هیڤیا وێ ئەوە پێشانگەهەكێ ل دهۆكێ ڤەكەت
ئەڤرۆ
شاكر ئەتروشی:
جیهان محەمەد عەلی، شێوەكارا بەرنیاسا رۆژئاڤایێ كوردستانێ، كو ئەڤە شازدە سالن ل باژێرێ ڤیەنا پایتەختێ وەلاتێ نەمسا دژیت، د دیدارەكێ دا بۆ رۆژناما ئەڤرۆ دیاركر كو ل ناڤەراستا ڤێ هەیڤێ ئەو دێ پێشانگەها تایبەت ل باژێرێ ڤیەنا ڤەكەت و ل هەیڤێن پێنج و شەش ژی دێ پشكداریێ د دو پێشانگەهێن هەڤپشكدا كەت و ناڤەرۆكا كەڤالێن وێ ل دۆر سروشتی و ئێش و ئازارێن ژنانە.
جیهان، كو ژ دایكبوویا سالا (1972) یە و ژ باژێركێ جندریس سەر ب دەڤەرا عەفرینێ ڤە هێشتا گۆت: پشتی ژ نەچاری ئەم ژ وەلاتێ خوە دەركەفتین و گەهشتینە وەلاتێن بیانیان پتر كەلا خەریبیا وەلاتی خوە ل د دلێ مندا، لەورا من بزاڤكرن ب رێیا چێكرنا كەڤالان خەمێن خوە سڤكبكەم و هەتا نوكە من چەندین پێشانگەهێن تایبەت ل چەند وەلاتێن عەرەبی و ئۆرۆپی ڤەكرینە، هەروەسا پشكداری د چەندین پێشانگەهێن هەڤپشك ژی دا كریە، لێ هیڤیا من ئەوە ئەز بهێمە هەرێما كوردستانێ، ب تایبەت ژی پارێزگەها دهۆكێ و پێشانگەهەكێ لێ ڤەكەم و ئەڤە دەمەكە ئەز بۆ وێ چەندێ یا كاردكەم.
