هێزا مۆرالا باسكێت بۆلا زاخۆ بەرانبەر دیجلە
قەیس وەیس:
دهێتە چاڤەڕێ كرن سوبەهی پێنچ شەمبی سێ یاریێن گەڕا چارێ ژ هەڤڕكیێن خولا پلا نایابا ئیراقێ یا باسكێت بۆلێ ل یاریگەهێن جودا ل سەر ئاستێ پێشكەفتیان و تازەپێگەهشتییان بهێنە ئەنجامدان، نوونەرا بەهدینان یانەیا زاخۆ دێ دناڤ ئەرد و جەماوەرێ خوە دا مێڤاندارییا یانەیا دیجلە ئەلجامعە یا بەغدایی كەت ئێك ژ بهێزترین یاریێن وێ د خولێ دا.
جەماوەرێ وەرزشی یێ كوڕێن خابووری ب ژڤانن بۆ پشتەڤانیا هەردو تیمێن خوە ل سەر ئاستێ تازەپێگەهشتییان دەمژمێر دو یێ پشتی نیڤرۆ، ل سەر ئاستێ پێشكەفتیان دەمژمێر چارێ ئێڤاری ل هۆلا گرتییا بنگەهێ وەرزشی ل باژێرێ زاخۆ.
زاخۆ دێ ب پشت گەرمییا جەماوەرێ خوە یێ هەردەم هۆلا یاریگەهێ پر دكەن و پشتەڤانییەكا بەردەوام بۆ دكەت و شیان و شارەزاهییا یاریزانێن خوە تایبەت هەرسێ پیشەكارێن رەشاد حسێن، مایكل مەككۆل و ریتچارد چاكسۆن و دیسان یاریزانێن باژێری ژ وانا كاپتنێ تیمێ چەگەر عەلی و برایێ وی موراد عەلی، لێ بەرانبەردا تیما دیجلە ئەلجامعە بهێز هاتییە دناڤ خولێ دا تایبەت پشتی پشكدارییا وێ د قارەمانییا عەرەبی دا یا سەركەفتی بوو.
