هێما و گهفا دو جهمسهریێ
د جیهانا داهێنانێدا جاران جهمسهر دروست دبن، دو كهسێن داهێنهر ل ئێك جهـ یان دهڤهر یان باژێر دگههنه پلێن بلندێن داهێنانێ و دناڤ خهلكیدا ناڤدار دبن، خهلك ژ زانین یان نهزانین رێزێ ل ههردویان دگریت و ههردویان ل رێزهكا بهرز دبینن وى دهمى دو جهمسهرى د ناڤبهرا واندا چێدبیت و پاش دبیته دفنبلندى و چاڤ پێنهرابوون و پاش دگههیته قووناغا ههڤدابڕینێ و د ئهنجامێ دووماهیێ دا ژى ئێكودو كرێتكرن و شكاندنه.
مه چهند گوهلێبوویه داهێنهرهكى رهتكریه ل گهل ڤههكویفهكێ خوه ل ئێك جڤات روینیت، یان ئێك دگهل ئێكێ وهكى خوه دو جهمسهرى د ناڤدا دروست بویى ل ئێك جهـ بهرههڤبیت، یان هۆلهك دووێن وهك ئێك خرڤهكهت، بیرا من دهێت ل سالا 1995 فیستهڤالا هزرمهندێ كورد ئهحمهدێ خانى ل دهۆكێ هاتبوو رێخستن نڤیسهرێ رهحمهتى مارف خزنهدار نامهك بۆ لیژنا سهرپهرشت هنارت و تێدا گۆتبوو:(هوون دزانن ئهز ناهێمه فیستهڤالهكێ ئێكێ وهك عزهددین مستهفا رهسول هاتبیته داخوازكرن). ئهو ل وى دهمى دو جهمسهربوون، ئێك ژ وان ل جههكى یان چالاكیهكا هزرى رهوشهنبیرى بهرههڤنهدبوو ههڤكویفێ وى هاتبا داخوازكرن. هندهك نموونێن دى ژى ههنه، لێ جامێران ئهڤه نه دهۆكینه لهو دێ ئاماژێ ب وان دهین و نموونێن دى یێن دهۆكى دێ بنه غهیبهت و ئاخفتن ڤهگوهێزى.
ل نك مه دو هونهرمهندێن مهزن ههنه ههر ئێكى ژ وان پێنح شهش دههكێن سالێن خزمهتێ ههنه و ههردو ژى خودان جهماوهرن نوكه یێن بووینه دووجهمسهر، ههمان رهفتارا خزنهدار و رهسول دكهن، بهرنامهك یان جڤاتهك یان روونشتنهك ب بهرههڤبوونا ههردویان نههاتیه كرن و نه دهێته كرن. د كهڤندا ژى ئهڤ جۆره دو جهمسهره ههبووینه و سهرهاتى یێن وان مشتن، گهنشگهشهیێن وان ژ جهێن تایبهت و كهسایهتى كێشایه سهر بهرپهرێن رۆژنامه و كۆڤاران و شاشهیێن تێلهڤزیونان ژى، وهكى دبێژن ههر پیڤازا ئێكودو سپى دكر و بالاڤا ههڤدو دكر، ل بهرئێك د راوهستیایى بوون و ههر ئێكى نهخشه و پلانێن خوه ههبوون، ل سهردهمهكێ هێرڤهتر هندهك میۆزیكڤانان رهتكر دگهل سترانبێژهكى دهركهڤن چنكو ئهو و سترانبێژێ ئهو دگهل كاردكهن دو جهمسهرن و ڤیان وهك شكاندن وى سڤكبكهن.
نموونهیێن هۆسا ل سهر ئاستێ جیهانێ ژى ههنه كهڤن ههبوون و نوو ژى ههنه، وان ژى سهرهاتى ههنه، ئهڤ رهفتاره دروستبوونا هێما تێكددهن و ناهێلن هێما چێببن، دو لایهنن ههر ئێكى بهانهیێن خوه ههنه و ههر ئێكى نهخشه و پلان و رهخنهیێن خوه ههنه، ههر ئێكى رێژهكا جهماوهرى ههیه، ئهڤه دێ وى تاوانباركهت و ئهو دێ ڤى كێمكهت و د ئهنجامدا ههردو دێ د چاڤێن خهلكیدا سڤك و كز و لاوازبن.
مالهكێ دو جیران ههبوون، ناڤێ ئێكى ئهحمهد بوو و یێ محهمهد بوو، ههردو ژى برابوون، سهرا ژن و زارۆیان د ژێك سلبوون، ههر شهڤ ئێك ژ وان دچوو مالا جیرانێ خوه، شهڤا ئهحمهدى جیران دا بێژیت: راستى ئهحمهد یێ باشه و برایێ وى یێ خرابه، دهمێ محهمهد دچوو شهڤبێریێ جیران دا بێیت راستى محهمهد كهسهكێ جامێره و ئهحمهد یێ خرابه، ههڤژینا وى هزار رهحمهت ل گۆڕێ گۆتێ: راستى نه ئهحمهده و نه محهمهد.
