هیڤیێن نه‌ته‌وا كورد و بارزانی و كۆچكا سپی
بانگ هێشكرنا فه‌رمیا وه‌لاتێن ئێكگرتیێن ئه‌مریكا بۆ سه‌ره‌دانا سه‌رۆكێ هه‌رێمێ سه‌رۆك مه‌سعود بارزانی، چه‌ند مژار و ڕامانه‌كا بخوه‌ڤه دبینیت, ل دووڤ نێرین و دیتنێن مه ئه‌ڤ سه‌ره‌دانه‌یا (سیاسی و دیپلۆماسیه, له‌شكریه, ئابۆریه, نه‌خشه‌كێشانه, چاره‌سه‌ریه. . هتد.
ئه‌ڤ سه‌ره‌دانه سیاسیه, چونكو كۆمه‌كا وه‌زیر و كاربه‌ده‌ستێن حوكمه‌تا هه‌رێما كوردستانێ ل گه‌ل شاندێ سه‌رۆك بارزانینه, دبیت ئه‌و وه‌زیر هنده‌ك پرۆتۆكولێن سیاسی مۆركرن, ل گه‌ل وه‌زاره‌تێن په‌یوه‌ندار وهه‌كویفێن خوه ل ئه‌مریكا.
سه‌ره‌دانه‌كا له‌شكری یه, چونكو ئه‌م هه‌می دزانین ئه‌ڤرۆ رۆژهه‌لاتا ناڤێن و عێراق و كه‌نداڤا عه‌ره‌بی ب گشتی و كوردستان ب تایبه‌تی, د چ بارۆدۆخ دا دچیت, شه‌رێ تیرۆرستێن (داعش) ل عێراقێ و سووریێ دیسا هه‌ڤپه‌یمانیا وه‌لاتێن عه‌ره‌بی ب سه‌ركردایه‌تیا عه‌ره‌بستانا سعوودی بۆ سه‌ر ولاتێ یه‌مه‌نێ وحوسیان, ژ لایه‌كێ دیڤه ئه‌م دزانین شه‌ره‌كێ سه‌پاندی هاتیه سه‌ر كوردستانێ و دبیت به‌رژه‌وه‌ندیێن ئه‌مریكا و ولاتێن رۆژئاڤا د مه‌ترسیێدا بن, وه‌كو هاتیه خوه‌یاكرن به‌رسینگ گرا ڤی شه‌ڕی و لابرنا وان مه‌ترسیێن ئه‌و وه‌لات هه‌ست پێ دكه‌ن تا نۆكه ل سه‌ر ئه‌ردی ب تنێ هێزا پێشمه‌رگه‌یه, سینگێ خوه كریه چه‌په‌ر و مه‌تال و به‌ره‌ڤانیێ ژ ئاخا كوردستانێ و به‌رژه‌وه‌ندیێن ولاتێن به‌حس لێ هاتیه كرن دكه‌ت, بێگومان ڤی شه‌ری ژی پێدڤی ب چه‌كێ گران ومۆدێرن هه‌یه, له‌ورا ئه‌م باوه‌رین “سه‌رۆك بارزانی” دێ ڤێ داخوازێ ژ ولاتێن ئێكگرتی كه‌ت, وه‌كو هاتیه خوه‌یاكرن به‌ری چه‌ند رۆژه‌كا پرۆژه‌ك هاتبوو دورستكرن ژ لایێ كۆماریێن ئه‌مریكا ڤه, كو چه‌كی ڕاسته‌وخوه بده‌نه كوردستانێ و هێزێن پێشمه‌رگه, “سه‌رۆك بارزانی” دێ بزاڤێ كه‌ت ئه‌و پرۆژه سه‌ر بگریت دگه‌ل دانا هنده‌ك گرێنتیان بۆ حوكمه‌تا ئه‌مریكا كو ئه‌و چه‌ك ناكه‌ڤێته دده‌ستێن تیرۆرستاندا, دیسا دێ بزاڤێ كه‌ت پتر ئه‌مریكا گرنگیێ ب هێزێن پێشمه‌رگه‌ی بده‌ت ژلایێ ته‌كنۆلۆژیایێ وچه‌كێن پێشكه‌فتی ڤه وهه‌ر وه‌سا راهێنان ب پێشمه‌رگه‌ی بهێنه كرن ژلایێ راهێنانكه‌رێن ئه‌مریكی و له‌شكرێ ئه‌مریكی ڤه.
بارۆدوخێ عێراقێ رۆژ ب رۆژ به‌ره‌ڤ خرابیێ دچن, وئه‌ڤ بارۆدۆخه ڕاسته‌وخوه كارتێكرنێ ل سه‌ر هه‌رێما كوردستانێ دكه‌ت, بارزانی دێ بزاڤێ كه‌ت حكومه‌تا ئه‌مریكا رازی بكه‌ت كو ئێدی سنۆره‌ك بۆ حوكمه‌ت و كاربه‌ده‌ستێن به‌غدا بهێنه دانان, ژ به‌ر كو خه‌لكێ كوردستانێ باوه‌ری ب حوكمه‌تا عێراقێ و عه‌ره‌بان نه‌مایه, ب دیتنا مه هه‌كه ب ڤی ره‌نگی بچیت, دبیت ئه‌ڤ چه‌نده دێ كارتێكرنێ ل به‌رژه‌وه‌ندیێن ئه‌مریكا ولاتێن رۆژئاڤا كه‌ت ل رۆژ هه‌لاتا ناڤین, له‌ورا دڤێت ئه‌مریكا بۆ خوه ل هه‌ڤپه‌یمانێن نوو بگه‌رێت و دبیت دقوناغا ئه‌ڤرۆ دا باشترین هه‌ڤپه‌یمان كورد بن, چونكو كوردان باوه‌ری ب توند وتیژیێ و تیرۆرێ نینه و هه‌می ئومێدا وان پێكڤه ژیانه و گرۆڤه ژی ل سه‌ر هندێ تا نۆكه چو كه‌سه‌ك ل كوردستانێ نه ل سه‌ر بیر وباوه‌رێن خوه یێن ئاینی یان ژی نه‌ته‌وه‌یی یان كه‌سۆكی نه‌هاتیه كوشتن یان سزادان, به‌لكو هه‌می خه‌لكێ كوردستانێ وه‌كو ئێكن ل به‌رامبه‌ر یاسایێ و هه‌ر كه‌سه‌ك ئازاده چ په‌رێسیت یان دبێژیت.
