هیڤییەك
عاصمە فەخری
د ژیانا خوە هەموویێ دا هەر ل زارۆکینیێ و هەتا گەنجاتییا خوە بۆ رۆژەکێ بتنێ ژی من ل بیر نینە دایکا من یان بابێ من یان ئێک ژ ئەندامێن خێزانا من ئەز هەمبێزکربم یان ب پەیڤەکێ هەستێ حەزژێکرنێ یان دلۆڤانییێ ب من بەخشیبیت، بابێ منێ هەردەم و گاڤ ناڤچاڤ گرێ، نە جارەکێ پرسیارا ڕەوشا مە دکەت، نە جارەکێ گفتوگۆیەکێ دگەل مە دکەت، تشتێ ئەو دکەت بتنێ ئاخفتنێن زڤر و شکاندنا مەیە، پتریا دەمێ خوە ل کاری و چایخانێ دبۆرینت و دەمێ د مالدا بیت کەس ژ مە نەوێریت ژ جهێ خوە ڕابیت گەنگەشەکێ دگەل بەرانبەری خوە بکەت، هەر وەکو ئەم نەیارێن وی نە نەکو زارۆکێن ژ خوینا وی نە!! دایکا من ژی بتنێ مژویلی کارێن مالێ یە، ئاگەھ ژ مە نینە ئەم چدکەین و پێدڤی چوینە، نوزانم دبێژنە ئەڤێ خێزان؟ دبێژنە ئەڤێ ژیان؟ ئەڤا ئەم تێدا دژین دبێژنە ئەڤێ مال یان بتنێ ڕێزکرنا چەند ڕێزەکێن بلۆکانە کو ب خانی دهێتە ناڤکرن یا مە د خواست نە خانی و خوارن و جلوبەرگێن بها گرانبوون، بتنێ مە هەمبێزا گەرما دایک و بابێ خوە دڤییا .
ئەگەر شەڤەك و رۆژەك لسەر مە دەربازبوون و ئەم نەبووینە شاهدێن جەنگێ دایك و بابێ خوە ئەو رۆژ بۆ مە وەکو جەژنەکێ یە؛ چونکی دەم و رۆژێن ب ئارامی لسەر مە دبۆرن دکێمن، نزانم فاکتەرێن شەرێن وان یێن بەردەوام چنە؟ هەردەم و گاڤ ب شەر و دلمایینە ژ هەڤدو دبیت ژی ژبەر ئەو نەگەهشتینە عەشقێن خوە چونکی هەڤژینیا وان نە هەلبژارتنا وان بوو، بەلکو یا خێزانێ و یا عەشیرەتێ بوو، ژبەرکێشەیەکێ ببوو. شەر دناڤبەرا مالباتا دایكا من و بابێ من دا پەیدا ببوو.. ئەو ڕوویدانە بوو فاکتەرێ خویندارییێ، ئێکانە ڕێیا چارەسەریێ ژی بتنێ پێکئینانا هەڤژینیێ بوو دناڤبەرا دایك و بابێ من دا، ئەو بوونە ئەگەر ئێدی چو کەس ژ هەردو مالباتان نەهێنە کوشتن و ب ئارامی و هەروەکو چو چێنەبووی ژیانا خوە بەردەوام بکەن. قوربانییێن ئەڤێ خویندارییێ ژی خێزانا مە بوو، ئەو خێزانا چو جارا نەبوویە خێزان، بتنێ بناڤ خێزان بتنێ بناڤ دایك و باب، ڕاستە ئەم لژێر ئێک بانی دژین بەلێ دل و هەستێن مە گەلەک ژ هەڤدو ددویرن مینا دویراتییا هەیڤێ هەتا دگەهیە ئەردی؛ ژبەر ڤان شەرێن بەردەوام و پەراوێزخستنا مە ژلایێ خێزانێ ب هەموو ڕەنگان ئێدی من وەسان هەست دکر ئەز گەهشتیمە كۆپیتکا بێ هیڤیبوونێ کو ئەز کەسەکم ب کێر چو ناهێم نەشێم چو بکەم هند بێ هیڤی ژ خێزانێ.. هند بێ هیڤی ژ ژیانێ.. گەلەک جاران دهاتە هزرا من خوە بکوژم و ژ ئەڤێ ژیانا نەفرەتی قورتالببم.
