هێشتا مه‌ترسیا له‌هیان ل سه‌ر رووبارێ هشكه‌ڕۆ مایه
سندس سالح سلێڤانه‌یی:
ده‌ستپێكرنا بارانان، هنده‌ك مالێن ئاكنجیێن نێزیكی رووبارێ هشكه‌ڕۆ دبێژن: ب شه‌ڤێ ئه‌م ژ ترسان دا نه‌وێرین بنڤین، چونكو دترسین ئه‌وا پار ژبه‌ر له‌هیان ب سه‌رێ هنده‌ك مالان هاتی دوباره ببیته‌ڤه و باژێرڤانی ژی دبێژیت: بۆ قوناغا ئێكێ ب درێژاهیا پێنج كیلۆمه‌تران رۆبار هاتیه پاقژكرن و هه‌كه بۆ ئه‌ڤ ساله مه‌ترسی هه‌بیت ژی دێ یا كێم بیت.
ئوسمان خالد، مالا وی نێزیكی وی رووباری یه دبێژیت: ئه‌م هه‌موو دزانین كو ل سالا بۆری له‌هیان چو ب سه‌رێ خه‌لكی ئینا و چه‌ند خانی هاتنه خرابكرن و چه‌ند ترۆمبێل ئاڤێ برن، زێده‌باری گیان ژ ده‌ستدانا چه‌ند كه‌سه‌كان، له‌ورا بۆ دووباره نه‌بوونا وێ چه‌ندێ ئه‌م دخوازین بله‌ز چاره‌یه‌ك ل مه بهێته كرن، چنكو ب راستی پتریا ئاكنجیان ب شه‌ڤ نه‌وێرن ژ ترسان دا بنڤن، بۆ زانین رۆبار هاتیه پاقژكرن ژی، لێ هێشتا مه‌ترسیا پار ژدلێ مه نه‌ده‌ركه‌فتیه.
خه‌ملین ژی دایكه‌كه ل وی تاخی دژیت، دبێژیت: ئه‌ڤه چه‌ند شه‌ڤن كچا منا بچووك د ترسان دا نه‌وێریت بنڤیت و دبێژیت: دادێ ئه‌ز دترسم بنڤم و باران بهێت و له‌هی ڕاببن و مالا مه ئاڤ ببه‌ت.
ئیسماعیل مسته‌فا، به‌رپرسێ هۆیا راگه‌هاندنێ ل سه‌رۆكاتیا باژێرڤانیا دهۆكێ، ده‌رباره‌ی داخوازیێن وان دبێژیت: مه وه‌ك باژێرڤانی ئاگه‌ه ژوان هه‌یه و ئه‌ڤ ساله د قوناغا ئێكێ دا ب درێژاهیا پێنج كیلۆمه‌تران رۆبار هاتیه پاقژكرن، دقوناغا دویێ دێ ب به‌رفره‌هیا پازده مه‌تران دێ رۆبار هێته به‌رفره‌هكرن و ل هنده‌ك جها دێ پێدڤی ب دیوارێن پالپشت بن ئه‌و ژی دێ هێنه چێكرن، له‌ورا ئه‌م دبێژین هه‌كه ئه‌ڤ ساله مه‌ترسی هه‌بیت ژی دێ یا كێم بیت، هه‌روه‌سا تیمێن هه‌ڤپشك هاتنینه پێكئینان بۆ هه‌ر روودانه‌كێ.
دهێته زانین كو ل سالا بۆری ژئه‌نجامێ له‌هیان زیان گه‌هشتبوو پتری سه‌د مالان و هژماره‌كا زۆرا ترۆمبێلان ژی ئاڤێ بربوون، زێده‌باری ژ ده‌ستدانا دو كه‌سان كو ئاڤێ بربوون و خه‌ندقین، لێ ب راسپارده‌یا سه‌رۆك بارزانی و سه‌رۆكێ حكومه‌تا هه‌رێما كوردستانێ هه‌ر زوو فه‌رمانده (مه‌نسۆر بارزانی) ب پێشمه‌رگه‌یێن خوه ڤه هاتنه سه‌رخه‌ت و دهاوارا وی خه‌لكی چوون و ده‌مێ كێمتر ژ (48) ده‌مژمێران دا خانیێن زیان گه‌هشتینێ و ژناڤ چووین هاتنه قه‌ره‌بووكرن، ئه‌و ژی ب دانا پتری (130) شوقه‌یان بۆ خودانیێن وان خانیێن ژناڤچووین، هه‌روه‌سا پاره‌یه‌كێ زۆر و ئه‌رزاق و نڤین و گه‌له‌ك كه‌ره‌سته‌یێن دی یێن ناڤمالێ ل سه‌ر وان هاتنه به‌لاڤكرن.
