هێزێن ئەمریکا جارێ دێ ل سووریێ مینن
مامۆستایەکێ زانکۆیێ ل ئەمریکا دیار دکەت، ب هاتنا ترامپی دێ سەرەدەمەک نوو ل ئەمریکا دەستپێکەت، لێ د سیاسەتا دەرڤە دا بێگومان ترامپ تشتەکێ ناکەت کو ب زیانا ئەمریکا بیت و ب تایبەتی ژی ل سووریێ، چونکی هەڤڕکێ سەرەکی یێ ئەمریکا ئانکۆ رۆسیا ل سووریێ نەمایە.
جیهان توخال مامۆستایێ زانکۆیا کالیفۆرنیا د داخۆیانیەکێ دا بۆ رۆژناما دیوار یا تورکی دیار کر، کو ترامپ دێ د قۆناغا ئێکێ یا ده‌ستهه‌لاتا خوه دا هنده‌ک بریارێن دژوار دەت، ب تایبه‌تی د بابەتێ ئابووری دا و بۆ ژ نوو ڤه دیزاینکرنا ئه‌مریکا لاتین و که‌نه‌دا دێ هندەک بریارێن توند ژی دەت و گۆت: (د سیاسەتا دەرڤە دا هندەک بابەتێن گەلەک گرنگ هەنە کو هەموو وەلاتێن جیهانێ ژی نها چاڤەرێ نە دا بزانن کا دێ سیاسەتا ترامپی چ بیت، ئێک ژ وان ژی بابەتێ ئسرائیلێ یە و هەروەسا شەڕێ ل ئۆکرانیایێ و خالا دی یا هەری گرنگ و کاریگەر ژی بێگومان بابەتێ ئیرانێ یە، چونکی ئسرائیل وەکو هەڤپەیمانا ئەمریکا د سەردەمێ ترامپی دا چاڤەرێیە ئەمریکا بریارێن گەلەک توند ل دژی ئیرانێ بدەت).
ناڤهاتی ئەو یەک ژی دیار کر، ترامپ دێ بزاڤا دێ یەکێ کەت کو باجا ل سەر کەلوپەلێن چینێ یێن بۆ ئەمریکا دهێن زێدەتر لێ بکەت دا وەسا پتر گرنگی ب بەرهەمێ ئەمریکی بهێتە دان، هەروەسا دێ باجێ ژی ل سەر خەلکێ ئەمریکا کێم کەت، چونکی ژ بۆ ترامپی یا گرنگ ئەوە بشێت د بیاڤێ ئابووری دا هندەک تشتێن باش بکەت دا کاریگەریا خوە یا ئەرێنی ل سەر ژیانا وەلاتیێن ئەمریکا هەبیت، ژ بەر ڤێ یەکێ ژی ترامپ بەردەوام دبێژیت ئەو دێ شەڕێن نها ب دووماهی ئینیت، چونکی ژ بۆ ترامپی نەمانا شەڕی دێ بیتە ئەگەرێ پەیداکرنا بازارەکێ باش و ئەو دێ شێت وەسا پتر ئابووریا ئەمریکا بهێزتر لێ کەت.
مامۆستایێ زانکۆیێ سەبارەت ب رەوشا سووریێ و سیاسەتا ترامپی ل هەمبەر کوردێن رۆژئاڤایێ کوردستانێ ژی دیار کر، جارێ دێ هێزێن ئەمریکا ل سووریێ مینن، ترامپ ژی باش دزانیت نها رۆسیا و ئیران ل سووریێ نەماینە و ئەمریکا دشێت پێگەهێ خوە ل سووریێ بهێزتر لێ بکەت، لێ ئاریشەکا دی ژی هەیە، ئەردۆغان دشێت گەلەک تشتان پێشکێشی ترامپی بکەت دا ئەمریکا وەسا هێزێن خوە ژ سووریێ ڤەکێشیت و گۆت: (دبیت تورکیا ب هندەک پێشنیازێن جودا وەسا بکەت دا ترامپ بریارەکا دلخوەشکەر ژ بۆ تورکیا بدەت، لێ ئەو یەک ژی وەسا ب ساناهی نابیت، چونکی گەلەک کەسێن نها ترامپی بۆ پۆستێن گرنگ بەربژار کرینە پشتەڤانیێ ل کوردان دکەن، ئەو یەک ژی دێ ئاستەنگان بۆ سیاسەتا تورکیا ل سووریێ دروست کەت، براستی ژی گەلەک یا زەحمەتە مرۆڤ پێشبینیا ڤێ یەکێ بکەت کا دێ د سەردەمێ دەستهەلاتا ترامپی دا ل سووریێ چ روو دەت، چونکی هندەک داخۆیانیێن بەری نها یێن ترامپی ل دۆر سووریێ بووینە جهێ دلگرانیا کوردێن رۆژئاڤایێ کوردستانێ، لێ د سیاسەتێ دا دڤێت مرۆڤ چاڤەرێی هەر تشتەکێ بیت).
ناڤهاتی د دووماهیا ئاخڤتنا خوە دا ئەو یەک ژی نەڤەشارت دڤێت ئەم ڤێ راستیێ باش بدەینە بەرچاڤ کو ئسرائیل دێ کاریگەریەکا گەلەک مەزن ل سەر بریارێن ترامپی هەبیت، ئسرائیلێ ژی نها دڤێت ل سووریێ پێگەهێ خوە بهێزتر لێ بکەت و ژ بەر ڤێ یەکێ ژی بەرپرسێن ئسرائیلێ بەردەوام بەحسێ پاراستنا کوردان ل سووریێ دکەن، ئەو یەک ژی بوویە جهێ دلگرانیا تورکیا، لێ دڤێت ئەم ڤێ راستیێ ژی باش بدەینە بەرچاڤ کو ئەمریکا چو کارەکێ ل رۆژهەلاتا ناڤین ناکەت کو ب دلێ ئسرائیلێ نەبیت و ئەو یەک ژی د بەرژەوەندیا کوردێن سووریێ دایە و گۆت: (لێ د چار سالێن بهێت دا دێ گەلەک گوهۆڕینێن مەزن ل رۆژهەلاتا ناڤین روو دەن، ب تایبەتی ژی ئەمریکا دێ سزایێن گەلەک گران ل سەر ئیرانێ سەپینیت و هەتا دبیت ئەمریکا و ئسرائیل پێکڤە ئێرشی بەرنامێن ئەتۆمی یێن ئیرانێ ژی بکەن، ئەو یەک ژی دێ بیتە ئەگەرێ گوهۆڕینێن گەلەک مەزن ل رۆژهەلاتا ناڤین و هەکە تشتەک وەسا روو بدەت کورد دشێن ل ئیرانێ بگەهنە مافێن خوە).