نیڤا شەڤێ یە و میلێن دەمژمێرێ دوازدە و بیست و دو خۆلەک نیشانددەن، خەو ژ چاڤێن من زیزبوویە، دناڤ نڤینێن خوەدا دگەڤزم، نەشێم بتنێ بۆ دو خۆلەکان ژی بنڤم؛ د بیردانکا مندا دناڤ گێلەشۆکا هزرێن مندا دناڤ مەژیێ مندا د لەیزن، هەروەکی خوەشییێ ژ ئازاردانا گیانێ لاواز و بێزار ژ هەر کەس و هەر تشتی دبینن ڕێیێ نادەنە کەلواشێ منێ بێ هیڤی منێ بێزار ئارام بیت، ئەگەر خوە بۆ دەمەکێ چەندێ کورت ژی بیت. ب دروستی بیرا من ناهێت کەنگی بۆ دویماهیك جار ئەز ب ئارامی نڤستبووم، هەر هەستێ ئارامیبوونێ من ژبیرکریە. دناڤ گوندێ مە دا دبیت بتنێ ئەز بم یێ بێ هیڤی و دویر ژ مرۆڤان، هەتا دویر ژ خێزانێ، نزانم ئەگەر چییە؟ دبیت ژی دزانم فاکتەر ئەو ژینگەها ئالوزە ئەوا ئەز تێدا ژیایم.
هندەك جاران خوە من تاقەت نینە ژناڤ نڤینێن خوە دەربکەڤم! نزانم چەوان گەهشتیمە ئەڤی ئاستێ بێ هیڤیبوونێ؟ پشتی دەمەکێ درێژ، ئەڤرۆ دلێ من خواست خوە بەردەمە ناڤا کۆلانێن گوندی و دویر بچم.. د ڕێیێدا من دارێن هژیران و دارێن هناران و دارێن باھیڤان و دارێن گووزان و گەلەک جۆرێن دییێن دارا ددیتن بەلێ بەلگێن هەموویان ب ئێکجاری زەرببوون و ب بەردەوامی و ب شێوەیەکێ هەڕەمەکی د وەریان و دگەل ئێکەم کەفتن روویێ ئەردی ماچی دکرن. یا باش دەمێ دبتە وەرزێ بهارێ شوونا وان بەلگێن ب ڕەنگێ رۆژێ تامدایی دوەریێن و دچرمسن و ژناڤدچن و چو شوینوارێن وان نامینن دوبارە ب سەدان بەلکی ب هزاران بەلگ دێ ب خەملەکا جوان و گەش ب ڕەنگێ ژیانێ کەسك بن. دیمەنێن داران و سروشتێ جوانێ گوندی دگەل گێلەشۆکا هزرێن من تێکەلببوون لێ دڕاستیدا ئەوان هەموو دیمەنان سەرانجا من بۆ خوە ڕاکێشابوو. ئەڤ هەموو جوانییە د ژیانێ دا هەیی و ئەزێ بێ هیڤی ژ ژیانێ، من دگۆت ب ڤی سروشتی و ژیانا هندە جوان ژیان بەردکەڤیت بژیم، من دگۆتە خوە ئەڤە دارن و ژ دوبارە کەسكبوونا بەلگێن خوە بێهیڤی نابن چونکی ل وەرزێ بهارێ ب خەملەك و ڕەنگەك جوداتر ژ ڕەنگێ ژیانێ دێ هێنە هەبوونێ ڤە. ئەرێ پا ئەز مرۆڤم.. بەلێ مرۆڤەك مریمە، بتنێ رۆحا من هێشتا ساخە؛ لێ ئێدی من بریاردا وەك مرۆڤەك زیندی بژیم، ب هیڤیبوون بژیم، خوە د دژوارترین ڕەوش و کاوداناندا هەر ب هیڤیبم کو دێ رۆژ ل من هەلت. جاران هیڤیەك بتنێ تێرا هندێ هەیە کو دوبارە مرۆڤی بزڤڕینت دناڤ ژیانێ دا ڤە، ژبەرهندێ ئەز دێ ب هیڤییەکێ بەرامبەری هەر بێهیڤیبوونەکێ جەنگم و دزانم سەرکەفتییێ ئەڤی شەری دێ ئەز بم.