هێزەکا چەکدار ل دژی هەسەدێ هاتە ئاڤا کرن
ل دێرازۆرێ هێزەکا چەکدار هاتە ئاڤاکرن و داخواز ژ هەموو عەرەبێن ل دێرازۆرێ ژی دکەت کو ل دژی هەسەدێ شەڕی بکەن چونکی هەسەدە زۆرداریێ ل عەرەبان دکەت و دخوازیت ب زۆرێ ئاخا وان داگیر بکەت و دڤێت هەسەدە ل دێرازۆرێ نەمینیت.
هێزەکا چه‌کدار یا ب ناڤێ به‌رخوه‌دانا گه‌لێ دێرازۆرێ هاته ئاڤاکرن و داخویانیه‌ک ژی به‌لاڤکر، د داخویانیێ دا کۆما چه‌کدار یا ناڤهاتی بانگ ل وه‌لاتیێن عه‌ره‌ب یێن دێرازۆرێ دکه‌ت، کو ل دژی هێزێن کوردی خوە رێکخستن بکەن و ل دژی هێزێن سووریا دیموکرات ده‌ست ب شەڕی بکەن، هه‌روه‌سا د داخویانیێ دا هاتیە دیار کرن، کو هێزێن سووریا دیموکرات تنێ خزمەتا کوردان دکەت و گەنجێن عەرەب چەکدار دکەت و ژ بۆ خزمەتا خوە وان ددەتە کوشتن و ژ بەر ڤێ یەکێ ژی دڤێت هەموو گەنجێن عەرەب یێن ل دێرازۆرێ دەست ژ هێزێن سووریا دیموکرات بەردەن و خزمەتا وێ نەکەن، چونکی هەسەدە بوویە مەترسیەکا گەلەک مەزن ل سەر بەرژەوەندیێن عەرەبان ل دیرازۆرێ.
ل دووڤ زانیاریان پشتی کو ئه‌بو حاته‌م شاکر ژ ئالیێ ده‌ستهه‌لاتا تەحریر شام ڤه ل دێرازۆرێ وه‌ک فه‌رماندار هاتیه ئه‌رکدار کرن، ل ژێر فه‌رمانداریا وی بزاڤا ڤێ یەکێ دهێتە کرن، کو گەلێ عەرەب ل دژی کوردان خوە رێکخستن بکەن، گرۆپا چەکدار یا ب ناڤێ بەرخوەدانا گەلێ دێرازۆرێ ژی هەر ب پشتەڤانیا وی هاتیە ئاڤاکرن و حاتەم چەکی بۆ وان دابین دکەت و هاریکاریا وێ گرۆپێ دکەت و ژ بەر ڤێ یەکێ ژی هەکە رێگری ل وێ هێزێ نەهێتە کرن دبیت ئەو یەک ببیتە ئەگەرێ روودانا ئالۆزیێن نوو ل دیرازۆرێ.
ژ ئالیێ خوه ڤه هێزێن سووریا دیموکرات ژی ل گه‌ل هێزێن ئه‌مریکا ئانکو هه‌ڤپه‌یمانیا نێڤده‌وله‌تی ئۆپه‌راسیۆنه‌کا به‌رفرەه ل دژی کۆمێن چه‌کدارێن توندره‌و و داعشێ دایه ده‌ستپێکرن و هێزێن سووریا دیموکرات ل هه‌مبه‌ر ئێرش و گه‌فێن کۆمێن چه‌کدار هێزێن خوه ل گونده‌وارێن دێرازۆرێ زێده کریه. د داخویانیه‌کی دا بەرپرسێن هێزێن سووریا دیموکرات راگه‌هاندن، فەرماندارێ کو ژ ئالیێ شامێ ڤە هاتیە ئەرکدار کرن ل دێرازۆرێ دەست ب کارێن خراب کریە، وی دڤێت ناکۆکیان د ناڤبەرا کوردان و عەرەبان دا دروست بکەت و دڤێت شام رێ نەدەت کارەکێ وەسا روو بدەت، چونکی هێزێن سووریا دیموکرات رێ نادەن هندەک هێز ئالۆزیان دروست بکەن.
هەژی ئاماژەپێدانێ یە کو بەری نها ژی ب پشتەڤانیا شامێ ل دێرازۆرێ هندەک هۆزێن عەرەب ئێرشی هێزێن سووریا دیموکرات کربوون، لێ ب پشتەڤانیا ئەمریکا و هەڤپەیمانیا نێڤدەولەتی یا شەڕێ ل دژی داعشێ ئێرشێن وان هاتنە ژناڤبرن و نها رەوشا دێرازۆرێ گەلەک ئارامە و بەرپرسێن هێزێن سووریا دیموکرات ژی دیار دکەن ئەو خزمەتا هەموو خەلکێ دەڤەرێ دکەن.
