هیڤیدارم لیستا پاراستنا قەوارەیێ هەرێما کوردستانێ سەرکەڤیت
دیدار، هۆشەنگ تاجر:
دارا ناتق چاڤدێرێ سیاسی ل وەلاتێ بەلجیکا د دیدارەکا تایبەت دا بۆ رۆژنامەیا ئەڤرۆ دیار کر، ئەڤ هەلبژارتنە ژ بۆ خەلکێ هەرێما کوردستانێ گەلەک گرنگن، چونکی چەندین سالن ل بەغدا هێزێن شیعە پیلانان ل دژی هەرێما کوردستانێ دگێرن و گرنگە ڤێجارێ خەلکێ کوردستانێ ب رێژەیەکا مەزن بچنە سەر سندۆقێن دەنگدانێ و بەرسڤا پیلانێن بەغدا بدەن و گۆت: (هیڤیدارم ڤێجارێ کەسێن بهێز و نەتەوەیی بچنە بەغدا، بێگومان خەلکێ کوردستانێ دزانیت کا د چەند سالێن بۆری دا کیژ هێزێ شیایە ل هەمبەر پیلانێن دوژمنێن گەلێ کوردستانێ راوەستیت و قەوارەیێ هەرێما کوردستانێ بپارێزیت، ژ بەر ڤێ یەکێ ژی سەرکەفتنا لیستا پارتی دیموکراتی کوردستان و بهێزبوونا کوردان ل پەرلەمانێ ئیراقێ گەلەک یا گرنگە).
چاڤدێرێ سیاسی ئەو یەک ژی دیار کر، پەرلەمانێ بهێت یێ ئیراقێ دێ گەلەک جودا بیت، چونکی دهێتە چاڤەرێکرن گەلەک یاسا بهێنە دەرخستن، هەکە کورد ل پەرلەمانێ بهێت یێ بەغدا بهێز نەبن دێ دژبەرێن هەرێما کوردستانێ شێن گەلەک یاسایان ل دژی هەرێما کوردستانێ دەرخینن و دێ زیانێن گەلەک مەزن گەهنە هەرێما کوردستانێ و دێ مەترسی ل سەر دەستکەفتێن هەرێما کوردستانێ دروست بن و گۆت: (ژ بەر ڤێ یەکێ ژی بهێزبوونا کوردان د پەرلەمانێ بهێت یێ ئیراقێ دا گەلەک گرنگە، ب تایبەتی ژی هەبوونا پارتی دیموکراتی کوردستان وەکو هێزەکا کاریگەر و نەتەوەیی کو چەندین سالن ل ئیراقێ شیایە کارێن گەلەک مەزن و باش ژ بۆ خەلکێ کوردستانێ بکەت، ژ بەر ڤێ یەکێ ژی سەرکەفتنا لیستا پارتی دیموکراتی کوردستان د ڤان هەلبژارتنان دا دێ بیتە ئەگەرێ بهێزبوونا کوردان ل بەغدا).
دارا ناتق د پشکەکا دی یا ئاخڤتنا خوە دا ئاماژە ب ڤێ یەکێ ژی کر کو گەلێ کوردستانێ ئەڤرۆکە هەموو تشتەکێ دبینیت، خەلکێ کوردستانێ گەلەک هشیارە و دزانیت کا د چەند سالێن بۆری دا کێ شیایە قەوارەیێ هەرێما کوردستانێ بپارێزیت، ژ بەر ڤێ یەکێ ژی ئەز دبێژم سەرکەفتنا لیستا پارتی دیموکراتی کوردستان کو هێزا پاراستنا قەوارەیێ هەرێما کوردستانێ یە ژ بۆ هەموو کوردان و ب تایبەتی ژی ژ بۆ پاشەرۆژا هەرێما کوردستانێ گەلەک گرنگە و گۆت: (ئەز ب باوەرم هەر کوردەکێ دڤێت ئەو هێزە سەرکەڤیت کو بشێت د پاشەرۆژا دا هەم ل بەغدا خزمەتا خەلکێ کوردستانێ بکەت و هەم ژی ل دژی پیلانێن دوژمنان دەرکەڤیت و هەروەسا بەرەڤانیێ ل مافێن رەوا یێن گەلێ کوردستانێ بکەت، ئەو ژی لیستا وەلاتپارێز و لیستا بەرگریێ یە، لیستا پارتی دیموکراتی کوردستانە کو سەرکەفتنا وێ لیستێ د خزمەتا هەموو خەلکێ هەرێما کوردستانێ دایە و بێگومان دێ کاریگەریا خوە یا گەلەک باش ل سەر پارچەیێن دی یێن کوردستانێ ژی هەبیت، گرنگە وەلاتیێن هەرێما کوردستانێ ژی ل گۆر رەوشا نها و راستیێن هەی هەست ب بەرپرسیاریا خوە بکەن و ب رێژەیەکا باش پشکداریێ د ڤان هەلبژارتنان دا بکەن).
