هێشتا 130 هزار ده‌نگده‌رێن دهۆكێ كارتێن خوه وه‌رنه‌گرتینه
ئه‌ڤرۆ، ئه‌میر ئه‌ترووشی:
رێڤه‌به‌رێ ئوفیسا دهۆك یا كۆمیسۆنا بلند یا سه‌ربه‌خۆیا هه‌لبژارتنان ل عیراقێ راگه‌هاند، هه‌تا نوكه هێشتا 130 هزار كارتێن ده‌نگدانێ ل هه‌ر 41 بنگه‌هێن بایۆمه‌تری یێن پارێزگه‌ها دهۆكێ ماینه و ده‌نگده‌ران وه‌رنه‌گرتینه و هه‌كه وه‌رنه‌گرن وان مانێ ده‌نگدانێ نامینیت و گۆت:
خالد عه‌باس، رێڤه‌به‌رێ ئوفیسا دهۆك یا كۆمیسۆنا بلند یا سه‌ربه‌خۆیا هه‌لبژارتنان ل عێراقی بۆ رۆژنامه‌یا ئه‌ڤرۆ دیار كر، به‌ری نوكه هژماره‌كا زۆر یا كارتێن ده‌نگدانێ گه‌هشبوونه دهۆكێ و د ماوه‌یێ بۆری دا نێزیكی 100 هزار كارتێن بایۆمه‌تری گه‌هشتبوونه پارێزگه‌ها دهۆكێ و ب رێكا 41 بنگه‌هێن ده‌نگدانێ ل سنوورێ پارێزگه‌ها دهۆكێ ل سه‌ر ده‌نگده‌ران دهاتنه دابه‌شكرن، ئه‌ڤه ژی كارتێن وان ده‌نگده‌ران بوون یێن سالا 2018 و هه‌تا مه‌ها پێنچ یا ئه‌ڤ ساله ناڤێ خوه بۆ كارتێن بایۆمه‌تری تۆماركربوون و ژ ڤی سه‌رجه‌می ژی هه‌تا نوكه نێزیكی 130 هزار ده‌نگده‌ران كارتێن خوه وه‌رنه‌گرتینه.
خویاژی كر كو به‌ری نوكه رێژا وه‌رگرتنا كارتێن بایۆمه‌تری 74% بوو و نوكه سه‌دێ 80ێ ده‌ربازكریه و ره‌نگه هێشتا نێزیكی 130 هزار كارتێن بایۆمه‌تری د ناڤا بنگه‌هێن مه یێن ده‌نگدانێ دا مابن.
گۆت ژی: بۆ رۆژا ده‌نگدانێ ژی نێزیكی 36 هزار كارمه‌ندان ب شێوه‌یێ ئۆنلاین ناڤێن خوه تۆماركرینه و 23 هزار فۆرمه ژی ب رێكا ده‌ستی گه‌هشتینه فه‌رمانگه‌ها مه و ژ ڤی سه‌رجه‌می ژی نێزیكی 11 هزار كارمه‌ندان دێ هێنه وه‌رگرتن و گۆت: هه‌ر كه‌سێ ناڤێ خوه ئونلاین تۆماركری و فۆرما خوه نه‌ئینایه فه‌رمانگه‌ها مه، ئه‌وی ماف نینه وه‌كو كارمه‌ندێ كۆمسیۆنێ پشكداریێ د هه‌لبژارتنان دا بكه‌ت.
ئاشكراژی كر كو به‌ری نها ژی 27 هزار كارتێن ده‌نگده‌رێن دهۆك بۆ به‌غدا هاتنه زڤراندن، ئه‌ڤه هه‌موو ئه‌و بوون یێن كارتێن وان بێ وێنه هه‌تا نوكه كارتێن خۆ نه‌وه‌رگرتییه، ل دووڤ رێنمایێن كومیسونێ هه‌موو بۆ به‌غدا هاتنه زڤراندن.
به‌رپرسێ نڤیسینگه‌ها هه‌لبژارتنان لقێ 14 یێ پارتێ ل پارێزگه‌ها مووسل ژی دیار كر، ئاریشه‌ك بۆ ئاوارێن ژ ده‌رڤه‌ی كه‌مپان ئاكنجی چێبوویه، ئه‌و ژی كارتێن وان یێن ده‌نگدانێ چووینه مووسل و ئاواره نه‌شێن بچنه مووسل كارتێن خۆ وه‌ربگرن.
مه‌ناف محه‌مه‌د، به‌رپرسێ نڤیسینگه‌ها هه‌لبژارتنان لقێ 14 یێ پارتێ ل پارێزگه‌ها مووسل راگه‌هاند كو: “هه‌تا 17 هزار ئاوارێن ژ دره‌ڤه‌ی كه‌مپا ئاكنجی پێدڤیه بچنه پارێزگه‌ها مووسل بۆ وه‌رگرتنا كارتێن خۆ یێن ده‌نگدانێ، هه‌ر ئاواره‌كێ ژ ده‌رڤه‌ی كه‌مپان كارتا خۆ نه وه‌رگریت، نه‌شێت ده‌نگێ خۆ ل هه‌لبژارتنێن بهێت یێن په‌رله‌مانێ عێراقی بده‌ت، ئه‌ڤه نوكه بوویه ئاریشه بۆ وان ئاوارێن ژ ده‌رڤه‌ی كه‌مپان ئاكنجی، چونكو پێدڤییه بچنه مووسل كارتێن خۆ وه‌ربگرن و ئاواره نه‌شێن بچنه مووسل، ژ به‌ر خه‌لك زه‌حمه‌ت دچنه مووسل زوو ب زوو ئاوارێن ژ ده‌رڤه كه‌مپان ناچنه مووسل ئه‌ڤه بوویه ئاریشه هه‌موو ئاوارێن ژ ده‌رڤه‌ی كه‌مپان نه‌شێن كارتێن خۆ وه‌ربگرن”.
