هیڤیا وی ئەوە مۆزەخانەیەكێ بۆ ئەنفالبوویێن دەڤەرا بەهدینان ڤەكەت
شاكر ئەتروشی:
خودانێ چایخانەكێ ل سەنتەرێ پارێزگەها دهۆكێ، هەتا نوكە وێنەیێن 75% یێن وان كەسان یێن د هەوا ئەنفالێن رەش دا ل دەڤەرا بەهیدینان بێ سەروشین بووین ل چایخانا خوە هەلاویستینە و د بەرێ وی دایە ل پاشەرۆژێ بشێت مۆزەخانەیەكا مەزن بۆ وێنەیێن وان ل دهۆكێ ڤەكەت.
غازی مەحمود، خودانێ چایخانا (ئەنفال) ل دهۆكێ، د دیدارەكێ دا بۆ رۆژناما ئەڤرۆ گۆت: هزرا ڤەكرنا ڤێ چایخانێ بۆ بەری دو سالان دزڤڕیت، لێ هندەك ئاستەنگ هەبوون ئەم گیرۆگرین هەتا رۆژا شازدەی ئادارا ئەڤ سالە كو یا هەڤدەم بوو دگەل رۆژا كیمیا بارانكرنا باژێرێ حەلەبجە ئەڤ چایخانە هاتە ڤەكرن و بۆچی مە ئەڤ ناڤە دانا (ئەنفال) دا گەنجێن مە، ب تایبەت ژی نڤشێ نوو بزانیت كو ئەڤ ئازادیا نوكە ئەم تێدا دژین بەرهەمێ خوینا شەهید و ئەنفالبوویێن كوردستانێ یە.
غازی گۆت: هەر ل دەستپێكا ڤەكرنا چایخانێ نڤیسەرێ هێژا (عەلی بەندی) بەرپرسێ بەرێ یێ سەنتەرێ ئەنفالان ل دهۆكێ گەلەك هاریكاریا مەكریە و وی بتنێ سۆزێن خوە دگەل مە بجه ئیناینە، ل ڤێرە من داخوازەك هەیە ئەو ژی فەرە وەزارەتا پەروەردێ پرتووكەكێ ب ناڤێ (ئەنفال و جینۆسایدێن كوردان) بەرهەڤ بكەت و ئەو پرتووك هەر ل قوناغا بنەرەت هەتا قوناغا زانكۆیێ قوتابی بخوینن، دا بزانن كا چ كارەسات ب سەرێ مللەتێ كورد هاتینە.