ژلایێ ئابوری ڤه, وه‌سا دهێته چاڤه‌رێ كرن هنارتنا پترۆلا كوردستانێ دێ مژاره‌كا گه‌رم بیت د دیدار و چاڤ پێكه‌فتنێن “سه‌رۆك بارزانی”, سه‌رۆك دێ بزاڤێ كه‌ت دان پێدانه‌كێ ژ ئه‌مریكا وه‌رگریت كو د پێشه‌رۆژێدا ئه‌مریكا نه‌بیته رێگر دهنارتنا پترۆلا هه‌رێما كوردستانێدا بۆ وه‌لاتێن جیهانێ, دێ هاندانا كومپانیایێن ئه‌مریكی كه‌ت كو وه‌به‌رهێنانا زێده‌تر ل كوردستانێ بكه‌ن و دێ هه‌رێما كوردستانێ هه‌می ئاسانكاری و هاریكاریان بۆ وان كۆمپانیان كه‌ت.
دبیت “سه‌رۆك بارزانی” كێشێن كوردان ل رۆژهه‌لاتا ناڤێن ب شێوه‌كێ گشتی ول توركیا و سووریا ب تایبه‌تی دگه‌ل “كوچكا سپی” به‌حس بكه‌ت, چونكو ئه‌م دشێن بێژین كورد راگرێن بلانسا ئارامیێ و ته‌ناهێ نه و هه‌كه مافێن وان بهێنه دان دێ ئارامی و سه‌قامگیری پتر ل ده‌ڤه‌رێ په‌یدا بیت, چونكو كورد دئاماده‌نه شه‌ڕێ تیرۆرێ و تیرۆرستان بكه‌ن ل هه‌ر جهه‌كێ لێ سه‌رهلدن.
بارزانی, بزاڤێ دكه‌ت تاكه هیڤیا تاك كورد دگه‌ل “كوچكا سپی” به‌حس بكه‌ت كه ئه‌و ژی ده‌وله‌تبوونا كوردستانێ یه, چونكو ب ڕاستی ئه‌ڤه هیڤی و ئومێد و خه‌ونا هه‌می كوردانه ل هه‌ر قورنه‌ته‌كێ دونیایێ كو كورد لێ بن, كورد ڤێ پێنگاڤێ ژ هه‌می پێنگاڤان ب فه‌رتر دزانن و ل پێناڤێ ڤێ هیڤیێ ب سه‌دان هزاران كه‌سان گیانێ خوه كریه قوربان و بارزانی دێ بزاڤێ كه‌ت ئێدی كورد نه‌بنه قوربانێن رێكه‌فتنێن نێڤنه‌ته‌وی وه‌كو چاوان به‌ری سه‌د سالا هاتیه‌كرن ل رێكه‌فتناما سایكس پیكۆ, وه‌كو ئه‌م دزانین ل سه‌د سالا سایكس پیكۆ ب دووماهی دهێت وده‌م هاتیه ئێدی كورد بریارا خوه بده‌ستێن خوه بده‌ن و ئێدی باجا عه‌ره‌بێن سنه نه‌ده‌ن, هه‌ر وه‌كو چاوان به‌ری سه‌د سالان دایه وب زۆر هاتنه پێكڤه‌نیساندن ل گه‌ل عه‌ربێن سونه داكو هه‌ڤكێشی و هه‌ڤسه‌نگیی ل گه‌ل شێعێن عێراقێ په‌یدا ببیت, بارزانی بزاڤ كرینه گه‌ل “كوچكا سپی” دوباره ئه‌ڤه روونه‌ده‌ته ڤه, دیسا كێشێن ده‌ڤه‌رێن ڤه‌قه‌تیایی ژ كوردستانێ دێ بارزانی بزاڤێ كه‌ت,”ئه‌مریكا و كۆچكا سپی”رازی كه‌ت یا هاریكار بیت و نه بیته رێگر د چاره‌سه‌ركرن و ڤه‌گه‌راندنا وان ده‌ڤه‌رێن دبێژنێ مادێ(140) كو ڤه‌گه‌رنه سه‌ر هه‌رێما كوردستانێ, چونكو سنۆرێن وان ده‌ڤه‌ران ب خویێ هاتینه كێشان و نه‌خشاندن, و ب چ نرخێ هه‌بیت كورد ده‌ست به‌رداری ده‌ڤه‌رێن ڤه‌قه‌تیایی ژ كوردستانێ نابن.
بارزانی, دێ بزاڤ كرینه لۆبیه‌كی ل ئه‌مریكا دورست بكه‌ت, بال و پشته‌ڤانیا بزنسڤان و سیاسه‌تمه‌دار و كاربه‌ده‌ست و ره‌وشه‌نبیرێن ولاتێن ئێكگرتی بۆ كوردستانێ ڤه‌كێشیت.
