هێلینا نە پیرۆز
ئەدیب عەبدوللا
جوانی هندەك جاران حەنەكا ل هەستان دكەت، ب هەمی روویەكی ڤە داگیركرنێ دكەت، جوانییا ڤێ كەزی زەرێ بالا هەستێن وی كێشا رێیا دەمی ژبەر هەستا یێ هندا كری.. رۆژێن رەشكرین.. شەڤا ل تاوانەكێ دگەریت، ل وێ نیڤ شەڤێ فیریانا هەستێن وی خۆ لبەر گرانییا عەشقێ نەگرت. ب رێیا ئنستگرامی ل باتی بێژیتێ كەیفا من گەلەك بتە دهێت هەما دانا ناڤ ماشا و گۆتێ: من تو گەلەك دڤێی. وێ ژی ب شەرمینانەڤە نە دڤییا هەستێن وی بێزار و پاشڤە ببەت وگۆتێ: دزانم.
هەر وەكی وێ ل وێ چركەیێ دا گیانێ خۆ ب پیرۆزی ڤە رادەستی زمبێدیێن بەهشتا هەتا هەتایی كری، گڕنژینێ هەستێن وی فیراندن، جانێ وی بێ دەستووری رابوو رەقاسێ، كەیفێ خوینبەرێن دلێ وی گەنج كرن، هەستێن وی مینا شانەكا عەشقێ پەیڤێن نازك ئافراندن، رۆندكێن كەیفێ د سۆلێن چاڤێن وی دا هاتنە خوار، خەو ژی وەكی دەهبەكا بێ شەرم دەمێ خۆ د ئێكی را دبینیت دۆرا خۆ نا دەتە كەسێ لبەر كێلەكێن مرۆڤی د رازێت، نەهشییێ د چاڤێن مرۆڤی دا د ئینیتە خوار.
دگەل هایی چوونا وی دا، ئەو كەزی زەرە مینا ڤریشتەیان لبەر سینگێ وی سەكنی
– تو دزانی هندەك جاران تەپ د هێنە من.. هێشتا دەست پێكە داكو سوباهی نەبێژی تە نە گۆتە من.
تەزینكەكێ گەه و بارێن وی گرتن، هایێ وی سەر ژ هەر تشتەكی ستاند، ئێ نێ عەشقا دروست تەپێ د ئینیتە مروڤێ عاشق، جاردی چاڤان قەستا هێلینا خۆ كر، وێ ڤریشتەیێ ئاخڤتنا خۆ زێدە كر.. هێشتا دەستپێكە دا گەلەك بخەم نەكەڤی ژبەری چەند سالا ئەز جارەكێ یا چوویمە د هێلینا نە پیرۆز دا.
هەرێ ئەڤە چییە دهێتە رویدان رەسەنەتییا عەشقا پیرۆز تەپن، ئەو چ هێلینا نە پیرۆزە ژیان ل دەڤ من ژی و وێ ژی پیرۆز نە هێلای، كی نا بێژیت ئەڤ ڤریشتەیە ژیانێ لمە تێك نادەت. نە.. ژیان دگەل وێ ژیانە، دێ هێلینا نە پیرۆز پیرۆز هێلم.
