هێزێن توركی ل باشورێ كوردستانێ هۆكار و مه‌ترسی!
هه‌كه توركیا ل گه‌ل رژێما عێراقێ یا ژناڤچووی رێكه‌فتن هه‌بن كو هه‌ر ئێك ژ هه‌ردوو ده‌وله‌تا مافێ هاتنا بۆ ناڤ ئاخا وه‌لاتێ یا دی هه‌بیت بۆ دێرژیا -15-تا 20كم ئه‌وژی داكو رژێما عێراقێ بكاریت هێرشا ببه‌ته سه‌ر پێشمه‌رگه‌هێن كوردستانێ ل وی سه‌ر ده‌می كو دگۆتنه وان نوكه‌رێن كاپیتالزمێ (موخه‌ربین) و توركیا دڤیا بێته ناڤ ئاخا عێراقێ بۆ شه‌رێ (پ-ك-ك) ئانكو ل هه‌ر دوو لایان بۆ ژناڤبرنا شۆره‌شێن كوردا بوو. لێ ئیرۆ هه‌ڤسه‌نگی هاتنه گوهۆرین و هه‌رێما باشوورێ كوردتانێ هه‌رێمه‌كا فیدرالیه دگه‌ل عێراقێ و هیچ پاساوه‌ك نه‌مایه كو جه‌ندرمێن توركی سنوورێ هه‌رێمێ و عێراقێ ببه‌زینن و بدلێ خوه بچیته ناڤ ئاخا عێراقێ وكوردستانێ دا نه‌خاسمه ل باكوورێ كوردستانێ ئابلوَقه و شه‌ر و كوشتنا خه‌لكێ سڤیل دكه و یا به‌رده‌وامه ل سه‌ر پیلانێن خوه لسه‌ر كوردێن باكوور و نه‌یا ئاماده‌یه كێشا باكوور بشێوه‌كی ئاشتیانه چاره‌سه‌ر بكه‌ت! ژبلی به‌رده‌وام چیا و گوندێن باشوور بوَردمان دكه‌ت، ب به‌هانا شه‌رێ –په‌كه‌كێ –و نه‌خاسمه پشتی پارتێن كوردی ل باكوور سه‌ركه‌فتن بده‌ستڤه ئانین ل هه‌لبژارتنا و چوینه دن اڤ په‌رله‌مان یدا بۆ جارا ئێكێ؟ و كی نزانیت كو توركیا ببوو پرا ده‌ربازبوونا تیرۆرستێن داعش بۆ سوریا و عێراقێ ل ده‌سپێكا به‌هارا ره‌شا عه‌ره‌بی و هه‌تا نها ژی و ژبلی سه‌ربازگه‌هێن تیرۆرستان ل توركیا و تێكڤه‌دانا ئێمناهیا ده‌ڤه‌رێ. دهێت خاستن كو ژبیرناكه‌ین چه‌ندین جارا پشته‌ڤانیا خوه بۆ توركمانێن عێراقێ دیاركریه هه‌ر وه‌كی هاولاتیێن توركیا بن و خه‌ونا توركیا یا مێژوی د ویلایه‌تا مووسل دا. ڤێجا نزانم مه چ مفا ژ توركیا وه‌رگرتیه وه‌ك باشوورێ كوردستانێ یان ملله‌تێ كورد ل هه‌ر چار پارچان؟ و هه‌كه ئه‌م بێژین برێكا سنووری و بازرگانیێ مفای دگه‌هینت؟ ئه‌و پتر ژمه یا مفاداره چنكو كوردستا ن بوویه مه‌زنترین بازارێ توركی و به‌رهه‌مێن توركی ب رێژه‌كا مه‌زن ل كوردستانێ دهێته فرۆتن چنكو مه به‌رهه‌م وكارگه وكۆمپانیا نینن و ژێرخانا مه یا ئابووری یا هه‌لوه‌شیایه و قوَرخكارێن بازرگانیێ ناهێلن كۆمپانیا و به‌رهه‌مێ ناڤخۆیی بهێته بازاری داكو یا وان یا به‌رده‌وام بیت و دقازانجا هنده‌ك نه هنگێن گه‌نده‌لیێ دایه؛ هه‌ر وه‌سا بمینت داكو ده‌سهلاتدار و بازرگان پتر ده‌وله‌مه‌ند بمینن و بهیچ ره‌نگی نه‌دبه‌رژوه‌ندا دۆزا ملله‌تێ مه‌دایه. له‌شكه‌رێ توركی نه‌ك ل دووف رێكه‌فتنا به‌رێ وبۆ -15-20-كم هاتیه د ناڤ ئاخا كوردستانێ دا كو هێشتا هه‌رێمه‌كا فیدرالیه به‌لكی ب سه‌دان كم به‌زاندینه و چه‌ندین سه‌ربازگه‌هێن دی لكوردستانێ هه‌نه هێشتا یێن سالێن نۆتانه و ئه‌ڤه بدیتنا مه نه دبه‌رژه‌وه‌ندا دۆزا ملله‌تێ مه‌دایه و مه‌ترسیه‌كا مه‌زنه ل سه‌ر ئاسایشا كوردستانێ په‌یدا دكه‌ت به‌لكو د به‌رژه‌وه‌ندا هندك مفادارێن نه‌هه‌نگێن گه‌نده‌لیێ و قوَرخكرنا بازرگانیێ دایه ل سه‌ر ئاسته‌كی بلند و نزانین هه‌تا كه‌نگی دێ بازرگانی بدۆزا ملله‌تێ مه یێ دێرین و قاره‌مان هێته كرن. هاتنا ڤێ هێزا توركی ژبلی سه‌روه‌ریا عێراقێ پێشل دكه‌ت و هه‌رچه‌نده عێراق وه‌ك ده‌وله‌ته‌كا سه‌ربخوه نه‌مایه ژی و رۆژانه سه‌روه‌ریا وێ ژ لایێ ئیرانێ و تیرۆرستێن داعش و تۆندڕه‌وێن ئیسلامی ڤه دهێته ئه‌ته‌ك كرن، لێ مه‌ترسیه بۆ سه‌ر ئاسایشا مه‌یا نه‌ته‌وی.
