هێزێن ئەمریکا یێن ل سووریێ د ئامادەباشیێ دانە
ژێدەرێن میدیایی ل سووریێ و رۆژئاڤایێ کوردستانێ دیار دکەن، پشتی ئالۆزیێن ڤێ دووماهیێ و مەترسیا شەڕەکێ د ناڤبەرا ئیرانێ و ئەمریکا دا، نها هەموو هێزێن ئەمریکا یێن ل سووریێ و رۆژئاڤایێ کوردستانێ د ئامادەباشیێ دانە و ئەمریکا هۆشداری ژی دایە هەر ئێرشەک ل سەر هێزێن وێ بهێتە کرن ئەو دێ ب توندی بەرسڤێ دەن.
فەرماندارەکێ ئەمریکی یێ ل سووریێ ژی دیار کریە، نها رەوش گەلەک خرابە، مەترسیا ڤێ یەکێ هەیە گرۆپێن چەکدارێن سەر ب ئیرانێ ئێرشی هێزێن وان ل سووریێ بکەن، ژ بەر ڤێ یەکێ ژی هەموو هێزێن وان یێن ل سووریێ و رۆژئاڤایێ کوردستانێ نها د ئامادەباشیێ دانە، هەر ئێرشەک ل سەر وان بهێتە کرن ئەو دێ ب توندی بەرسڤێ دەن و نها ژی وان چەکێ گران ل گەلەک دەڤەرێن ستراتیژی بجه کرینە و خوە بۆ هەر پێشهاتەکێ ژی بەرهەڤ کرینە.
ئەو یەک د دەمەکێ دایە کو بەری نها ب تایبەتی ژی پشتی ئالۆزیێن د ناڤبەرا ئیرانێ و ئەمریکا دا، هێزێن سەر ب ئیرانێ ل سووریێ چەندین جاران ئێرشی بنگەهێن ئەمریکا کرن، لێ هەری دووماهیێ ئەمریکا چەندین سەرکردێن هێزێن سەر ب ئیرانێ ل ئیراقێ و سووریێ کوشتن و پاشی ژی گرۆپێن چەکدارێن سەر ب ئیرانێ ئێرشێن خوە ل دژی ئەمریکا راگرتن، ل گۆر باوەریا چاڤدێرێن سیاسی ئەمریکا نەڤێت ل سووریێ چو ئالۆزی دروست ببن، چونکی ئەو یەک د بەرژەوەندیا ئەمریکا دا نینە.
