دكه‌ت، یێ ئێكێ ل سووریێ و یێ دی ئه‌وێ چاڤه‌رێكری ل ئیرانێ.
دیمه‌نێ سووریێ، هه‌روه‌كی دیار په‌كه‌كێ هێزه‌كا چیكری كو یا بوویه مه‌تال بۆ كه‌ڤتنا ئه‌سه‌دی، هه‌كه ئه‌و هێزه نه‌با نه‌دووره ئه‌سه‌د ژ مێژه‌وه‌ره لاواز ببا و دبیت ژی هه‌ر نه‌مابا. پاشی مودێلا كانتۆنان ل كوردستانا رۆژئاڤای دانا.
دیمه‌نێ ئیرانێ، پشتی قه‌ومینا ئۆتێلا مهابادێ، ئه‌وا كچه‌كا كورد ژ به‌ر هه‌ڤرووشیا سكسی خوه د ئۆتێلێ دا هاڤێتی، كه‌ربێن خه‌لكی گه‌له‌ك ڤه‌بوون، هه‌روه‌كی ئه‌و ڤۆلكانا د سینگێ خه‌لكێ رۆژهه‌لاتێ كوردستانێ دا په‌قیت، نێزیك بوو ژ ده‌ستێن حوكمه‌تا ئیرانێ بده‌ركه‌ڤیت. به‌لێ هه‌روه‌كی ئیران ژی پێدڤی مه‌تاله‌كێ كورده وه‌كی رۆژئاڤای دا گه‌ف ل سه‌ر حوكمه‌تا وان نه‌مینن، كێ بگه‌ته گیسكێ سه‌ده‌قێ كێ نه، دیاره په‌كه‌كه ژ هه‌ژی ڤێ چه‌ندێ دیت، هه‌كه نه بۆچی ئه‌ڤ لڤینه په‌كه‌كێ د ڤی هه‌یامی دا كرن، هه‌كه ده‌ستێ ئیرانێ د پشت را نه‌بیت، بۆچی دێ ل سه‌ر تخویبێن كێله‌شینێ پێشمه‌رگێن په‌ده‌كا ئیرانێ كوژن، ئه‌رێ ئه‌و جهێ ئه‌و ژێ هه‌لاڤێتین حالێ وێ یێ چاوایه؟. ئه‌ڤ پرسیاره بۆ په‌كه‌كێ یا دلئێشه، به‌لێ ئه‌ڤرۆ یان سوبه‌هی دڤێت به‌رسڤا وێ بده‌ت. ئه‌ڤ دیمه‌نه ژی بیرا مرۆڤی ل كریارێن (میرێ كوره) دئینیت ئه‌وێ حوكمه‌تا ئۆسمانیان ب میرگه‌هێن كوردان را به‌ردای و هه‌می میرگه‌هـ پێ هه‌ڕفاندین و پاشی ئه‌و بخۆ ژی كریه گیسكێ سه‌ده‌قێ و هه‌تا نوكه نزانن كا بنه‌تارا وی چ لێهاتیه و گۆرێ وی ل كویڤه‌یه.
هیڤیه په‌كه‌كه د سیاسه‌تا خوه دا بچیته‌ڤه، هزره‌كێ ل پاشه‌رۆژا سیاسی یا كوردان بكه‌ت، نه‌بیته دارده‌ستێ ڤی و وێهه‌نێ، ژبه‌ركو نوكه هه‌می خه‌لك یێ بچاڤه‌كێ مه‌زن و قه‌درگرتنێ سه‌حدكه‌نه كوردان، بلا ئه‌و جحێلێن هوین شه‌هید دكه‌ن، بۆ به‌رسینگا دوژمنی بیت.
