هیڤیا وی ئەوە خزمەتا ستران و مۆزیكا كوردی بكەت
شاكر ئەتروشی:
سترانبێژ (شاهەنگ سەلیمی) كو پتری هەشت سالانە سترانان دبێژیت، د دیدارەكێ دا بۆ رۆژناما ئەڤرۆ گۆت: حەزژێكرنا من بۆ سترانگۆتنێ ل ژیەكێ بچووك دەستپێكر، بابێ من و برایێ من (سانی) كو ئەو ژی سترانبێژە گەلەك هاریكاریا من كرن و سترانا ئێكێ من بەلاڤكری ب ناڤێ (ئەگەر تۆ زڤڕی) بوو، ژپەیڤ و ئاوازێن برایێ من بوو، ئەز ب وێ سترانێ بەرنیاس بووم، لەورا پشتی دەمەكی من سترانا دویێ ب ناڤێ (بمینە) كو ژ پەیڤ و ئاوازێن من بوو من ئەو ژی تۆماركر، نوكە یێ خوە بەرهەڤ دكەم بۆ تۆماركرنا سترانەكا دی، ئەو ژی دێ ژ پەیڤ و ئاوازێن من بیت و هیڤیا من ئەوە رۆژەك بهێت ئەز بشێم ئەلبۆمەكا سترانان تۆماربكەم.
هەروەسا گۆت: سترانگۆتنا من بتنێ ل ئاهەنگانە و هندەك جاران ژی بۆ هەڤالان دبێژم، لێ وەكو دەوات هەتا نوكە ئەز نەچوویمە دەواتان و دێ بزاڤێ كەم رۆژانە ل پەیڤ و ئاوازێن باش گەڕم ژبۆ هندێ دا سترانێن باشتر و بهێزتر بۆ وان كەسان تۆماربكەم یێن گوهداریا دەنگێ من دكەن، بۆ زانین ئەز ب دەنگێن هونەرمەندان (حەسەن شەریف و عەبدولواحد زاخۆی و كاروان كامل) داخبارم و هیڤیا من ئەوە ل دووف شیانێن خوە ئەز ژی بشێم خزمەتا ستران و مۆزیكا كوردی بكەم.
