هێما ناڤی

لەزگین گراڤی

نە سەیرە دیلی و مەلیلی
ئەو چەوا
چەرگی خوە سۆتی
یان ڕەخنێ پەسنا خوە گۆتی
یان سەری مێشك فروتی؟!
دیل كرن
بازێ كەڤەر.
كا لاتا ئاواز ڤەگێرا ؟
كا ڕۆژا كەفتی پشت ستێرا !
كا ئولێ .. مزگەفت دێرا ؟
كا داستانا . . مێر و شێرا
دیدەڤان
كۆزك و چەپەر.
كا ڕوبارێ
ب كەلەك و ب گەمی
كا ئەز و تو، كا ئەوێ دی . .
كا یێ هەنێ و كا هەمی؟
كا شەڤا ژ ڕۆژێ ب زەڤەرتر
كا نەورۆزا ژ دویر خوەشتر
كا هێما ناڤی . . كێ ڕەش كر ؟
كا سۆر و سپی و . .
كەسك و زەر ؟
پێل و مەیاڤ و زڤڕۆكن
پێجەك و شلقاڤ و شۆكن
نە قلیانە و
نە بەربەست و نە كەپرۆكن
ڕویبارەك
ب دەنگ و ناڤ بوو
پارچە پارچە بوو، بەلاڤ بوو
كا مشێنا بدەنگ و ناڤ
كا داستانا
خورت و بزاڤ؟
هەستێ نڤستی هشیاركە
نە زڤرە پاش
نەمینە خاڤ
بەژنا ژارێ .. ڤێ بێزارێ
هێدی هێدی
ژ پاخل و گەردەنا زەر
هەتا دگەهیت سینگێ كەڤەر.
بێ سەمیانە بێ خودانە
لێ كوم دبن پیس و
قەشمەر .
سۆزدارا من
من ژی سۆزدا بچم هەرم
دور بكەڤم
ڤان شینوارا ئەز بهێلم
نە زڤرم . . نە ئێمەڤە
بەلێ بڕیارا من . . ئەڤە
نە ئێمەڤە هەر بمینم
بێ وار و كەس و
دەربەدەر .

کۆمێنتا تە