هیڤیا وێ ئەوە پێشانگەهەكێ ل دهۆكێ ڤەكەت
موسا خالد:
خەم عەبدال، خانمەكا دەستڕەنگینا قەزا باتیفایە، لێ چەند سالن ل وەلاتێ سویدێ دژیت، د دیدارەكێ دا بۆ رۆژنامەیا ئەڤرۆ دبێژیت: ئەڤ كارێ نوكە ئەز دكەم ب هونەرێ (مكرمیە) دهێتە نیاسین، مكرمیە هونەرەكێ كەڤنە ل چەرخێ سێزدێ دەركەفتیە، لێ بوو دەمەكێ درێژ یێ بەرزەبوو، هەتا بەری چەند سالان پشكەك ژێ دەركەفتە ڤە و ب پەمبی دهێتە چێكرن و دیكۆرێن مالان پێ دهێنە چێكرن.
هەروەسا گۆت: دڤی كاری دا من رێكا خوە یا جودا هەیە بۆ دیزاینكرنا مكرمیێ ئەز هزران ژ كلتۆری و سروشتی وەردگرم، مكرمیە ئانكو ب رێكا دەزی و وەریسی وەك دەربرینەك نەخشان چێدكەم، بۆ زانین د ژیەكێ بچووكدا من حەز ل سەر كارێ دیزاینێ هەبوو، بەلێ ئەڤە چار سالن ڤی كاری دكەم، پشتەڤانێن من یێن سەرەكی هەڤژین و خویشكا من بوون، هەروەسا هەموو ئەندامێن مالێ ژی دهاریكار بوون، ل ڤێرە ل سویدێ ئەز ڤی كاری دكەم و ب رێكا سۆشیال مەدیایێ نیشا ددەم و داخوازی بۆ من دهێن و هیڤیا من ئەوە ئەز پێشانگەهەكێ ل دهۆكێ ڤەكەم، هەروەسا وەكو ژنەكا كورد ئەز عاشقا كلتۆر و سروشتیمە، پەیامن ئەوە پتر كلتۆری و تشتێ سروشتی نیشا بدەم، چنكو نوكە پلاستیك زێدەبوویە.
