هیچ ئالییەك هندی پارتی و سەرۆك بارزانی هەست ب ئازارێن هەلەبجە ناكەت
نوونەرێ سەرۆك بارزانی ل هەوا بانگەشەیا هەلبژارتنان یا پارتی دیموكراتی كوردستان ل پارێزگەها هەلەبجە راگەهاند، هیچ كەس و ئالییەك هندی سەرۆك بارزانی هەست ب ئازارێن خەلكێ هەلەبجا شەهید ناكەت و هیچ ئالییەك وەكو سەرۆك بارزانی بهایێ ڤی باژێرێ دو جاران شەهید نزانیت.
دوهی شەمبیێ 12/10/2024، سیداد بارزانی، نوونەرێ سەرۆك بارزانی ل هەوا بانگەشەیا هەلبژارتنان یا پارتی دیموكراتی كوردستان ل پارێزگەها هەلەبجە گۆت: «هەلبچە بوویە هێمایەكا دیرۆكی بۆ ئازار و نەهامەتیێ كو ل دژی گەلێ مە هاتییە كرن، هەلەبجە پێناسەیەكە بۆ مە هەموویان» .
نوونەرێ سەرۆك بارزانی گۆت ژی: «خەلكێ هەلەبجە رۆلەكێ مەزن د بزاڤا رزگاریخوازا كوردی دا یێ گێرای، ل سەردەمێ شۆرەشا ئیلۆنێ هەلەبجە كەلهەكا سەرسەختا دوژمنی بوو و خەلكێ وێ ژی پشتەڤانێن پارتی و بارزانیێ نەمر بوون، ئەوژی بۆ ئەگەرێ وێ چەندێ دوژمن ل نیسانا سالا 1974 ب چەكێ قەدەغەكری ژ ئالیێ نێڤدەولەتیڤە، ڤی باژێرێ كوردستانی تۆپ باران بكەت».
پتر گۆت: «مە ژبیر نەكریە هەلەبجە و هەورامان و شارەزۆر د شۆڕەشا گۆلانێ دا ژی پشتەڤانێن شۆڕەشێ و پارتی بوون، ئەڤ دەڤەرە ببوو مەیدانا دوژمنبەزین ب سەرۆكایەتییا سەرۆك مەسعود بارزانی، هەلەبجە هەردەم دلسۆز و وەفادارا پارتی و بارزانی بوو. تاوانا كیمیابارانكرنا ڤی باژێری ژی زرەیەك ژ ئیرادەیا خەباتكارییا وی كێم نەكرییە، خەلكێ هەورامان و هەلەبجە و شارەزۆر د وان رۆژێن تاریدا ژی پشتەڤانێن بارزانی و كوردایەتیێ بوون».
دیاركر ژی، پارتی و سەرۆك بارزانی چو جاران ئەو باوەشا گەرم یا خەلكێ هەلەبجە ژبیر ناكەن، ب تایبەت پشتی سەرهلدانێ بوونە پشتەڤانێن ب هێز بۆ پارتی و پێشمەرگێن پارتی، هەروەسا بۆ داكۆكیێ ژ پەرلەمانی و حوكمەتا هەرێما كوردستانێ.
سیداد بارزانی، نوونەرێ سەرۆك بارزانی راگەهاند: «هیچ كەس و ئالییەك هندی سەرۆك بارزانی هەست ب ئازارێن خەلكێ هەلەبجا شەهید ناكەت، هیچ ئالییەك وەكو سەرۆك بارزانی بهایێ ڤی باژێرێ دو جاران شەهیدبووی نزانیت، چونكە مە ل گەل هەوە و هەموو خەلكێ كوردستانێ ژ گەرمیان هەتا بەهدینان و بارزان قوربانیێن مەزن داینە ژ پێخەمەت ئازادیێ و سەربخوەییێ، لەوما ئەم د ئیش و ئازارێن هەوە د گەهین، دزانین گرانییا جینۆسایدێ و كیمیابارانێ و ئەنفالێ چەندە. ئەم دشێین ب گرەنتیكرنا ئارامیێ و ئاڤەدانیێ كێم بكەین و ب پێكڤەییا مە برینان دەرمان بكەین، بەردەوام بین هەتا وەلاتێ خوە سەربێخین».
