هیڤیا گەنجایە ببنە خودان كار و پروژە
سولین سلێمان:
د جیهانێ دا گەنج ل سەر چەند بیاڤەكا دابەش بوینە وەكی كارمەند د كەرتێن تایبەت و گشتی دا و خودان كارێ سەربخۆ و بێ كار، ڤەكۆلەرەكێ جڤاكی ژی گۆت: هەر ئێك ژ ڤان دابەشبونان كارتێكرنێن خۆ ل سەر كەسایەتی و هزرا گەنجان هەیە.
لاس هێرش، ڤەكۆلەرێ جڤاكی د دیدارەكێ دا بۆ ڕۆژنامەیا ئەڤرۆ دیار كر كو دەمێ مرۆڤ دبیتە خودان كارەك سەربخۆ ئەڤە ئێكە ژ فاكتەرێن هەرە گرنگ ژبۆ بدەستڤەئینانا سامانی ژلایێ گەنجانڤە و گۆت: گەنج د بێبەهر نین ژ ڤێ ڤەكرنا ب لەز، ب تایبەت ژبەر رەوشا نۆكە یا ئابورییا هەرێما كوردستانێ و نەبونا دامەزراندنێ د كەرتێ گشتیدا ، دیسا ژی نەبونا پلانێ ژبۆ رێكخستنا بسپۆریێن گەنجان ئەگەرەكێ دی.
ڤەكۆلەرێ جڤاكی گۆت: ئەڤجا داكو گەنج بشێت ببیتە خودان سەرمایێ خو پێدڤیە حوكمەت قەرزێن بچووك بدەتە گەنجان ژبۆ دامەزراندنا پرۆژێن بچوك، هەروەسا حوكمەت خۆلێن پیشەیی ژ بۆ گەنجن ڤەكەت لسەر چاوانیا ڤەكرنا پوژێن بچوك و چاوانیا ب دستڤەئینانا داهاتەكێ، هەروەسا پێشكێشكرنا پرۆژەیان و هزران ب رێكخراوێن گەنجان داكو گەنج مفای ژێ ببینن و ببنە خودان كار.
لاس هێرش د بەردەوامیا ئاخفتنێن خۆدا گۆت: تەكنەلۆژیا ژی ئێكە ژ وان رێكێن ب ساناهی كو گەنج دشێت ب ڕێكا ئونلاین ببیتە خودان كار و داهات، نوكە كارێ ئونڵاین ئێكە ژ كارێن هەرە بەرفرەهـ و پر بەرهەم، بەلێ دڤێت گەنج خۆ ماندی كەن و بەردەوام لدووڤ كار و پرۆژەیان بگەرن نەك ل جهێ خۆ ب رویننە خار و هەر بێژن شول نینە گەر نەبیت ژی بلا ب ئافرینن.
