هێشتا 39 كەس ژ خێزانەكا ئێزدی نەهاتینە دیتن
دهۆك، لەزگین جوقی
مامێ گەنجەكێ رەڤاندیێ ئێزدی راگەهاند، ل ساڵا 2014ێ رەوەند نایف دگەل هەشت ئەندامێن خێزانا خۆ ل خانەسور قەزا شنگالێ ژلایێ تێرۆرستێن داعش هاتبوو رەڤاندن، ئەم د بێ هیڤی بوون ژ رزگاركرنا وی و وەكۆ شەهید هاتبوو تۆماركرن، لێ نوكە ب ساخی ڤەگەریایە.
حەجی حەمێ، مامێ رەوەند نایف حەمێ بەری چەند رۆژان بن دەستێن خێزانێن تێرۆرستێن داعش ل سوریا هاتیە رزگاركرن راگەهاند، جینۆسایدا شنگالێ ساڵا 2014ێ ب تنێ ژ مالباتا مە 77 كەس ژلایێ تێرۆرستێن داعش هاتبوونە رەڤاندن، هەتا نوكە ب پشتەڤانیا نڤیسینگەها رزگاركرنا رەڤاندیێن ئێزدی 38 كەس ژ خێزانا مە رزگاربووینە و هێشتا 39 كەس ماینە چارەنڤیسێ وان دیارنینە.
زێدەتر گوت: رەوەند نایف د ژیێ 7 ساڵیێ دا هاتبوو رەڤاندن، نوكە ژیێ وی بووینە نێزیكی 18 ساڵان، ئەڤە بوویە ئەگەر رەوەند نایف زمانێ دایكا خۆ كۆ زمانێ كوردی یە ژبیر بكەت و تووشی گەلەك نەخۆشیان بوویە ل سەر دەستێن تێرۆرستێن داعش كۆ رۆژا 29/6/2025 دناڤ خێزانەكا تێرۆرستێن داعش ل سوریا هاتە رزگاركرن، ب تنێ رەوەند نایف ژ خێزانا برایێ من نایف حەمێ رزگاربوویە، مە قەت باوەر نەدكر دێ رۆژەكێ رزگاربیت، ئەم دێ دووبارە كارۆبارێن وێ ب ریڤەبەین و مرنا وی رەت كەین.
حەجی حەمێ راگەهاند ژی، ژ كۆما 77 كەسێن رەڤاندیێن ئێزدی دناڤ ئێك خێزان دا كارەساتەكا مەزنە چ جاران ناهێتە ژبیركرن و ئەڤە 11 ساڵ ب سەر جینۆسایدا شنگالێ ڤە چوون، هێشتا چارەنڤیسێ سەدان كەسان هەتا نوكە دیارنینە.
