هێرشێن ل دژی هێزێن توركیا ل سووریێ زێده‌تر بووینه
ئه‌ڤرۆ:
وه‌زاره‌تا به‌ره‌ڤانیا توركیا دوهی راگه‌هاند كو د ماوه‌یێ دو رۆژێن بۆری دا ل ئدلبێ و بابێ هێزێن سووریێ هێرشێ بنگه‌هێن سه‌ربازی یێن هێزێن توركیا و هێزێن ئۆپۆزسیۆنێ كرینه و د ئه‌نجاما وان هێرشان دا هه‌تا نها دو سه‌ربازێن توركیا جانێ خوه ژ ده‌ست داینه و چار ژی بریندار بووینه.
ده‌زگه‌هێن راگه‌هاندنا توركیا ژی دیار دكه‌ن كو رژێما سووریێ ب پشته‌ڤانیا روسیا ده‌ست ب هێرشێن ئه‌سمانی ل دژی هێزێن توركیا ل گه‌له‌ك ده‌ڤه‌ران كریه ب تایبه‌تی ژی ل ئدلبێ و رژێما سووریێ دڤێت ئدلبێ ژ هێزێن سه‌ر ب توركیا و سه‌ربازێن تورك پاقژ بكه‌ت، لێ هه‌تا رێككه‌فتنه‌ك د ناڤبه‌را توركیا و روسیا دا نه‌هێته كرن توركیا هێزێن خوه ژ سووریێ ڤه‌ناكێشیت.
ئه‌و یه‌ك د ده‌مه‌كێ دایه كو ئالۆزیێن د ناڤبه‌را توركیا و روسیا دا ل دۆر پاشه‌رۆژا سووریێ دژوارتر بووینه و وه‌زیرێ ده‌رڤه یێ روسیا به‌ری چه‌ند رۆژان دیار كربوو كو دڤێت هه‌موو هێزێن بیانی و د ناڤ دا ژی هێزێن توركیا ژ ئاخا سووریێ ده‌ركه‌ڤن و رێزێ ل سه‌روه‌ریا ئاخا سووریێ بگرن، لێ توركیا ژی دیار دكه‌ت كو هه‌تا ره‌وشا سووریێ ئالۆز بیت ئه‌و نه‌چارن سنورێن خوه بپارێزن.
هه‌ر دوهی هێزێن توركیا ب چه‌كێن گران ده‌وروبه‌رێن عه‌فرینێ توپباران كرن و ل گۆر زانیاریان چه‌ندین شه‌رڤانێن هێزێن سووریا دیموكرات و دو وه‌لاتیێن سڤیل د ئه‌نجاما توپبارانا سوپایێ توركیا دا ب گرانی بریندار بووینه.
چاڤدێرێن سیاسی ژی دیار دكه‌ن كو روسیا دڤێت توركیا ل سووریێ ته‌نگاڤ بكه‌ت، چونكو ده‌مه‌كه توركیا ل ئوكرانیا و هنده‌ك وه‌لاتێن دی ل دژی به‌رژه‌وه‌ندیێن روسیا كار دكه‌ت و به‌ری نها ژی سیرگێی لاڤرۆڤ هۆشداری دابوو توركیا كو ده‌ستێوه‌ردانێ د كاروبارێن ناڤخوه‌یی یێن وه‌لاتێن جیرانێن روسیا دا نه‌كه‌ت، چونكو ئه‌و یه‌ك دێ ئه‌نجامێن خوه یێن خراب هه‌بن. ژ به‌ر هندێ ژی یا نها ل سووریێ روو دده‌ت وه‌كو كارته‌كا فشارێ یه ل دژی توركیا دا توركیا نه‌چار بیت هه‌لویستێ خوه ل هه‌مبه‌ر روسیا و به‌رژه‌وه‌ندیێن وێ ل رۆژهه‌لاتا ناڤین ب گوهۆریت.
