هیڤیدارین سیاسەتا ترامپی نەبیتە ئەگەرێ ئالۆزیێن مەزن
ئیسماعیل بەقایی پەیڤدارێ وەزارەتا دەرڤە یا ئیرانێ دیار کر، وەکو ئیران وان نەڤێت رەوشا نها یا ل رۆژهەلاتا ناڤین ئالۆزتر لێ بهێت، بەلکو دڤێت هەموو ئالی کار بۆ ئارامیێ بکەن، ئیرانێ بەری نها ب توندی هۆشداری ژی دایە ئسرائیلێ کو ئێرشی ئیرانێ نەکەت، چونکی ئەو یەک دێ بیتە ئەگەرێ شەڕەکێ مەزن و د بەرژەوەندیا چو ئالیەکێ دا نینە.
ناڤهاتی سەبارەت ب سیاسەتا ترامپی ژی دیار کر، ئەو هیڤی دکەن پشتی ترامپ وەکو سەرۆکێ ئەمریکا دەست ب کارێ خوە بکەت سیاسەتا وی وەکو یا بەری چار سالێن نەبیت، چونکی وی دەمی ترامپی گەلەک شاشی ل دژی ئیرانێ کرن و رەوشا رۆژهەلاتا ناڤین ژی گەلەک ئالۆزتر لێ هات، وەکو ئیران ئەو دخوازن ترامپ سیاسەتەکا راست ل دۆر پرسان نها ل رۆژهەلاتا ناڤین برێڤە ببەت دا پرسێن هەی بهێنە چارەسەرکرن، هەکە ترامپ سیاسەتەکا جودا هەبیت بێگومان دێ ئالۆزیێن هەی زێدەتر لێ هێن.
