هێزێن سیاسی داخوازا چارەسەرکرنا قەیرانا سووریێ دکەن
ب دەهان پارتی و هێزێن سیاسی یێن رۆژئاڤایێ کوردستانێ و باکورێ سووریێ دیار کرن، سیاسەتا مەزهەبی یا شامێ ئەگەرێ سەرەکی یێ قەیرانا نها ل سووریێ یە و کوشتنا وەلاتیێن سڤیل یێن عەلەوی ناهێتە قەبوول کرن و دڤێت تاوانبار بهێنە سزا دان.
٣٥ پارتی و هێزێن سیاسی یێن رۆژئاڤایێ کوردستانێ و باکورێ سووریێ سەبارەت ب ئالۆزیێن ڤێ دووماهیێ ل سووریێ داخویانیەکا هەڤپشک بەلاڤ کرن و راگەهاندن، سیاسەتا مەزهەبی یا شامێ ئەگەرێ سەرەکی یێ قەیرانا نها یا ل سووریێ یە، مخابن دەستهەلاتا نها یا شامێ وانە ژ ئەزموونا چەندین سالێن بۆری ل سووریێ وەرنەگرتیە، ب سەپاندنێ و دوورخستنا پێکهاتەیێن دی ل سووریێ چو دەمەکێ رەوشا سووریێ ئارام نابیت و دێ بەردەوام ئالۆز بیت، دڤێت دەستهەلاتا نها یا ل شامێ راستیێن هەی قەبوول بکەت و دەست ژ سیاسەتا مەزهەبی و خوەسەپاندنێ بەردەت، چونکی ئەو یەک دێ بیتە ئەگەرێ قەیرانێن گەلەک مەزن ل سووریێ، مخابن سیاسەتا شاش یا شامێ بوویە ئەگەرێ گەلەک ئالۆزیان.
هێزێن سیاسی یێن رۆژئاڤایێ کوردستانێ و باکورێ سووریێ کوشتنا وەلاتیێن سڤیل یێن عەلەوی ب توندی شەرمزار کرن و راگەهاندن، هەکە شام بلەز چارەسەریەکا گونجای پێشکێش نەکەت و تاوانباران ژی سزا نەدەت دێ سووریێ بەر ب شەڕەکێ ناڤخوەیی ڤە چیت و ئەو یەک دێ بیتە ئەگەرێ روودانا کارەساتێن گەلەک مەزن، دڤێت دەستهەلاتا نها هەست ب بەرپرسیاریا خوە یا دیرۆکی بکەت و رێ ل کوشتنا وەلاتیێن سڤیل بگریت و تاوانباران ژی سزا بدەت.
هێزێن سیاسی یێن رۆژئاڤایێ کوردستانێ و باکورێ سووریێ داخواز دکەن د زووترین دەم دا ب پشکداریا هەموو هێز و ئالیێن سیاسی یێن سووریێ کۆمبوونەکا بەرفرەه بهێتە ساز کرن، چونکی تنێ رێیا چارەسەرکرنا قەیرانا نها ل سووریێ دانوستاندنە و دڤێت ب رێیا دانوستاندنان هەموو پرسێن هەی بهێنە چارەسەر کرن و دڤێت شام ژی دەست ژ سیاسەتا خوە یا شاش ل هەمبەر پێکهاتەیێن دی یێن سووریێ بەردەت.
ل ئالیێ دی ناڤەندا چاڤدێریا مافێن مرۆڤی یا سووریێ ژی دوهی دیار کر، د ئەنجاما شەڕ و ئالۆزیێن چەند رۆژێن بۆری پتر ژ هزار کەسان هاتینە کوشتن و رەوشا دەڤەرێن عەلەویان ل سووریێ گەلەک خرابە و مەترسیا کوشتنا گەلەک کەسێن دی ژی هەیە و دڤێت نەتەوەیێن ئێکگرتی، ئەمریکا و ئێکەتیا ئۆرۆپا ل هەمبەر رەوشا نها یا ل سووریێ بێدەنگ نەمینن.
